Zan fɔlɔ 5 - ALA KA KUMA

An sera diɲɛ kɔrɔ

¹ Ni mɔgɔ o mɔgɔ lar'a la ko Yezu le ye Ala ka mɔgɔ wolomanin ye, o tigi ye Ala deen ye. Mɔgɔ o mɔgɔ be denfa kanu, o tigi b'a deen fana kanu.

² N'an be Ala kanu k'a ka ciiw bato, o tuma na, an b'a lɔn ko an b'a deenw kanu.

³ K'a fɔ ko Ala koo ka d'i ye, o be bɔ a ka ciiw batocogo la. A ka ciiw batoli fana man gwɛlɛ,

⁴ bari mɔgɔ min ye Ala deen ye ka ban, o tigi sera diɲɛ kɔrɔ. Lanaya min b'an na, o le b'a to an be se diɲɛ kɔrɔ.

⁵ Mɔgɔ min lanin b'a la ko Yezu ye Ala Dencɛ ye, o tigi le sera diɲɛ kɔrɔ.

Ala ye Yezu seere ye

⁶ Yezu Krista nana jii ni joli barika la. A batizera, a joli bɔnna. A ma kɛ i n'a fɔ a batizera dɔrɔn. A batizera, a fana sara. Ayiwa, Nii Senuman le b'o tiɲɛ yira an na, bari ale ye tiɲɛtigi ye.

⁷ Seere saba le b'o tiɲɛ nin yira:

⁸ Nii Senuman, jii ani joli. O seere nunu be fɛɛn kelen le fɔ.

⁹ N'an be sɔn adamaden ka seereya ma, Ala ka seereya ka fisa ni adamaden ta ye. Ala y'a yira an na ko ale y'a Deen seere ye.

¹⁰ Ni mɔgɔ min lara Ala Dencɛ la, Ala ye seereya min kɛ a ka koo la, o tigi b'o seereya nin mara a dusu la. Nga ni min ma la Ala la, o tigi ye Ala kɛ galontigɛla ye. Bari Ala ye seereya min kɛ a Dencɛ ka koo la, o tigi ma la o la.

¹¹ O seereya nin filɛ: ko Ala ye nii banbali d'an ma, min be sɔrɔ a Dencɛ sababu la.

¹² Ala Dencɛ be mɔgɔ min fɛ, o tigi ben'o hɛrɛ nin ye. Nga ni Ala Dencɛ te mɔgɔ min fɛ, o tigi te n'a ye.

Ala daali kojugukɛlaw ye

¹³ N ye nin sɛbɛn k'a ci aw ma, aw minw lanin be Ala Dencɛ la, waasa aw k'a lɔn ko nii banbali y'aw ta ye.

¹⁴ Ayiwa, n'an ye fɛɛn o fɛɛn daali Ala fɛ, n'o kɛra a sago ye, an jigi b'a la ko a be mɛnni kɛ an fɛ.

¹⁵ An lanin b'a la ko Ala b'an ka daalili lamɛn, an lanin b'a la fana ko an ye fɛɛn min daali, ko an y'o sɔrɔ ka ban.

¹⁶ Ayiwa, hakɛ min te mɔgɔ faga, ni dɔ y'a ye ko a balima dɔ y'o kɛ, a ka Ala daali o tigi nin ye. Ala ben'a kisi o saya nin ma, n'o y'a sɔrɔ n'o hakɛ nin t'a faga. Hakɛ kelen le be yen min be mɔgɔ faga, n m'a fɔ ko aw ka daalili kɛ o kɛbagaw ye dɛ!

¹⁷ Tilenbaliyako bɛɛ ye hakɛ ye. Nga hakɛw bɛɛ te na ni saya ye.

¹⁸ An b'a lɔn ko mɔgɔ o mɔgɔ ye Ala deen ye, o tigi te to hakɛ la, bari Ala Deen b'a tanga. Sutana fanga te se a kɔrɔ.

¹⁹ Anw y'a lɔn ko anw ye Ala deenw ye. Nga diɲɛ kɔnɔ fɛɛn tɔw bɛɛ be Sutana sago kɔrɔ.

²⁰ Anw y'a lɔn fana ko Ala Dencɛ nana diɲɛ na ka hakili d'an ma waasa an ka Tiɲɛtigi lɔn, ale min ye Ala ye. Anw ni Ala yɛrɛ be ɲɔgɔn fɛ a Dencɛ Yezu Krista barika la, ale lo ye Ala ye tigitigi min be nii banbali di.

²¹ Ne deenw, aw k'aw yɛrɛ kɔlɔsi joko ma.