Lok fɔlɔ 12 - ALA KA KUMA

Mɔgɔ minw tun tugura Dawuda kɔ

¹ Dawuda tun bolila Kisi dencɛ Sayuli ɲa ka taga Sikilagi tuma min na, mɔgɔ minw tun tagar'a fɛ o yɔrɔ la ka fara cɛfariw kan n'u b'a dɛmɛna kɛlɛ la, olu le ye nunu ye.

² Kalaw tun b'u fɛ. U tun be bonni kɛ ni bɛrɛbonnan ye ani ka kala la n'u bolo fila bɛɛ ye. Bɛnzamɛn kɔmɔgɔw, minw tun ye Sayuli balimaw ye, olu filɛ:

³ U kuntigi tun ye Ayezɛri n'a balimacɛ Zowasi, Gibeyaka Sɛma dencɛ, ani Azimawɛti dencɛw Yeziyɛli ni Pɛlɛti, ani Beraka, ni Anatɔtika Yewu,

⁴ ani Gabaŋɔnka Yisimaya, ale tun ka fari mɔgɔ bi saba nunu cɛma, ale lo tun ye u kuntigiw dɔ ye.

⁵ Yirimeya ni Yaaziyɛli, ani Yowanan ni Gederaka Yozabadi,

⁶ ani Elewuzayi ni Yerimɔti, ani Beyaliya ni Semariyawu, ani Arufika Sefatiya,

⁷ ani Ɛlikana ni Yisiyawu, ani Azarɛli ni Yowɛzɛri, ani Yasobeyamu, o mɔgɔ duuru nunu ye Kore kɔmɔgɔw ye,

⁸ ani Gedɔrika Yerowamu dencɛw Yowela ni Zebadiya.

⁹ Gadi kɔmɔgɔw cɛma, mɔgɔ dɔw wilila ka taga fara Dawuda kan a ka dogoyɔrɔ la kongokolon kɔnɔ. Cɛfariw tun lo, u tun be se kɛlɛ la kosɔbɛ. U tun be se nigɛkunbɛnnan ni taman kɛlɛ la. U tun ka fari i n'a fɔ jara. U tun ka teli i n'a fɔ dagwɛ, kulu kan.

¹⁰ U kuntigi tun ye Ezɛri ye, min tugura, o ye Obadiya ye, a sabanan, Eliyabu,

¹¹ a naaninan, Misimana, a duurunan, Yirimeya,

¹² a wɔɔrɔnan, Atayi, a wolonwulanan, Eliyɛli,

¹³ a seeginan, Yowanan, a kɔnɔntɔnnan, Ɛlizabadi,

¹⁴ a tannan, Yirimeyawu, Makibanayi ka kɛ tan ni kelennan ye.

¹⁵ Gadi kɔmɔgɔ nunu tun ye kɛlɛkuntigiw ye. U cɛma, mɔgɔ min barika tun ka dɔgɔ, ale ni mɔgɔ kɛmɛ bɛɛ tun ka kan, min barika tun ka bon, ale ni mɔgɔ waa kelen tun ka kan.

¹⁶ Saan kalo fɔlɔ la, olu le tun ye Zurudɛn baji tigɛ, o y'a sɔrɔ a fanin lo fɔɔ ka yɛrɛkɛ a dagolo faan bɛɛ la. U y'a tigɛ ka taga kɔrɔn fɛ kɔkɛnɛ mɔgɔw ni tileben fɛ taw bɛɛ gwɛn.

¹⁷ Bɛnzamɛn ni Zuda kɔmɔgɔw dɔw tagara Dawuda kɔ a ka dogoyɔrɔ la.

¹⁸ Dawuda bɔra k'u kunbɛn k'a fɔ u ye ko: «Ni hɛrɛ kama lo aw be nana ne fɛ, ani ka na ne dɛmɛ, ne sɔnna aw ma. Nga n'a kɛra ko aw nana janko ka ne namara, ka n di n juguw ma, k'a sɔrɔ n ma kojugu kɛ, an faaw ka Ala ɲaa b'aw la. Ale k'an bɔ ɲɔgɔn na.»

¹⁹ Ala ka Nii jigira mɔgɔ bi saba nunu kuntigi Amasiya kan. A y'a fɔ ko: «Anw be n'i ye, Dawuda, anw be ni ele Zese dencɛ ye! Hɛrɛ o hɛrɛ, Ala k'a kɛ i ye, Ala ka hɛrɛ kɛ i dɛmɛbagaw ye. Bari, i ka Ala le b'i dɛmɛ!» O la, Dawuda sɔnna u ma, k'u niin don a ka kɛlɛkuntigiw cɛma.

²⁰ Manase kɔmɔgɔ dɔw fana tugura Dawuda kɔ, filisiw ni Dawuda taatuma na Sayuli kɛlɛyɔrɔ la. Nga Dawuda n'a tɔɲɔgɔnw ni filisiw tun ma jɛn ka kɛlɛ kɛ. Bari filisiw ka ɲamɔgɔw ka ɲɔgɔnye kɛnin kɔ, u tun y'a ɲini Dawuda fɛ ko a kana taga ni olu ye. U tun b'a miiri ko Dawuda be se ka taga yɛlɛma k'a ka kuntigikɔrɔ Sayuli dɛmɛ ka olu kɛlɛ k'u faga.

²¹ Dawuda tun be segira ka taga Sikilagi tuma min na, Manase kɔmɔgɔ minw tugur'a kɔ, olu ye Adina ni Yozabadi ye, ani Yediyayɛli ni Mikayɛli, ani Yozabadi ni Eliyu, ani Siletayi. Olu tun ye Manase kɔmɔgɔw ka kɛlɛden waa kelen kelen kuntigi dɔw ye.

²² Olu ye Dawuda dɛmɛ bari u bɛɛ tun ye cɛfariw ye. U kɛra Dawuda ka kɛlɛdenw ɲamɔgɔ dɔw ye.

²³ Loon o loon, mɔgɔw tun be na Dawuda fɛ k'a dɛmɛ, fɔɔ a ka kɛlɛdenw cayara kosɔbɛ, ka kɛ kɛlɛbolo barikaman ye.

Mɔgɔ minw tagara Dawuda fɛ Eburɔn

²⁴ Mɔgɔ minw tun labɛnnin lo kɛlɛ kama n'u tagara Dawuda fɛ Eburɔn, janko k'a kɛ masacɛ ye Sayuli nɔɔ na, ka kɛɲɛ ni Masaba ka fɔta ye, olu daa filɛ:

²⁵ Zuda kɔmɔgɔw cɛma, mɔgɔ minw tun be ni nigɛkunbɛnnan ni taman ye, olu tun ye mɔgɔ waa wɔɔrɔ ni kɛmɛ seegi (6 800) ye, u labɛnnin tun be kɛlɛ kama.

²⁶ Simeyɔn kɔmɔgɔw cɛma, kɛlɛdenŋana waa wolonwula ni kɛmɛ (7 100).

²⁷ Levi kɔmɔgɔw la, mɔgɔ waa naani ni kɛmɛ wɔɔrɔ (4 600),

²⁸ ani Arɔn kɔmɔgɔw ɲamɔgɔ Yoyada fana. Mɔgɔ waa saba ni kɛmɛ wolonwula (3 700) tun be n'ale ye,

²⁹ ani Sadɔki fana, kanbelenŋana dɔ, ka fara a ka somɔgɔ mugan ni fila kan. U tun ye kuntigiw ye.

³⁰ Sayuli balimaw, Bɛnzamɛn kɔmɔgɔw tun ye mɔgɔ waa saba (3 000) ye. Bari, olu caaman tun be Sayuli ka somɔgɔw ka baara la halibi.

³¹ Efarayimu kɔmɔgɔw tun ye cɛfari waa mugan ni kɛmɛ seegi (20 800) ye, u tɔgɔ tun bɔra u ka somɔgɔw cɛma.

³² Manase kɔmɔgɔw tilancɛ min be Zurudɛn baji tileben fɛ, olu tun ye mɔgɔ waa tan ni seegi (18 000) le woloma k'olu ka taga Dawuda sigi masaya la.

³³ Isakari kɔmɔgɔw tun ye kɛlɛkuntigi kɛmɛ fila le ci, olu n'u ka kɛlɛdenw. Olu le tun b'a lɔn ni Isirayɛlidenw ka kan ka koo min kɛ tuma min na.

³⁴ Zabulɔn kɔmɔgɔ waa bi duuru (50 000) le tun labɛnnin lo kɛlɛ kama, n'u ka kɛlɛkɛminanw bɛɛ ye, u tun labɛnnin lo ka kɛlɛ kɛ n'u dusu bɛɛ ye.

³⁵ Nɛfutali kɔmɔgɔw la, kɛlɛdenw ɲamɔgɔ waa kelen (1 000) ani mɔgɔ waa bi saba ni waa wolonwula (37 000) le tagara, nigɛkunbɛnnan ni tamanw tun b'u fɛ.

³⁶ Dan kɔmɔgɔw la, minw tagara, olu tun ye mɔgɔ waa mugan ni seegi ani kɛmɛ wɔɔrɔ (28 600) ye. U labɛnnin tun be kɛlɛ kama.

³⁷ Asɛri kɔmɔgɔw la, mɔgɔ waa bi naani (40 000) le tun labɛnnin lo ka taga kɛlɛ la.

³⁸ Zurudɛn baji kɔrɔn fɛ, Urubɛn kɔmɔgɔw ni Gadi taw, ani Manase taw tilancɛ la, mɔgɔ waa kɛmɛ ni waa mugan (120 000) le tagara n'u ka kɛlɛkɛminanw bɛɛ ye.

³⁹ O cɛfari nunu bɛɛ tun labɛnnin be ka taga kɛlɛ kɛyɔrɔ la. U tagara Eburɔn ni kɔnɔgwɛ ye janko ka Dawuda kɛ Isirayɛlidenw bɛɛ ka masa ye. Isirayɛlidenw bɛɛ tun sɔnnin be Dawuda ka kɛ masa ye.

⁴⁰ U tora yen ni Dawuda ye ka tile saba kɛ, ka to ka dumuni kɛ, ani ka minni kɛ. Bari u balimaw tun ye dumuni labɛn u ye.

⁴¹ Minw tun ka surun u la ani fɔɔ ka taga se Isakari ka mara la, ni Zabulɔn, ani Nɛfutali taw la, olu tun nana ni dumuni ye faliw kan, ni ɲɔgɔmɛw kan, ni sofaliw kan, ani misiw kan. U tun nana ni mugu ni toroŋɔmi ye, ani *ɛrɛzɛn janin, ani duvɛn ni tulu, ani misiw ni sagaw ye caaman, bari Isirayɛlidenw nisɔn tun ka di.