Mas fɔlɔ 4 - ALA KA KUMA

Solomani ka ɲamɔgɔw

¹ Isirayɛlidenw bɛɛ ka masacɛ tun ye Solomani ye.

² Kuntigi minw tun be baara kɛ a ye, olu filɛ: Sadɔki dencɛ Azariyawu tun ye sarakalasebaga ye,

³ ani Sisa dencɛw Eliyorɛfu ni Aya, olu tun ye sɛbɛnnikɛlaw ye, Ayiludi dencɛ Yosafati, tun be sɛbɛko kunna.

⁴ Yoyada dencɛ Benayawu tun ye kɛlɛkuntigi ye, Sadɔki ni Abiyatari tun ye sarakalasebagaw ye.

⁵ Natan dencɛ Azariyawu tun ye lasigidenw ɲamɔgɔ ye, Natan dencɛ Zabudi le tun ye sarakalasebaga ye, ni masacɛ ladibaga.

⁶ Ayisari tun ye masacɛ ka soo kɔnɔ baarakɛlaw kuntigi ye, Abuda dencɛ Adoniramu tun be fasobaara kunna.

⁷ Lasigiden tan ni fila le tun be Solomani fɛ minw tun siginin be Isirayɛlidenw bɛɛ kunna. Olu kelen kelen bɛɛ tun be to ka janto masacɛ n'a ka somɔgɔw la, kalo kelen saan kelen kɔnɔ.

⁸ Olu tɔgɔw filɛ nin ye: Huri dencɛ tun be Efarayimu mara kuluyɔrɔ kunna.

⁹ Dɛkɛri dencɛ tun be Makasi ni Salibimu ani Bɛtisɛmɛsi, ni Elɔnbɛtanan kunna.

¹⁰ Ɛzɛdi dencɛ tun be Arubɔti, Soko ni Efɛri mara bɛɛ kunna.

¹¹ Abinadabu dencɛ tun be Dɔri mara kuluyɔrɔw bɛɛ kunna. Solomani denmuso Tafati le tun furunin be ale fɛ.

¹² Tanaki ni Megido, ani Bɛtiseyan mara bɛɛ min be Saritan gɛrɛfɛ, Zizireyɛli jukɔrɔ, k'a ta Bɛtiseyan ma, fɔɔ Abɛlimeyola, ani Yɔkimeyamu, o tun ye Ayiludi dencɛ Baana ta ye.

¹³ Gebɛri dencɛ tun be Aramɔti kunna Galaadi mara la. Manase dencɛ Yayiri ka dugudennin minw tun be Galaadi mara la, olu fana kɛr'a ta ye, ani Arigɔbu ta min be *Basan mara la, n'a dugubaba bi wɔɔrɔ, minw laminina ni kogo ye ka sɔgɔnan ziralamanw don u dondaw la.

¹⁴ Ido dencɛ Ayinadabu tun be Maanayimu kunna.

¹⁵ Ayimasi tun be Nɛfutali kunna. Ale tun ye Solomani denmuso Basimati furu.

¹⁶ Usayi dencɛ Baana tun be Asɛri mara ni Beyalɔti kunna.

¹⁷ Paruwa dencɛ Yewosafati tun be Isakari mara kunna.

¹⁸ Ela dencɛ Simeyi tun be Bɛnzamɛn mara kunna.

¹⁹ Uri dencɛ Gebɛri tun be Galaadi mara kunna. Amoriw ka masacɛ Siŋɔn ka mara, ni Basan ka masacɛ Ɔgi ta tun ye ale ta ye. Lasigiden kelen le tun be o jamana kunna.

²⁰ Zuda mara ni Isirayɛli mara mɔgɔw tun ka ca i n'a fɔ kɔgɔjida la cɛncɛn. U tun be dumuni kɛ ka minni kɛ, ani ka nisɔndiya.