Kor fɔlɔ 14 - ALA KA KUMA

Ala be seko minw di mɔgɔ ma

¹ Aw ka jija ka ɲɔgɔn kanu, Ala be seko minw di, aw k'olu ɲini fana, sanko kirayako,

² bari mɔgɔ min be kuma kaan wɛrɛ la, o tigi te kumana adamaden fɛ, nga a be kuma Ala le fɛ. Tiɲɛ na, mɔgɔ si t'o kaan nin mɛnna, a be kodogonin le fɔ Nii Senuman barika la.

³ Nga mɔgɔ min be kiraya kɛ, o tigi be kumana mɔgɔw fɛ, a be olu dɛmɛ k'u ladi ani k'u jaa gwɛlɛya.

⁴ Mɔgɔ min be kaan wɛrɛ fɔ, o tigi b'a yɛrɛ le dɛmɛna, nga min be kiraya kɛ, o tigi be Krista ka jama le dɛmɛna.

⁵ A ka di ne ye aw bɛɛ ka kaan wɛrɛw fɔ, nga mɔgɔ min be kiraya kɛ, o le ka di ne ye ka tɛmɛ. Min be kiraya kɛ, o tigi ka fisa ni kaan wɛrɛ fɔla ye, fɔɔ n'o tigi ye kuma nin kɔrɔ fɔ, waasa Krista ka jama ka se ka dɛmɛ sɔrɔ.

⁶ N balimaw, n'a kɛra ko ne tun nana aw fɛ ka kuma aw fɛ kaan wɛrɛ la, min te koo dɔ yira, n'a te lɔnniya d'aw ma, ni kirayakuma t'o la, n'a t'aw kalan fana, o bena mun le ɲa aw ye?

⁷ An ka fɔlikɛminanw ka koo filɛ, i n'a fɔ file ani gɔni. Ni olu mankan te danna danna, mɔgɔ bena se k'a faamu cogo di ko filen be nin le fɔra, walima kolonjo be nin le fɔra?

⁸ Ni buru fiyɛta ma kangwɛnin fɔ, mɔgɔ jumɛn le ben'a yɛrɛ labɛn kɛlɛ kama?

⁹ Aw fana, n'aw ka kuma ma kɛ kumagwɛnin ye, mɔgɔw ben'a kɛ cogo di k'aw ka kuma mɛn? Aw ka kuma be kɛ gwansan ye.

¹⁰ Ne y'a lɔn ko kaan caaman be diɲɛ kɔnɔ, o bɛɛ be n'u kɔrɔ ye.

¹¹ Ni mɔgɔ min be kumana ne fɛ ni ne t'ale ka kaan mɛnna, o tigi be kɛ siya wɛrɛ ye ne fɛ, ne fana be kɛ siya wɛrɛ ye o tigi fɛ.

¹² Aw kɔni, Nii Senuman be see minw di, olu nigɛ b'aw la kosɔbɛ, o ka kɛ Krista ka jama ka ɲataga kosɔn.

¹³ O le kosɔn, mɔgɔ min be kaan wɛrɛ fɔ, o tigi ka Ala daali waasa a k'o kuma nin kɔrɔ fɔli see d'a ma.

¹⁴ Ni ne be Ala daali kaan wɛrɛ la, ne dusu lo be daalili kɛ, nga ne hakili te foyi kala ma.

¹⁵ Ne ka kan ka mun le kɛ sa? Ne bena to ka daalili kɛ ni n nii ye, ka daalili kɛ ni n hakili ye fana. N bena to ka dɔnkili la ni n nii ye, ka dɔnkili la ni n hakili ye fana.

¹⁶ N'i be Ala daalila n'i nii dama ye, mɔgɔ minw siginin be k'i lamɛn, olu ben'a kɛ cogo di ka amiina fɔ i ka daalili bannin kɔ, bari e be min fɔra, ale t'o mɛnna.

¹⁷ Tiɲɛ lo, e be barika lara Ala ye sɔbɛsɔbɛ la, nga i tɔɲɔgɔn ma foyi sɔrɔ.

¹⁸ Ne be barika la Ala ye, ne be kaan wɛrɛ fɔ ka tɛmɛ aw bɛɛ kan.

¹⁹ Nga lajɛn yɔrɔ la, a ka di ne ye ka dakuru ɲaa duuru dama fɔ minw kɔrɔ lɔnnin lo mɔgɔ fɛ, sanni ne ka dakuru ɲaa waa tan fɔ kaan wɛrɛ la.

²⁰ N balimaw, aw ka miiricogo la, aw kana kɛ denmisɛnw ye tugu. Kojugu faan fɛ, ɔnhɔn, aw ka kɛ i n'a fɔ denmisɛnw, nga aw ka miiriya la, aw ka kɛ mɔgɔkɔrɔbaw ye.

²¹ A fɔra sariyasɛbɛ kɔnɔ ko: «N bena tɛmɛ siya wɛrɛw fɛ ka kuma siya nin fɛ. N bena kuma u fɛ lonanw barika la. O bɛɛ n'a ta, u tena ne lamɛn.» Matigi ko ten.

²² O la, kaan wɛrɛ fɔko kɛra taamasiɲɛ ye Alalɔnbaliw fɛ, taamasiɲɛ tɛ Krista ka mɔgɔw fɛ. Kiraya fana kɛra taamasiɲɛ ye Krista ka mɔgɔw fɛ, taamasiɲɛ tɛ mɔgɔw fɛ minw ma la Yezu la.

²³ N'a kɛra ko Krista ka jama bɛɛ ye ɲɔgɔn lajɛn, ni bɛɛ tora ka kaan wɛrɛ fɔ, ni mɔgɔ gwansan walima mɔgɔ min ma la Yezu la dɔ nana don aw cɛma, ale ten'a fɔ ko aw kɛra fatɔw ye wa?

²⁴ Nga n'a kɛra ko bɛɛ be kiraya le kɛra, o mɔgɔ min ma la Yezu la, walima mɔgɔ gwansan nin ben'a yɛrɛ cogoya lɔn, ko ale ye kojugukɛla ye.

²⁵ O tigi ka koo dogonin bena ye, fɔɔ a ben'a kunbiri gwan ka Ala bato ani k'a fɔ ko: «Tiɲɛ na, Ala be n'aw ye!»

Ala batocogo

²⁶ Ne ka mun le fɔ sa n balimaw? N'aw be lajɛnni na, ni mɔgɔ dɔ b'a fɛ ka dɔnkili la, o k'o la. Ni kalan be dɔ wɛrɛ fɛ, ale ka mɔgɔw kalan. Ni koo yirata be dɔ wɛrɛ fɛ ka bɔ Ala fɛ, o k'o fɔ. Dɔ b'a fɛ ka kuma kaan wɛrɛ la wa? O tigi k'o kɛ. Ni mɔgɔ dɔ be se k'o kɔrɔ fɔ, o tigi k'o fɔ. O koo bɛɛ ka kan ka kɛ waasa mɔgɔ bɛɛ ka taga ɲa.

²⁷ Ni mɔgɔ dɔw be kaan wɛrɛ fɔra, mɔgɔ fila k'o fɔ, walima mɔgɔ saba, o ka fisa, nga u ka kuma kelen kelen, mɔgɔ dɔ k'o kɔrɔ fɔ.

²⁸ N'o kuma kɔrɔfɔbaga te yen, o tigi ka je. A ka to ka kuma a yɛrɛ kɔnɔ Ala fɛ.

²⁹ Min kɛra kirayako ye, mɔgɔ fila, walima saba ka kirayakuma fɔ, tɔw k'o kɔrɔ sɛgɛsɛgɛ.

³⁰ Ni Ala ye fɛɛn dɔ yira mɔgɔ dɔ la, mɔgɔ min be kumana, o tigi ka je.

³¹ Aw bɛɛ be se ka kirayakuma fɔ kelen kelen ten, waasa mɔgɔ bɛɛ ka faamuli sɔrɔ ani ka jagwɛlɛya sɔrɔ.

³² Ka kira to a ka kiraya la, a be se k'a yɛrɛ minɛ.

^33-34 Bari Ala te koferekenin tigi ye, nga hɛrɛtigi lo. Muso ka kan ka je lajɛn yɔrɔw la i n'a fɔ a be kɛ Ala ka jama cɛma yɔrɔ bɛɛ la cogo min na. Sira ma d'u ma ka kuma, olu ka kan ka to yɛrɛmajigi la, i ko a fɔra Ala ka sariya la cogo min na.

³⁵ N'u b'a fɛ ka koo dɔ faamu, u ka kan k'u cɛɛw ɲininga soo kɔnɔ. N'o tɛ, a daganin te muso ka kuma Krista ka jama cɛma.

³⁶ O tuma na, Ala ka kuma sɔrɔla aw fɛ le wa? Walima aw dama le y'a sɔrɔ k'a mɛn?

³⁷ Ni mɔgɔ dɔ b'a miiri ko ale ye kira ye, walima ko a ye see dɔ sɔrɔ Nii Senuman barika la, ne be koo minw fɔra aw ye, o tigi ka sɔn o ma ko Matigi ka sariya lo.

³⁸ Ni mɔgɔ min banna o la, Ala banna o tigi la.

³⁹ O la ne balimaw, aw ka kiraya le ɲini, aw fana kana kaan wɛrɛ fɔko bali.

⁴⁰ Nga koo bɛɛ ka kan ka kɛ ka ɲa ani ka kɛɲɛ n'o kɛcogo ye.