Lok fɔlɔ 14 - ALA KA KUMA

Dawuda ka koo, Zeruzalɛmu

¹ Tiri masacɛ Iramu ye mɔgɔw ci Dawuda fɛ, ni sɛdiriyiriw ye, ani kabakurulɛsɛbagaw ni yirilɛsɛlaw, janko ka masaso lɔ k'a d'a ma.

² Dawuda y'a faamu o tuma na ko Masaba y'ale kɛ masa ye Isirayɛlidenw kunna, ani k'ale ka masaya sabati kosɔbɛ a ka jama Isirayɛli kosɔn.

³ Dawuda ye musow furu Zeruzalɛmu tugu, ka dencɛ ni denmuso wɛrɛw sɔrɔ.

⁴ A ye deen minw sɔrɔ k'a to Zeruzalɛmu, olu tɔgɔ filɛ: Samuwa ni Sobabu, ani Natan, ni Solomani,

⁵ ani Yibari ni Elisuwa, ani Ɛlipalɛti,

⁶ ani Noga ni Nɛfɛgi ni Yafiya,

⁷ ani Elisama ni Beyɛliyada ani Elifɛlɛti.

Dawuda be se filisiw kɔrɔ

⁸ Filisiw y'a mɛn k'u ye tulu kɛ Dawuda kunna k'a kɛ Isirayɛlidenw bɛɛ ka masacɛ ye, u bɛɛ wilila ka na k'u b'a minɛ. Dawuda y'o mɛn, a bɔra ka taga u kunbɛn.

⁹ Filisiw sera, ka na cɛnni kɛ erefaw ka kɔkɛnɛ na.

¹⁰ Dawuda ye Ala ɲininga ko: «Ne ka kan ka taga filisi nunu kɛlɛ wa? E bena u don ne bolo wa?» Masaba y'a jaabi ko a ka taga, ko ale bena u don a bolo.

¹¹ U wilila ka taga Baaliperasimu, Dawuda sera u kɔrɔ o yɔrɔ la. O kɔ, a y'a fɔ ko Ala ye tɛmɛyɔrɔ bɔ ale ye a juguw cɛma ale sababu la, i n'a fɔ jii b'a ka tɛmɛyɔrɔ bɔ cogo min na. O le y'a to u ye o yɔrɔ tɔgɔ la ko Baaliperasimu, o kɔrɔ, tɛmɛyɔrɔ bɔbaga.

¹² Filisiw tun bolila k'u ka joow to o yɔrɔ la. Dawuda y'a fɔ ko u k'u jɛni.

¹³ O kɔ tugu, filisiw kɔsegira ka na cɛnni kɛ kɔkɛnɛ nin na.

¹⁴ Dawuda ye Ala ɲininga tugu, Ala y'a jaabi ko: «Kana tilen ka taga, munumunu ka taga bɔ u kan tuu faan fɛ.

¹⁵ N'i ye seenw mankan mɛn tuu nin sanfɛ tuma min na, bɔ k'u kɛlɛ, bari ne Ala le tagara i ɲafɛ ka filisiw ka kɛlɛdenw kɛlɛ.»

¹⁶ Ala tun ye min fɔ Dawuda ye, a y'o kɛ. A ka kɛlɛdenw ye filisiw taw kɛlɛ ka se u kɔrɔ k'a ta Gabaŋɔn fɔɔ ka taga se Gezɛri.

¹⁷ O la, Dawuda tɔgɔ bɔra fɔɔ ka taga se jamanaw bɛɛ la. Masaba y'a kɛ siya wɛrɛw bɛɛ sirann'a ɲa.