Kor fɔlɔ 2 - ALA KA KUMA

Pɔli ka waajuli Korɛnti

¹ N balimaw, ne tun tagara aw fɛ tuma min na, ne ma taga Ala ka tiɲɛ dogonin koo fɔ aw ye ni kuma faamubali ye, walima ni lɔnniyakuma damatɛmɛnin ye.

² Ka ne to aw cɛma, n tun t'a fɛ aw ka fɛɛn wɛrɛ lɔn, fɔɔ Yezu Krista dama, n'a gwengwenko lɔgɔ kan.

³ Ne sera aw fɛ tuma min na, ne tun ye mɔgɔ barikatan ye, n tun siranna, ka yɛrɛyɛrɛ kosɔbɛ.

⁴ Ne ka kuma ni ne ka waajuli tun te lɔnnikɛla ka kuma ye, nga Ala ka Nii Senuman le y'a ka sebagaya yira,

⁵ janko aw jigi kana la adamaden ka lɔnniya kan, fɔɔ Ala ka sebagaya.

Lɔnniya min be bɔ Ala la

⁶ Mɔgɔ minw tagara ɲa Krista ka koo la, an kɔni be olu kalan ni lɔnniya ye. O lɔnniya nin te diɲɛ ta ye, walima nin diɲɛ kuntigiw ta, minw ye halakitaw ye.

⁷ Lɔnniya min bɔra Ala fɛ, an be mɔgɔw kalan o le la, o min tun dogonin be fɔɔ ka na se bii ma. Ala tun ye min latigɛ an ka boɲa kama kabini diɲɛ tun ma dan fɔlɔ.

⁸ Diɲɛ kuntigiw si m'o lɔn, n'u tun y'o lɔn, u tun tena sɔn ka Nɔɔrɔtigi gwengwen lɔgɔ kan.

⁹ Nga, a fɔra ten Ala ka kuma na ko: «Mɔgɔ ɲaa ma fɛɛn min ye ka ye, n'a tulo ma min mɛn ka ye, ni fɛɛn min miiriya ma don ka ye mɔgɔ kɔnɔ, Ala y'o le labɛn a kanubagaw ye.»

¹⁰ Ala y'o koo dogoninw yira an na Nii Senuman barika la, bari Nii Senuman be koo bɛɛ sɛgɛsɛgɛ kosɔbɛ fɔɔ ka taga se Ala ka koo dogoninw ma.

¹¹ Mɔgɔ jumɛn le be mɔgɔ kɔnɔnakow lɔn, n'a ma kɛ o tigi yɛrɛ ye? O cogo la fana, mɔgɔ te se ka Ala ka koo lɔn, ni Ala ka Nii Senuman tɛ.

¹² An kɔni, an ye hakili min sɔrɔ, o te diɲɛ ta ye, nga an ye Ala ka Nii lo sɔrɔ, waasa Ala ye nilifɛn minw di an ma, an ka se k'o lɔn.

¹³ An te kuma ka kɛɲɛ ni adamaden ka lɔnniya ye, an be fɛɛn min fɔra, o ye Ala ka koo ye Nii Senuman ye min yira. An b'o fɔ mɔgɔw ye Nii Senuman be min fɛ.

¹⁴ Ka adamaden to a kelen, a te se ka sɔn Ala ka Nii ta ma, o ye fatɔyako ye a ɲana, a te se k'o faamu, bari mɔgɔ be se k'o danfara bɔ Ala ka Nii barika le la.

¹⁵ Ala ka Nii be mɔgɔ min fɛ, ale be se ka koo bɛɛ faranfasi, mɔgɔ si te se k'ale jalaki,

¹⁶ bari: «Jɔn be Matigi ka miiriya lɔn, n'a be se ka hakili d'a ma?» An kɔni, Krista ka miiriya be an kɔnɔ.