Sam fɔlɔ 24 - ALA KA KUMA

Dawuda be ban ka Sayuli faga

¹ Dawuda bɔra o yɔrɔ la ka taga Ɛngɛdi mara yɔrɔ barikamanw na.

² Sayuli tilara filisiw gwɛnko la tuma min na, a kɔsegira ka na. U nan'a fɔ a ye ko Dawuda be Ɛngɛdi mara kongokolon kɔnɔ.

³ A ye mɔgɔ waa saba (3 000) woloma Isirayɛlidenw bɛɛ cɛma, ka taga n'olu ye Dawuda n'a kɔmɔgɔw ɲiniyɔrɔ la, ko u be taga kongo kɔnɔ Bakɔrɔninw ka kulu gɛrɛfɛ.

⁴ A tagara se sagaw ka wɛɛrɛw yɔrɔ la min be sirada la. Farawo dɔ tun be o yɔrɔ la. A donna o kɔnɔ ko a be banakɔta kɛ. O y'a sɔrɔ Dawuda n'a kɔmɔgɔw be o farawo nin kɔnɔ fɔɔ ɲafɛ.

⁵ Dawuda kɔmɔgɔw y'a fɔ a ye ko: «Aa! Masaba tun y'a fɔ i ye ko ale bena i jugu don i bolo, ko fɛɛn min ka d'i ye, i k'o kɛ a la. O loon sera bii.» Dawuda wilila ka Sayuli ka foroca dagolo tigɛ n'a ma bɔ a kala ma.

⁶ O kɔ, a y'a yɛrɛ jalaki ko mun na ale y'a ka foroca nin dagolo tigɛ.

⁷ A y'a fɔ a kɔmɔgɔw ye ko ni ale ye kojugu kɛ a kuntigi la, Masaba ye min woloma, Masaba kan'a diya ale la. Ko ale ten'a bolo la a kan, bari Masaba le y'a woloma.

⁸ Dawuda y'o kuma le kɛ k'a kɔmɔgɔ nunu bali. A ma sɔn u ka Sayuli kɛlɛ. Sayuli tilara tuma min na, a wilila ka bɔ k'a ka sira minɛ.

⁹ Dawuda fana bɔra ka pɛrɛn ko: «Masacɛ ni ne matigi!» Sayuli ye filɛli kɛ kɔfɛ. Dawuda y'a ɲaa biri duguma k'a kunbiri gwan

¹⁰ k'a fɔ Sayuli ye ko: «Mun na i be mɛnni kɛ mɔgɔw fɛ minw b'a fɔ ko ne Dawuda b'a fɛ ka kojugu kɛ i la?

¹¹ I k'a filɛ sa, Masaba tun ye i di ne ma bii farawo kɔnɔ. U tun b'a fɛ ne k'i faga, nga ne ma sɔn k'o kɛ, bari ne tun ko n tena n bolo la n matigi kan, bari i ye Masaba ka mɔgɔ wolomanin ye.

¹² N faa a filɛ sa, i ka foroca dagolo filɛ ne bolo la. Ne y'i ka foroca dagolo tigɛ, ne ma i faga. I k'a lɔn ka l'a la ko ne te kojugu si labɛnna i kama, ne fana te murutibaga ye, ne fana ma i hakɛ ta koo si la. Nga ele kɔni, e be tugura ne kɔ ka ne fagayɔrɔ ɲini.

¹³ Masaba le bena an bɔ ɲɔgɔn na, ka ne mɔnɛ bɔ e la! Nga ne yɛrɛ tena n bolo la i kan.

¹⁴ Waati tɛmɛnin na, u tun be to ka talen nin la ko: ‹Juguya be sɔrɔ juguman le la›. O la, ne tena n bolo la i kan.

¹⁵ Isirayɛlidenw ka masacɛ nana jɔn le kama? I be tugura jɔn le kɔ? Wulusu wa? Walima tɛtɛ?

¹⁶ Masaba le bena ne ni ele bɔ ɲɔgɔn na, ale lo bena ne ka koo filɛ ka kuma ne nɔɔ na, a bena ne ka tiɲɛ di n ma ka n kisi i ma.»

¹⁷ Dawuda tilara o kuma fɔli la Sayuli ye tuma min na, Sayuli y'a fɔ ko: «Ne dencɛ Dawuda, ele lo wa?» O kɔ, a kasira kosɔbɛ.

¹⁸ A y'a fɔ Dawuda ye ko: «E kɛra mɔgɔsɔbɛ ye ka tɛmɛ ne kan, bari i ye koɲuman kɛ ne ye, nga n y'i sara ni juguman ye.

¹⁹ Bii, e y'i ka ɲumanya yira ne la, Masaba tun ye ne d'i ma, i ma sɔn ka ne faga.

²⁰ Mɔgɔ be se k'a jugu kunbɛn k'a to a be taga hɛrɛ la wa? I ye fɛɛn min kɛ ne ye bii, Masaba k'i sara o la.

²¹ Sisan ne y'a lɔn ko ele le bena kɛ Isirayɛlidenw ka masacɛ ye, i bena to u kunna tuma bɛɛ.

²² Ne b'a ɲini i fɛ ko i ka kali ne ye ni Masaba tɔgɔ ye ko i tena ne kɔmɔgɔw halaki ne tɛmɛnin kɔ, ani ko i tena ne sii tomo pepewu ka bɔ ne faa ka somɔgɔw la.»

²³ Dawuda kalila. O kɔ, Sayuli tagar'a ka soo, Dawuda n'a kɔmɔgɔw tagara u ka yɔrɔ barikaman na.