Sam fɔlɔ 21 - ALA KA KUMA

¹ O kɔ, Dawuda wilila ka taga, Zonatan segira ka don dugu kɔnɔ.

Dawuda be taga Ayimelɛki fɛ Nɔbi

² Dawuda tagara sarakalasebaga Ayimelɛki fɛ Nɔbi. Ale yɛrɛyɛrɛtɔ nana Dawuda kunbɛn, k'a fɔ a ye ko: «Mun na i be taama i kelen, ni mɔgɔ si te n'i ye?»

³ Dawuda y'a jaabi ko: «Masacɛ le ye n ci, a ko n kan'a to mɔgɔ be cira nin mɛn. N ye yɔrɔ dɔ yira n ka kɔmɔgɔw la k'olu ka na n kunbɛn o yɔrɔ la.

⁴ E do, mun le b'i fɛ? Buru deen duuru di ne ma, walima fɛɛn min be sɔrɔ i fɛ.»

⁵ Sarakalasebaga y'a fɔ a ye ko buru gwansan te ale fɛ tugu. Ko minw dira Masaba ma, olu dɔw le be yen. Ko a ma ban n'o y'a sɔrɔ a kɔmɔgɔw tun ma musoko kɛ.

⁶ Dawuda y'a jaabi ko: «Anw ma maga muso la, i n'a fɔ an be deli k'a kɛ cogo min na ka kɔrɔ, ni n be taga kɛlɛkɛyɔrɔ la. N kɔmɔgɔw ka minanw fana saniyanin be. Hali n'u ka taama saniyanin tɛ, a bena se ka saniya bii nin koo nin seen fɛ.»

⁷ O tuma na, buru minw tun dira Masaba ma, sarakalasebaga nin y'olu d'a ma, bari buru wɛrɛ si tun te yen tugu n'o tɛ. U tun y'u ta ka bɔ u bilayɔrɔ la Masaba ɲakɔrɔ, ka gwanninmanw bila u talon na.

⁸ O loon na fana, o y'a sɔrɔ Sayuli ka baaraden dɔ be o yɔrɔ la Masaba ɲakɔrɔ, a tɔgɔ ko Dowɛgi, edɔmucɛ tun lo. Ale tun ye Sayuli ka sagadɛndɛbagaw kuntigi ye.

⁹ Dawuda y'a fɔ Ayimelɛki ye ko: «Taman, walima murujan dɔ t'i fɛ yan wa? Masacɛ ka cira nin ka teliyakojugu fɛ n ma se ka n ka maramafɛnw ta.»

¹⁰ Sarakalasebaga y'a fɔ a ye ko: «I ye filisikan Goliyati min faga Terebɛntiyiri kɔɔ kɛnɛ na, ale ka murujan le be yen. A melekenin be fani dɔ kɔnɔ ka bila sarakalasebagaw kuntigi ka fani kɔfɛ. N'i b'a fɛ k'ale ta, i be se k'a ta, n'o tɛ, dɔwɛrɛ te yen tugu.» Dawuda y'a fɔ a ye ko muru nin ɲɔgɔn te yen, ko a k'a d'a ma.

Dawuda be boli ka taga Gati

¹¹ Dawuda wilila ka boli Sayuli ɲa ka taga yɔrɔjan na o loon kelen nin na, fɔɔ ka taga se Gati masacɛ Akisi fɛ.

¹² Akisi ka baarakɛlaw y'a fɔ a ye ko: «Nin te jamana kuntigi Dawuda ye wa? U tun te dɔnkili lara ka dɔɔn kɛ ale le kosɔn wa? Ka to k'a fɔ ko: ‹Sayuli ye mɔgɔ waa damani faga, Dawuda ye mɔgɔ waa tan tan faga.› »

¹³ Dawuda ye kuma nin gwɛlɛyayɔrɔ ye, a siranna Gati masacɛ Akisi ɲa kosɔbɛ.

¹⁴ O la, a y'a yɛrɛ kɛ fatɔ ye u ɲana, ka to ka yaalayaala u cɛma, ka to ka sɛbɛnɔ kɛ u ka dalakonw kan, k'a daji to a be bɔnn'a bonbosi kan.

¹⁵ Akisi y'a fɔ a ka baarakɛlaw ye ko: «Aw yɛrɛ y'a ye ko nin cɛɛ nin kuun te yen. Mun na aw b'a minɛ ka na n'a ye ne fɛ?

¹⁶ Fatɔ le fɔnna n fɛ wa? O la, aw be na ni cɛɛ nin ye ne yɔrɔ, janko a k'a ka fatɔyabaara kɛ ne ɲana kɛ. Cɛɛ nin tena don ne ka soo kɔnɔ dɛ!»