Kor fɔlɔ 13 - ALA KA KUMA

Kanuya

¹ Hali ni ne be se ka kaan wɛrɛw fɔ, minw ye adamadenw ta ani mɛlɛkɛw taw ye, ni kanuya te ne dusu la, ne be mankan fu kɛ, ne ye gongokolon ye.

² Hali ni ne ye kiraya kɛ see sɔrɔ, ka kodogoninw, ni fɛɛn bɛɛ lɔnniya sɔrɔ, hali ni ne lara Ala la kosɔbɛ, fɔɔ ka se ka kuluw wili k'u bɔ u lɔyɔrɔ la, ni kanuya te ne dusu la, o bɛɛ ye gwansan ye.

³ Hali ni ne ye n bololafɛnw bɛɛ di k'o kɛ fantanw ka dumuni ye, hali ni ne sɔnna u ka ne jɛni yɛrɛ, ni kanuya te ne dusu la, o tena foyi ɲa ne ye.

⁴ Kanuya be mɔgɔ min dusu la, o tigi be muɲuli kɛ, a be koɲuman kɛ, keliya t'a dusu la. A t'a yɛrɛ yira, a t'a yɛrɛ boɲa fana.

⁵ A te malobaliyako kɛ, a t'a yɛrɛ dama nafa ɲini, a dusu te bɔ, a te dimi mara.

⁶ A te nisɔndiya tilenbaliyako la, a be nisɔndiya tiɲɛko le la.

⁷ A be koo bɛɛ yafa, a be la bɛɛ la, a be la koo bɛɛ la, a be koo bɛɛ muɲu.

⁸ Daan te kanuya la. Kiraya bena ban, kaan wɛrɛ fɔ bena dabila, lɔnniya fana bena ban.

⁹ Bari daan b'an ka lɔnniya la, daan b'an ka kiraya fana na.

¹⁰ Nga ni fɛɛn dafanin mana na tuma min na, fɛɛn dafabali bena ban.

¹¹ Ne tun ye denmisɛn ye tuma min na, n tun be kuma i n'a fɔ denmisɛn, ka miiri i n'a fɔ denmisɛn, ka koo faamu i n'a fɔ denmisɛn. N ɲana tigɛra tuma min na, n ye denmisɛnya dabila.

¹² Sisan an be koo minw yera, a kɛra i n'a fɔ an b'u yera dubalen na le, u te ye ka ɲa. Nga an bena u ye ɲaa ni ɲaa. Sisan, daan be ne ka lɔnniya la, nga ne bena koo lɔn i n'a fɔ Ala be ne lɔn cogo min na.

¹³ Sisan fɛɛn saba nunu le be yen: lanaya, jigi, ani kanuya, nga o fɛɛn saba nunu na, kanuya le be ɲafɛ.