Kor fɔlɔ 3 - ALA KA KUMA

Pɔli be Korɛntikaw jalaki

¹ N balimaw, ne tun ma se ka kuma aw fɛ i n'a fɔ mɔgɔ minw tagara ɲa Krista ka koo la, nga n kumana aw fɛ i ko mɔgɔ minw ma taga ɲa kosɔbɛ, ani i n'a fɔ denmisɛnw Krista ka koo la.

² O la, ne ma dumuni gwiliman d'aw ma, fɔɔ nɔnɔ, bari aw tun te se ka dumuni gwiliman dumu fɔlɔ, halibi aw te se fana.

³ Ni keliya ni kɛlɛ b'aw cɛma, aw k'a lɔn ko halibi adamadenya b'aw la, aw ni mɔgɔ tɔw bɛɛ ye kelen ye.

⁴ N'aw dɔ y'a fɔ ko ale ye Pɔli ka kalanden ye, ani dɔ fana ko ale ye Apolɔsi ta ye, o te adamadenya ye wa?

Ala ka baarakɛla ka koo

⁵ Apolɔsi ye jɔn ye, ani Pɔli ye jɔn ye? Baarakɛlaw dama lo, minw sababu la aw sɔnna Matigi ma. U kelen kelen bɛɛ y'u ka baara kɛ, Matigi ye min d'u ma.

⁶ Ne ye tutuli kɛ, Apolɔsi y'o sɔn jii la, Ala le kɛra sababu ye u boɲana.

⁷ A kɛra ten, mɔgɔ min ye tutuli kɛ, ale te foyi ye, ani min b'u sɔn jii la, ale fana te foyi ye. Ala kelenpe le be kɛ sababu ye u be boɲa. Ale lo be jati.

⁸ Mɔgɔ min be tutuli kɛ ani min be u sɔn jii la, olu bɛɛ ka kan. U kelen kelen bɛɛ bena u ka sara sɔrɔ ka kɛɲɛ n'u ka baara ye,

⁹ bari anw kɛra baarakɛɲɔgɔnw ye Ala ka baara la, aw ye Ala ka foro, n'a ka soo ye a be min lɔra.

¹⁰ Ala ka nɛɛma barika la a ye min kɛ ne ye, ne kɛra solɔlaɲuman ye, ne ye soo juu sigi, mɔgɔ dɔ wɛrɛ be lɔli kɛ a kan, nga mɔgɔ kelen kelen bɛɛ ka kan k'a ka lɔcogo kɔlɔsi,

¹¹ bari mɔgɔ si te se ka soo juu wɛrɛ sigi min be danna fɔlɔta la min ye Yezu Krista ye.

¹² Ni mɔgɔ dɔ mana lɔli kɛ o juu nin kan ni sanu, ani warigwɛ, ni kabakuru sɔngɔgwɛlɛn ye, walima lɔgɔ, ni biin, ani kalaw ye,

¹³ mɔgɔ kelen kelen bɛɛ ka baara cogoya bena lɔn laban loon na. Tasuma bena u bɛɛ cogoya yira, bari mɔgɔ kelen kelen bɛɛ ka baara bena sɛgɛsɛgɛ ni tasuma ye.

¹⁴ Ni mɔgɔ min ta ma jɛni, o tigi ben'a sara sɔrɔ.

¹⁵ Ni mɔgɔ min ta jɛnina, o tigi ten'a sara sɔrɔ, a kɔni bena kisi, i n'a fɔ mɔgɔ min bolila ka bɔ tasuma kɔnɔ.

¹⁶ Aw m'a lɔn ko aw kɛra Ala sigiyɔrɔ ye wa, ani ko Ala ka Nii siginin be aw kɔnɔ wa?

¹⁷ Ni mɔgɔ dɔ ye Ala ka sigiyɔrɔ cɛn, Ala fana bena o tigi halaki, bari Ala ka sigiyɔrɔ saniyanin lo, o sigiyɔrɔ nin ye aw ye.

¹⁸ Mɔgɔ si kan'a yɛrɛ nigɛ. Ni mɔgɔ dɔ b'aw cɛma min b'a yɛrɛ jati hakilitigi ye diɲɛ na, o tigi ka sɔn fatɔya ma fɔlɔ ka sɔrɔ ka kɛ hakilitigi ye,

¹⁹ bari diɲɛ nin hakilitigiya ye fatɔya ye Ala ɲakɔrɔ. A fɔra Ala ka kuma na ko: «A be hakilitigiw minɛ u ka cekuya la.»

²⁰ A fɔra tugu ko: «Matigi b'a lɔn ko hakilitigiw ka miiriya ye fufafu le ye.»

²¹ O la, mɔgɔ si kan'a yɛrɛ boɲa adamadenw ka koo la, bari koo bɛɛ y'aw ta ye.

²² Pɔli, Apolɔsi, ni Piyɛri, walima diɲɛko wo, ka to nii na, walima ka sa, fɛɛn minw be diɲɛ na yan bii, walima fɛɛn min be na sini wo, olu bɛɛ y'aw ta ye.

²³ Nga aw ye Krista ta ye ani Krista fana ye Ala ta ye.