Mas fɔlɔ 15 - ALA KA KUMA

Zuda mara masacɛ Abiyamu ka koo

¹ Nebati dencɛ Zerobowamu ka masaya saan tan ni seeginan na, Abiyamu kɛra masacɛ ye Zuda mara kunna.

² A ye saan saba kɛ masaya la Zeruzalɛmu. A bamuso tɔgɔ tun ko Maaka, ale tun ye Abisalɔn denmuso ye.

³ A fana wilila k'a faa ka kojugu ɲɔgɔn bɛɛ kɛ. A jigi tun te Masaba a ka Ala kan i n'a fɔ a bɛma Dawuda.

⁴ O bɛɛ n'a ta, Dawuda kosɔn, Masaba, Dawuda ka Ala y'a deen dɔ to a nɔɔ na masaya la Zeruzalɛmu kunna janko a ka to masaduguya la.

⁵ Bari Dawuda tun ye koɲuman kɛ Masaba ɲakɔrɔ. A m'a ka sariya si cɛn a sii bɛɛ kɔnɔ, fɔɔ iticɛ Uri ka koo nin dama.

⁶ Kɛlɛ tun be Orobowamu ni Zerobowamu cɛ a sii bɛɛ la.

⁷ Abiyamu ka kɛwali tɔw, n'a ka baara bɛɛ, o be sɔrɔ Zuda mara masaw ka loon o loon kibaru sɛbɛ kɔnɔ. Kɛlɛ tun be ale ni Zerobowamu cɛ.

⁸ O kɔ, Abiyamu sara, u y'a suu don Dawuda ka ciin na. A dencɛ Aza sigir'a nɔɔ na masaya la.

Zuda mara masacɛ Aza ka koo

⁹ Isirayɛli mara masacɛ Zerobowamu ka masaya saan mugannan na, Aza kɛra masacɛ ye Zuda mara kunna.

¹⁰ A ye saan bi naani ni kelen kɛ masaya la Zeruzalɛmu. A mamamuso tɔgɔ tun ko Maaka, Abisalɔn denmuso tun lo.

¹¹ Aza ye koɲuman kɛ Masaba ɲakɔrɔ i n'a fɔ a bɛma Dawuda.

¹² A ye landa kakalayakɛbagaw gwɛn ka bɔ jamana kɔnɔ. A faaw tun ye joo minw dilan, a y'u bɛɛ cɛn ka bɔ yen.

¹³ Masacɛ bamuso tun ka kan ni boɲa min ye, a yɛrɛ y'o bali a mamamuso Maaka ye. Bari, ale tun ye *Asera jaa dilan, min ma ɲi fewu. Aza ye joo nin tigɛ ka ta'a jɛni Sedirɔn kɔɔ daa la.

¹⁴ Nga a ma se ka sɔnnikɛyɔrɔ nunu tunu. O bɛɛ n'a ta, Aza y'a jigi bɛɛ la Masaba kan a sii bɛɛ la.

¹⁵ A n'a facɛ tun ye sanu ni warigwɛ, ani minan minw di Masaba ma, a donna n'o ye Masaba ka soo kɔnɔ.

¹⁶ Kɛlɛ tun be Aza ni Isirayɛli mara masacɛ Bayesa cɛ u sii bɛɛ la.

¹⁷ Isirayɛli mara masacɛ Bayesa wilila ka taga Zuda mara kama. A ye Arama dugu kɛ dugu barikaman ye janko a ka se ka Zuda mara masacɛ Aza ka mɔgɔw bali u kana bɔ.

¹⁸ O la, warigwɛ ni sanu minw tɔɔ tun tora Masaba ka soo nafolo marayɔrɔ la, ani ale masacɛ ka soo ta, Aza wilila k'o ta k'o kalifa a ka dakɔrɔsigiw ma, k'u ka taga o di Siri masacɛ, Ɛziyɔn deen Tabirimɔn dencɛ Bɛnadadi ma. Ale tun siginin be Damasi kunna. A ko u k'a fɔ a ye ko:

¹⁹ «A to an ka bɛɛn i n'a fɔ an faaw tun bɛnnin lo cogo min na. Ne b'i boɲa ka warigwɛ ni sanu nin ci e ma. Bɛɛn min be e ni Isirayɛli mara masacɛ Bayesa cɛ, o bɛɛn nin cɛn, janko a be ne to ɲasuma na.»

²⁰ Bɛnadadi ye mɛnni kɛ masacɛ Aza fɛ. A y'a ka kɛlɛkuntigiw ci k'u ka taga Isirayɛli mara duguw kɛlɛ. U ye Iyɔn dugu, ni Dan ani Abɛlibɛtimaaka kɛlɛ ka se u kɔrɔ, ani Kinerɛti mara bɛɛ, ni Nɛfutali mara tɔɔ bɛɛ.

²¹ Bayesa y'o mɛn tuma min na, a ye Arama dugu nin lɔko dabila, ka na to Tirisa.

²² Masacɛ Aza ye Zuda mara mɔgɔw bɛɛ wele, a ma mɔgɔ si to. Bayesa tun be kabakuru ni lɔgɔ minw kɛ ka Arama dugu lɔ, u tagara o bɛɛ ta ka taga n'a ye. Masacɛ Aza y'o le kɛ ka Geba dugu lɔ Bɛnzamɛn mara la, ani Misipa.

²³ Aza ka kɛwali tɔw, n'a ka cɛfariyakow, n'a ka baara bɛɛ, n'a ye dugu minw sigi, o be sɔrɔ Zuda mara masaw ka loon o loon kibaru sɛbɛ kɔnɔ. Nga, a kɔrɔla tuma min na, a seen tun cɛnna.

²⁴ Aza sara, u y'a suu don a faaw ka kaburu kɔnɔ a bɛma Dawuda ka ciin kɔnɔ. O kɔ, a deen Zozafati sigir'a nɔɔ na masaya la.

Isirayɛli mara masacɛ Nadabu ka koo

²⁵ Zuda mara masacɛ Aza ka masaya saan filanan na, Zerobowamu dencɛ Nadabu sigira masaya la Isirayɛli mara kunna. A ye saan fila kɛ o masaya la.

²⁶ A ye kojugu kɛ Masaba ɲakɔrɔ. A tugur'a facɛ kɔ, k'a ka kojugu ɲɔgɔn kɛ, a tun kɛra sababu ye ka Isirayɛlidenw bila min na.

²⁷ Isakari kɔmɔgɔ Aya dencɛ Bayesa wilila ka bɛɛn ni mɔgɔ dɔw ye k'a faga Gibetɔn, min tun ye filisiw ka dugu dɔ ye. O y'a sɔrɔ Nadabu ni Isirayɛli mara kɛlɛdenw bɛɛ tun tagara Gibetɔn datugu.

²⁸ Bayesa y'a faga Zuda mara masacɛ Aza ka masaya saan sabanan na, ka sigi a nɔɔ na.

²⁹ A sigira tuma min na masaya la, a ye Zerobowamu ka somɔgɔw bɛɛ halaki, a yɛrɛ ma mɔgɔ kelen to. Fɛɛn o fɛɛn tun ye niman ye soo nin kɔnɔ, a y'o bɛɛ halaki, ka kɛɲɛ ni Masaba ka fɔta ye. A tun ye min fɔ a ka baaraden Aya barika la ka bɔ Silo.

³⁰ O kɛra Zerobowamu ka hakɛw kosɔn. A ye minw kɛ ani ka Isirayɛlidenw fana don minw la. O le y'a to Masaba, Isirayɛli ka Ala dimina.

³¹ Nadabu ka kɛwali tɔw, n'a ka baara bɛɛ, o be sɔrɔ Isirayɛli mara masaw ka loon o loon kibaru sɛbɛ kɔnɔ.

³² Kɛlɛ tun be Aza ni Isirayɛli mara masacɛ Bayesa cɛ u sii bɛɛ la.

Isirayɛli mara masacɛ Bayesa ka koo

³³ Zuda mara masacɛ Aza ka masaya saan sabanan na, Aya dencɛ Bayesa kɛra masacɛ ye Isirayɛli mara bɛɛ kunna. A tun sigira Tirisa. A ye saan mugan ni naani kɛ masaya la.

³⁴ A ye kojugu kɛ Masaba ɲakɔrɔ: a tugura Zerobowamu kɔ, Zerobowamu tun ye Isirayɛlidenw bila kojugu minw na, a y'o ɲɔgɔn kɛ fana.