Mas fɔlɔ 3 - ALA KA KUMA

Solomani be Ezipiti masacɛ denmuso furu

¹ Solomani bɛnna ni Ezipiti masacɛ ye furu sababu la. A y'a denmuso furu, k'a ta ka taga n'a ye Dawuda ka ciin kɔnɔ, k'a to o yɔrɔ la fɔɔ a y'a yɛrɛ ka soo lɔ ka ban tuma min na, ani Masaba ta, ni Zeruzalɛmu dugu laminikogo.

² Jama tun be to k'u ka sarakaw bɔ sɔnnikɛyɔrɔw la, bari fɔɔ ka na se o waati ma, soo tun ma lɔ Masaba tɔgɔ la fɔlɔ.

³ Masaba koo tun ka di Solomani ye. O la, a tun be tugu a faa Dawuda ka fɔtaw kɔ k'o kɛ. Nga a tun be to ka sarakaw bɔ ka wusulan jɛni sɔnnikɛyɔrɔw la.

Solomani be hakilitigiya ɲini Ala fɛ

⁴ Masacɛ Solomani wilila ka taga Gabaŋɔn janko ka saraka bɔ o yɔrɔ la, bari sɔnnikɛyɔrɔw la belebele tun be yen. A ye begɛn caaman kɛ saraka jɛnita ye o yɔrɔ la.

⁵ Ka Solomani to Gabaŋɔn, Masaba y'a yɛrɛ yira a la ka kuma a fɛ siko la sufɛ. A y'a fɔ a ye ko: «I be fɛɛn min fɛ, o daali, ne bena o d'i ma.»

⁶ Solomani y'a fɔ a ye ko: «I makarila ne facɛ Dawuda la kosɔbɛ, min tun y'i ka baarakɛla ye. Bari a taamana i ɲakɔrɔ tilenninya, ni ɲumanya la. I makaril'a la, ka dencɛ d'a ma, min sigir'a ka masasigilan kan bii.

⁷ Masaba ne ka Ala, i y'a kɛ i ka baarakɛla sigir'a facɛ Dawuda nɔɔ na masaya la. Ne do ye denmisɛn ye, n t'a ɲaa lɔn.

⁸ I ka baarakɛla b'i ka jama cɛma i ye min woloma. Jama nin ka ca haali, a te se ka jati, a daa fana te se ka lɔn.

⁹ O la, i ka hakilitigiya d'i ka baarakɛla ma janko a ka se k'i ka jama nin mara, ani ka koɲuman ni kojugu lɔn k'o bɔ ɲɔgɔn na. Bari jɔn le be se k'i ka jama mara, nin jamaba nin?»

¹⁰ Solomani ye daalili min kɛ, o diyara Matigi ye.

¹¹ O la, a y'a fɔ a ye ko: «I ma sijan daali, walima nafolo, walima i juguw ka saya. I ye hakilitigiya le daali, janko i ka se ka ne ka jama mara tilenninya la minkɛ,

¹² ne bena i ka ɲinita le kɛ i ye. N be hakilitigiya d'i ma, fɔɔ i ɲɔgɔn ma sɔrɔ ka ye, a fana tena sɔrɔ abada.

¹³ Ka fara o kan, i ma fɛɛn min daali, n b'o fana d'i ma: nafolo, ni boɲa, fɔɔ i ɲɔgɔn masacɛ tena sɔrɔ i sii bɛɛ la.

¹⁴ N'i fana ye n ka sira taama, ka n ka sariya bato, ani ne ka ɲinita, i n'a fɔ i facɛ Dawuda y'a kɛ cogo min na, ne bena i sii jaɲa.»

¹⁵ Ayiwa, Solomani kununna. A ye siko min kɛ, o le ye nin ye. O kɔ, a kɔsegira Zeruzalɛmu, ka taga lɔ Masaba ka layidu taamasiɲɛ kɛsu ɲafɛ. A ye saraka jɛnitaw ni jɛnɲɔgɔnya sarakaw bɔ yen, ka ɲanagwɛ sigi a ka dakɔrɔsigiw bɛɛ ye.

Solomani be kiti tigɛ

¹⁶ Loon dɔ, kakalamuso fila nana masacɛ fɛ, ka lɔ a ɲakɔrɔ.

¹⁷ Muso nunu kelen ko: «Matigi, hakɛ to. Ne ni muso nin, an be boon kelen kɔnɔ. Ne jigir'a ɲana soo nin kɔnɔ.

¹⁸ A tile sabanan loon, muso nin fana jigira. An dama tun be la soo nin kɔnɔ, mɔgɔ si te n'an ye soo nin kɔnɔ, n'an mɔgɔ fila tɛ.

¹⁹ Muso nin lar'a deen kan k'a faga sufɛ.

²⁰ A wilila dugutilama dɔrɔn, o y'a sɔrɔ ne, i ka baaraden, be sinɔgɔra, ka ne deen ta n gɛrɛfɛ, ka ta'a la a gɛrɛfɛ, k'a deen suu ta ka na o la ne gɛrɛfɛ.

²¹ Sɔgɔma, ne tun b'a fɛ ka siin di n deen ma, n wilila k'a ta k'a ye suu lo. N y'a filɛ ka ɲa kosɔbɛ, k'a ye ko ne deen tɛ.»

²² Muso dɔ nin y'a fɔ ko: «Tiɲɛ tɛ! Ne deen le be nii na, i ta le sara!» Nga min kɔnna ka kuma, ale y'a fɔ ko tiɲɛ tɛ fana, ko a deen le sara, ko ale ta le ye deen nin ye min be nii na. Muso nunu tora ka ɲɔgɔn sɔsɔ ten masacɛ ɲana.

²³ O la, masacɛ y'a fɔ u ye ko: «Ele ko i ta le be nii na, dɔ nin ta le sara. Ale ko yan tɛ, e ta le sara, ko ale ta le be nii na.

²⁴ Ayiwa, aw ye na murujan di ne ma.» U nana n'a ye.

²⁵ A y'a fɔ ko u ka deen nin cɛtigɛ fila, ka kelen di muso dɔ nin ma ka kelen di tɔ kelen nin fana ma.

²⁶ Deen ɲanaman nin bamuso y'a fɔ masacɛ ye ko: «Matigi, sabali! Deen di muso nin ma. Kan'a faga!» Bari deen nin hinɛ tun donn'a la. Nga muso dɔ nin y'a fɔ ko: «Ayi, aw k'a tigɛ, a tena kɛ ne ta ye, a fana tena kɛ ale ta ye.»

²⁷ O la, masacɛ y'a fɔ ko u kana deen nin faga, k'u k'a di muso dɔ nin ma, min kɔnna ka kuma, ko ale lo ye deen nin bamuso ye.

²⁸ Isirayɛlidenw bɛɛ y'o kitiko mɛn tuma min na, a tun ye min tigɛ, u sirann'a ɲa, bari u y'a ye ko a ka lɔnniya tun bɔra Ala fɛ n'a be se ka jama mara tilenninya la.