Lok fɔlɔ 20 - ALA KA KUMA

Araba kɛlɛko

¹ Saan yɛlɛmana tuma min na, masacɛw be to ka taga kɛlɛ kɛ waati min na, Zowabu ye kɛlɛdenw minɛ ka bɔ ka taga amoniw ka mara halaki. U tagara Araba datugu. Nga Dawuda tora Zeruzalɛmu. Zowabu ye Araba kɛlɛ k'a cɛn.

² A ye dugu nin masacɛ ka fugulan bɔ a kuun na. Fugulan nin birila Dawuda kuun na. A gwiliya tun sera sanu kilo bi saba ni kɔ, ani kabakuru sɔngɔgwɛlɛnw tun nɔrɔnin b'a gɛrɛn na. Dawuda ye dugu mɔgɔ nunu bolofɛnw ta caaman ka taga n'u ye.

³ A ye dugu mɔgɔ nunu minɛ ka taga u bila yiritigɛ baara la ni kakanan ye, ani kabakurulɛsɛ la, ni jende baara la. A ye amoniw ka duguw bɛɛ mɔgɔw kɛ ten. O kɔ, Dawuda n'a ka mɔgɔw bɛɛ kɔsegira ka taga Zeruzalɛmu.

Filisiw kɛlɛko

⁴ O kɔ, kɛlɛ sɔrɔla Dawuda nunu ni filisiw cɛ Gezɛri. O waati la, Usaka Sibekayi ye erefaw dɔ faga, a tɔgɔ ko Sipayi. O la, filisiw y'u yɛrɛ majigi.

⁵ Kɛlɛ wilila u ni filisiw cɛ tugu. Yayiri dencɛ Elanan ye Lami faga. Ale tun ye Gatika Goliyati balimacɛ ye, min ka taman lɔgɔ tun ka bon kosɔbɛ.

⁶ Kɛlɛ dɔ fana kɛra Gati. Cɛjan dɔ tun b'o yɔrɔ la, a bolokunnadenw n'a seen taw tun ye wɔɔrɔ wɔɔrɔ ye, u bɛɛ lajɛnnin tun ye mugan ni naani ye. Ale fana tun ye Arafa kɔmɔgɔ dɔ ye.

⁷ Ale ye dabayakuma fɔ Isirayɛlidenw ma. Dawuda faden Simeya dencɛ Yonatan y'a faga.

⁸ O mɔgɔ nunu tun ye Arafa kɔmɔgɔw ye ka bɔ Gati. Dawuda n'a ka kɛlɛdenw y'u faga.