Kor fɔlɔ 10 - ALA KA KUMA

Ladili min be bɔ Isirayɛli ka koo la

¹ N balimaw, ne t'a fɛ aw ka to koo nin lɔnbaliya la. Sankaba y'an faaw bila sira, u bɛɛ sera ka tɛmɛ Kɔgɔjiwulen na.

² U bɛɛ jɛnna ni Musa ye ka tɛmɛ kɔgɔji kɔnɔ a ka dɛmɛ fɛ.

³ U bɛɛ fana ye dumuni kelen sɔrɔ ka bɔ Ala fɛ k'o dumu.

⁴ U bɛɛ fana ye jii sɔrɔ ka bɔ Ala fɛ, k'o min, u y'o sɔrɔ ka bɔ kabakuru la min bɔra Ala fɛ, min tun be tugura u kɔ, ale tun ye Krista ye.

⁵ Nga u caaman ka koo ma se ka diya Ala ye, o la, u sara kongokolon kɔnɔ.

⁶ O koo nunu kɛra ka yira an na, waasa an fana kana miiri kojugu kɛli la tugu, i n'a fɔ olu.

⁷ Aw kana kɛ josɔnlaw ye i n'a fɔ u dɔw y'a kɛ cogo min na. A fɔra ten Ala ka kuma na ko: «Jama sigira ka dumuni kɛ ani ka minni kɛ, ka sɔrɔ ka wili ka ɲanagwɛ.»

⁸ An kana kɛ kakalaw ye, i n'a fɔ u dɔw tun y'a kɛ cogo min na. O la, loon kelen pewu, mɔgɔ waa mugan ni saba (23 000) sara u cɛma.

⁹ An kana Matigi kɔrɔbɔ, i n'a fɔ u dɔw y'a kɛ cogo min na, saaw y'u faga.

¹⁰ Aw kana ŋunuŋunu fana, i n'a fɔ u dɔw ŋunuŋununa cogo min na, ni halakilikɛfɛn y'u faga.

¹¹ O koo nunu sera u ma, waasa ka koo dɔ ɲaa yira, ani u sɛbɛnna waasa k'an kalan, an minw be waati laban na.

¹² O la, ni mɔgɔ min be miiri ko ale lɔnin b'a seen kan, o tigi k'a yɛrɛ kɔlɔsi a kana ben!

¹³ Kɔrɔbɔli minw y'aw sɔrɔ, o bɛɛ ɲɔgɔn delila ka adamaden sɔrɔ. Ala ye kantigi ye, ale tena sɔn aw ka kɔrɔbɔ fɔɔ ka taga tɛmɛ aw barika danyɔrɔ kan. Ni kɔrɔbɔli sera, a bena bɔyɔrɔ d'aw ma ani ka barika don aw la ka se k'o muɲu.

Jɛnɲɔgɔnya te anw ni Sutana cɛ

¹⁴ O le y'a to n balimaw, aw ka faran josɔn la.

¹⁵ Ne be kumana aw fɛ ten bari aw ye hakilitigiw ye. Aw k'o kuma kɔrɔ sɛgɛsɛgɛ aw yɛrɛ ma.

¹⁶ An be barika la Ala ye filen dubaman min kosɔn, ka sɔrɔ k'a min, ale t'an jɛn ni Krista ye a joli bɔnko la wa? An be buru min tilantilan, o fana t'an jɛn ni Krista farisogo ye wa?

¹⁷ Buru ye kelen ye, an minw ye mɔgɔ caaman ye, an kɛra farisogo kelen ye, bari an bɛɛ be kori o buru kelen le kan.

¹⁸ Aw ka Isirayɛlidenw ka koo filɛ, mɔgɔ minw be sarakafɛnw dumu, jɛɛn be olu ni Ala cɛ, bari sarakabɔyɔrɔ ye a ta ye.

¹⁹ Ne t'a fɛ k'a fɔ ko josɔnfɛnw ni joow ye fɛɛn ɲanamanw ye dɛ.

²⁰ Ayi, olu be saraka minw bɔ, u b'o bɔ jinaw ye, u t'o bɔ Ala ye, o la, ne t'a fɛ aw ka jɛnɲɔgɔnya sɔrɔ ni jinaw ye.

²¹ Aw te se ka minni kɛ ni Matigi ka filen ye, ka tila ka minni kɛ ni jinaw ta ye fana. Aw fana te se ka Matigi ka dumuni kɛ ka tila ka jinaw ta kɛ.

²² Walima an b'a fɛ ka keliya don Matigi la wa? See b'an ye ka tɛmɛ ale kan wa?

An ka boɲa la Ala tɔgɔ kan

²³ Dɔw ko mɔgɔ be se ka koo bɛɛ kɛ. Nga o bɛɛ ma ɲi. Tiɲɛ lo, fɛɛn bɛɛ be se ka kɛ. Nga o bɛɛ te se ka mɔgɔ dɛmɛ.

²⁴ Mɔgɔ si kan'a yɛrɛ nafa ɲini, nga mɔgɔ kelen kelen bɛɛ k'a tɔɲɔgɔn ta le ɲini.

²⁵ Fɛɛn minw bɛɛ be feere lɔgɔ la, aw k'o bɛɛ dumu, aw kana sigasiga ka ɲiningali caaman kɛ.

²⁶ Bari a fɔra Ala ka kuma na ko: «Dugukolo ye Matigi ta ye ani fɛɛn minw bɛɛ b'a kan.»

²⁷ Mɔgɔ min ma la Yezu la, n'a y'i wele dumuni na a fɛ, n'i tagara, n'o ye dumuni fɛɛn o fɛɛn sigi i kɔrɔ, i k'a dumu, i kana sigasiga ka ɲiningali caaman kɛ,

²⁸ nga ni mɔgɔ dɔ y'a fɔ i ye ko josɔnfɛn lo, i kan'a dumu o tigi kosɔn, n'a ka miiriya kosɔn.

²⁹ Ne te kumana e yɛrɛ ka koo la dɛ, nga ne be kumana mɔgɔ dɔ nin ka koo le la. Mɔgɔw le b'a fɔ ko: «Mun na mɔgɔ wɛrɛ bena ne jalaki ne ka hɔrɔnya kosɔn?

³⁰ Ni ne be barika la Ala ye ka sɔrɔ ka dumuni kɛ, mun na mɔgɔ dɔ bena ne tɔgɔ cɛn o fɛɛn nunu kosɔn?»

³¹ Ayiwa, aw be dumuni kɛra wo, aw be minni kɛra wo, aw be fɛɛn o fɛɛn kɛ, aw k'o bɛɛ kɛ ka boɲa la Ala kan.

³² Aw kana kɛ sababu ye ka mɔgɔ si kunnacɛn, a kɛra siya wɛrɛ ye wo, zuwifu ye wo, minw lara Ala la, aw kana kɛ sababu ye u si ma.

³³ O la fana, ne be jija koo bɛɛ la waasa ne ka se ka mɔgɔ bɛɛ ladiya. Ne te n yɛrɛ nafa ɲini, nga mɔgɔ caaman ta, waasa olu ka se ka kisi.