Kor fɔlɔ 5 - ALA KA KUMA

Kojugu min kɛra Krista ka jama cɛma

¹ A be fɔra yɔrɔ bɛɛ ko kakalaya dɔ kɛra aw cɛma, o min ɲɔgɔn te sɔrɔ Alalɔnbaliw yɛrɛ fɛ. Mɔgɔ dɔ b'aw cɛma min y'a facɛ ka muso bɔsi.

² Aw do b'aw yɛrɛ boɲa! Aw dusu ma kasi o koo la, ka se k'o koo kɛbaga nin gwɛn ka bɔ aw cɛma kɛ?

³ Ne kɔni fɛ, ne t'aw cɛma yen, nga ne be n'aw ye miiriya la, ne y'o kojugukɛla nin jalaki ka ban i n'a fɔ n b'o yɔrɔ la.

⁴ N'an ka miiriya nana kɛ kelen ye n'aw mana ɲɔgɔn lajɛn an Matigi Yezu Krista tɔgɔ kosɔn, an'a ka sebagaya barika la,

⁵ o mɔgɔ sugu nin ka kan ka bila gɛrɛfɛ Sutana ye, waasa a ka halaki, a nii ka se ka kisi Matigi kɔsegilon na.

⁶ Aw ka yɛrɛboɲako ma kɛ a ɲanaman ye! Aw m'a lɔn ko burufununan fitini be se ka mugu caaman funu wa?

⁷ Aw kɛra mɔgɔɲumanw ye minkɛ, aw k'o kojugu nin bɔ aw cɛma, waasa aw ka kɛ mɔgɔɲumanw yɛrɛ yɛrɛ ye, bari Krista min kɛra saraka ye k'an hɔrɔnya, ale fagara o kosɔn.

⁸ O tuma na, an k'an ka ɲanagwɛ kɛ ni buru ye, fununan te min na, o kɔrɔ, juguya ni mɔgɔkolonya kana kɛ aw cɛma, nga aw k'o kɛ ni kɔnɔgwɛ ani tilenninya ye.

⁹ Ne y'a fɔ aw ye n ka bataki kɔnɔ ko aw kana jɛn ni kakalaw ye.

¹⁰ Ne kaan te diɲɛ kakalaw ma, walima sɔnjuguw, walima soonw, walima josɔnlaw ma dɛ, bari o te se ka kɛ n'aw ma bɔ diɲɛ na.

¹¹ Ne ye min fɔ aw ye bataki nin kɔnɔ, o ye nin ye, ko: ni mɔgɔ min b'a yɛrɛ kɛ aw dɔ ye, k'a sɔrɔ o tigi ye kakala ye, sɔnjugu, josɔnla, walima mɔgɔ tɔgɔcɛnbaga, walima dɔrɔtɔ, ani soon ye, aw kana jɛn n'o tigi ye fewu, hali ka dumuni yɛrɛ kɛ n'a ye.

¹² Aw ɲana, ne ka kan ka mɔgɔ wɛrɛw le jalaki wa? Aw m'a lɔn ko aw ka kan k'an ka mɔgɔw le jalaki wa?

¹³ Ala yɛrɛ le bena mɔgɔ wɛrɛw kiti. «Aw ka mɔgɔjuguw bɔ aw cɛma,» i ko a fɔra Ala ka kuma na cogo min na.