Mas fɔlɔ 7 - ALA KA KUMA

Solomani ka soo lɔko

¹ Solomani y'a yɛrɛ ka soo lɔ fana. A y'ale lɔ saan tan ni saba kɔnɔ a ka sɔrɔ k'a ban pewu.

² Boon min be wele ko Liban tuu, a y'o lɔ. O boon nin jaɲa tun ye mɛtɛrɛ bi duuru ye, a kɔnɔ boɲa tun ye mɛtɛrɛ mugan ni duuru ye, a jaɲa sanfɛ, o tun ye mɛtɛrɛ tan ni duuru ye. Sɛdiriyiriw le tun kɛra tutunanw ye, olu sira naani le tun b'a kɔnɔ, o fana ka kɛ banabiriw ye, tutunan nunu kan.

³ U ye sɛdiriyiri dɔw la banabiri nunu kan k'u kuun biri. O yiri nunu tun ye bi naani ni duuru ye, sira kelen o sira kelen, tan ni duuru.

⁴ Fenɛtiriw tun be soo nin faan fila la sira saba saba. U kelen kelen bɛɛ tilennin tun be ɲɔgɔn ma.

⁵ Koonw n'u lɔgɔw bɛɛ jaɲa n'u boɲa tun ye kelen ye. Fenɛtiri sira saba nunu kelen kelen bɛɛ tun tilennin be ɲɔgɔn ma.

⁶ A ye bonba wɛrɛ lɔ tutunanw ka ca min kɔnɔ, min tɔgɔ ko Tutunan boon. O jaɲa tun ye mɛtɛrɛ mugan ni duuru ye. A kɔnɔ boɲa tun ye mɛtɛrɛ tan ni duuru ye, ka bulonda dɔ kɛ a la ni tutunanw ye ka gwata dɔ kɛ o ɲafɛ.

⁷ A tun ye boon dɔ lɔ ka masasigilan bila o kɔnɔ. A tun be to ka kitiw tigɛ o yɔrɔ la, o tɔgɔ ko Kititigɛ boon. A ye sɛdiriyiri kɛ k'o kogo datugu k'a ta duguma fɔɔ sanbon na.

⁸ A y'a yɛrɛ ka laso lɔ o cogo kelen na luu wɛrɛ kɔnɔ, boon nin kɔfɛ. A fana ye soo wɛrɛ lɔ min ni boon nin ye cogo kelen ye, o ka kɛ Ezipiti masacɛ denmuso ta ye, a tun ye min furu.

⁹ Boon nunu bɛɛ lɔra ni kabakuru ɲanamanw ye. U tun lɛsɛra ka ɲa u faan fila bɛɛ la. U y'a ta duguma fɔɔ ka taga se bon dan ma, kɛnɛmala fana lɔra n'o ye fɔɔ ka taga se luba ma.

¹⁰ Soo nin juu tun sigira ni kabakuruɲumanw ye minw ka bonbon, dɔw boɲa tun ye mɛtɛrɛ duuru ye, dɔw naani.

¹¹ Olu sanfɛ, u ye lɔli kɛ ni kabakuru ɲanamanw ye. Olu fana tun lɛsɛra ka ɲa. Sɛdiriyiriw lara o kan.

¹² Luba laminikogo tun lɔra ni kabakuru lɛsɛninw ye, fɔɔ ka se sira saba ma, ani sɛdiriyiri sira kelen tun lara o kan, i n'a fɔ Masaba ka soo kɔnɔnalu tun lɔra cogo min na, ani a bulonda fana.

Uramu ye baara minw kɛ

¹³ Masacɛ Solomani ye Uramu wele ka bɔ Tiri ka na.

¹⁴ A bamuso tun ye firiyamuso ye, Nɛfutali kɔmɔgɔ tun lo. A facɛ tun ye Tirika ye. Uramu tun ye zirabaarakɛbaga ye. A tun be se o baara la kosɔbɛ, hakili tun b'a fɛ ka se ka zirabaara sifa bɛɛ kɛ. A nana se masacɛ Solomani fɛ k'a ka zirabaara bɛɛ kɛ.

¹⁵ A ye tutunan fila dilan ni zira ye. Tutunan kelen nin jaɲa tun ye mɛtɛrɛ kɔnɔntɔn ye, a boɲa tun ye mɛtɛrɛ wɔɔrɔ ye. Tɔ kelen nin fana tun be ten.

¹⁶ A ye fɛɛn dɔ ziralaman fila dilan minw ka kan ka bila tutunan nunu sanfɛ. U kelen kelen bɛɛ jaɲa sanfɛ tun ye mɛtɛrɛ fila ni tilan ye.

¹⁷ Masirifɛn dɔ deen wolonwula ani jɔrɔkɔ deen wolonwula tun be tutunan kunnafɛn nunu kelen kelen bɛɛ la.

¹⁸ A ye gerenadiyiriden jaaw dilan, k'o kɛ ka masirifɛn nunu lamini fɔɔ sira fila fila.

¹⁹ Fɛɛn minw tun be bulonda tutunanw sanfɛ, olu tun dilanna ka kɛ i ko feeren. U jaɲa sanfɛ tun ye mɛtɛrɛ fila ye.

²⁰ Fɛɛn fila minw sigira tutunan nunu sanfɛ, gerenadiyiriden jaa kɛmɛ fila tun y'u lamini u kuruyɔrɔ la sira fila fila, masirifɛn nunu sanfɛ.

²¹ A ye tutunan nunu wili k'u lɔ Masaba ka soo bulonda la. U ye kinibolo tutunan nin tutu k'ale tɔgɔ la ko Yakin, o kɔrɔ ko Ala le be sabatili kɛ, ka numanbolo ta tutu k'ale fana tɔgɔ la ko Bowazi. O kɔrɔ ko fanga be bɔ Ala fɛ.

²² Tutunan nunu sanfɛla tun kɛra i n'a fɔ feeren dɔ. Tutunan nunu baara banna ten.

²³ A fana ye tasaba ziralaman dɔ dilan. A kɔnɔ waga tun ye mɛtɛrɛ duuru ye, a jaɲa sanfɛ, mɛtɛrɛ fila ni tilan, ani a boɲa, mɛtɛrɛ tan ni duuru.

²⁴ Yiriden dɔw jaaw tun b'a dagolo jukɔrɔ k'a lamini. Mɛtɛrɛ tilancɛ o mɛtɛrɛ tilancɛ, jaa nunu tan be sɔrɔ yen, fɔɔ ka tasaba nin lamini, sira fila. O ni tasaba nin tun korila ka dilan ɲɔgɔn fɛ.

²⁵ A ye tura tan ni fila jaa dilan ni zira ye, tasaba nin tun sigira o kan. Tura jaa saba ɲaa tun sinnin be kɔgɔdugu ɲafan na, saba ɲaa sinnin be tileben fɛ, saba wɛrɛ ɲaa sinnin be worodugu ɲafan na, saba wɛrɛ ɲaa sinnin be kɔrɔn fɛ. Tasaba nin sigira olu kan, o tura nunu jaa kɔfɛla tun be tasaba kɔrɔ.

²⁶ Tasaba nin dagolo boɲa tun sera mɔgɔ tigɛ boɲa ma. Dagolo nin tun kɛra i ko jifilen min dilanna i n'a fɔ feeren. Litiri waa bi seegi (80 000) ɲɔgɔn le tun b'a fa.

²⁷ O kɔ, a ye wotoro tan dilan ni zira ye. U kelen kelen bɛɛ jaɲa tun ye mɛtɛrɛ fila ye, u kɔnɔ boɲa, mɛtɛrɛ fila, u jaɲa sanfɛ, mɛtɛrɛ kelen ni tilan.

²⁸ Wotoro nunu tun dilanna cogo min na, o filɛ. U ye zira dɔw kɛ k'u lɔ nɔnkɔnw na i n'a fɔ berew, ka pɛnpɛrɛninw bila gɛrɛnw na k'u nɔrɔ o la.

²⁹ Jaraw ni turaw, ani *serubɛn jaaw dilannin tun b'o pɛnpɛrɛnin nunu kan, k'u dɔw kɛ nɔnkɔn ta nunu kan. Masirifɛn dɔw tun kɛnin be jara ni tura jaa nunu sanfɛ ani jukɔrɔ.

³⁰ Seen ziralaman naani tun be wotoro nunu na. Seen nunu lakisi fana tun ye zira ye. Daga bena sigi nɔnkɔn minw kan, olu ni lakisi minɛfɛn tun nɔrɔnin be ɲɔgɔn na. Masirifɛn dɔw tun be nɔnkɔn nunu gɛrɛn na.

³¹ Wotoro nunu sanfɛla tun wilinin lo ka se mɛtɛrɛ tilan ma. A kɔnɔ waga tun be se santimɛtɛrɛ bi wolonwula ni duuru ma. A korinin tun lo ka wili sanfɛ. U ye jaa dɔw ɲɛgɛn k'a lamini. Wotoro nunu faan bɛɛ tun ye kelen ye, u korinin tɛ.

³² Seen naani nunu tun donnin be wotoro nunu yiri pɛnpɛrɛninw jukɔrɔla la. Seen lakisi tun tugunin be kadiri la. Seen nunu jaɲa tun sera santimɛtɛrɛ bi wolonwula ni duuru ma.

³³ U tun dilannin be i n'a fɔ kɛlɛkɛwotoro seen. Lakisiw tun b'u la, ni zantiw ani ɛrɛyɔnw ni mayow. O bɛɛ tun ye zira ye.

³⁴ Fɛɛn naani minw tun be nɔnkɔn kelen kelen bɛɛ la, k'u minɛ ka lɔ, olu tun nɔrɔnin be wotoro nunu kadiriw la.

³⁵ A tun ye masirifɛn dɔ kɛ wotoro nunu kelen kelen bɛɛ sanfɛ. O fɛɛn nin boɲa tun te se mɛtɛrɛ tilancɛ ma k'a lamini a daa la. Wotoro nunu sanfɛlaw la fana, bolo minɛyɔrɔ tun be yen, ani fɛɛn pɛnpɛrɛnin dɔ. O ni wotoro nin tɔɔ bɛɛ tun dilanna ɲɔgɔn fɛ.

³⁶ A ye serubɛn jaaw, ni jara ani tamarofuraburu jaaw ɲɛgɛn wotoro nunu faan pɛnpɛrɛninw na, foyi tun te yɔrɔ minw na, ka masirifɛn dɔw kɛ k'u lamini.

³⁷ Wotoro tan nunu dilancogo tun ye kelen ye, u bɛɛ tun dilanna ka kɛ ɲɔgɔn na, u bɛɛ tun ye kelen ye, u boɲa tun ye kelen ye.

³⁸ O kɔ, a ye daga deen tan dilan ni zira ye. Litiri waa kelen ni kɛmɛ wɔɔrɔ (1 600) ɲɔgɔn tun b'u kelen kelen bɛɛ fa. U kelen kelen bɛɛ jaɲa tun ye mɛtɛrɛ fila ye. U kelen kelen bɛɛ tun siginin be wotoro kelen kelen kan.

³⁹ A ye wotoro duuru bila soo nin kɔnɔ kinibolo faan fɛ, ka duuru bila numanbolo faan fɛ. A ye tasaba nin bila kinibolo faan fɛ ka taga kɔrɔn ni worodugu ɲafan na.

⁴⁰ A ye dagaw ni pɛluw dilan, ani jifilenw. Masacɛ Solomani tun ye baara min bɛɛ di Uramu ma k'a k'o kɛ Masaba ka soo kɔnɔ, a tilara o la ten.

⁴¹ A ye tutunan fila ni kunnafɛn kurunin deen fila dilan. A ye masirifɛn fila kɛ kunnafɛn nunu kan k'o masiri.

⁴² A fana ye gerenadiyiriden jaa kɛmɛ naani dilan. U tun be masirifɛn fila nunu na, minw tun kɛra tutunan kunnafɛn nunu na,

⁴³ ni wotoro tan, ni daga deen tan, olu lanin tun be wotoro nunu kan,

⁴⁴ ni tasaba, ni tura jaa tan ni fila minw b'a jukɔrɔ,

⁴⁵ ni dagaw, ani pɛluw, ni jifilenw. Masacɛ Solomani y'a kɛ Uramu y'o minan minw bɛɛ dilan Masaba ka soo kama, u bɛɛ tun dilanna ni zira ye k'a jɔsi.

⁴⁶ Masacɛ y'a kɛ a ye minan nunu dilan Zurudɛn baji kɛnɛ la. U y'u yelen bɔgɔmana kɔnɔ Sukɔti ni Saritan duguw cɛ.

⁴⁷ Solomani ye minan nunu bɛɛ bila u bilayɔrɔw la ten. A ma se ka zira nunu gwiliya jati tugu, bari u tun ka ca haali.

⁴⁸ Solomani ye minan wɛrɛw fana dilan Masaba ka soo kama. A ye sarakabɔyɔrɔ dilan ni sanu ye. Buru minw be di Masaba ma, olu be to ka bila tabali min kan, ale fana tun dilanna ni sanu ye.

⁴⁹ A tun ye fitinɛ bilafɛnw deen tan dilan ni sanu yɛrɛ yɛrɛ ye, ka duuru bila kinibolo fɛ ka duuru bila numanbolo fɛ, boon saniyanin nin ɲafɛ, fitinɛw, kuruyɔrɔ be minw na i ko feerenw, ni fitinɛ daa bɔfɛnw, ka olu dilan ni sanu ye.

⁵⁰ A fana ye dagaw ni fitinɛ juru tigɛminanw, ani jifilenw, ni filenw ani wusulandagaw dilan ni sanu yɛrɛ yɛrɛ ye. A ye Yɔrɔ Senumanw ka Senuman dalakonw minɛyɔrɔw dilan ni sanu ye ka Alabatoso taw fana kɛ ten.

⁵¹ Masacɛ Solomani tilara Masaba ka soo baara bɛɛ la tuma min na, a facɛ Dawuda tun ye warigwɛ ni sanu, ani minan minw di Masaba ma, a ye olu ta ka taga u bila Masaba ka soo nafolo marayɔrɔ la.