Yoˇhaˬ 7 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yeqsur-euq Maernmr Deuq Maqjan-eu

¹ Khoernar-aq, Yeqsur, Gaqliqlaer mirkhanq doedoe-aer can-euq mae. Yurdav tsawrhaq, aqyawf-anr saef-eu laer jawq-eu mirnae, aqyawf, Yurdav mirkhanq-anr maq canmawf-a.

² Khoerngae, Yurdav tsawrhaq, Saeqghawv yawbui bui-eu aryamq paelar-euq mae.

³ Khoerngae, aqyawf-euq maernmr deuq, aqyawf-anr heulof-aer aernaeq-euq mae, “Nawq-euq zaqlanr deuq khawf, nawr mrluf-eu deuq-anr ya’mawrni, heugar nae dov-ir-awr, Yurdav mirkhanq-anr ir-awq.

⁴ Aqjeq mirnae aernar-aq, yawqha-euq mawrdo, aqcawq-anr byacaevni bisiq-eu laer sharpov luf-eu tsawrhaq-aq, aqjeq mr-eu khawf barzaf-anr tiqjeq-iq maqmr-ar. Nawr heudeuq mr-eu le laer nar-aq, nawq-euq mawrdo, mirtsaqzaq-anr bimawr-awq lawr.”

⁵ Aqyawf-euq maernmr deuq, aqyawf-anr maqjan-eu mirnae, khoerlof-aer aer-eu mae.

⁶ Khoerngae, Yeqsur, aqyawf maf-anr heulof-aer aernaeq-euq mae, “Ngaq-euq aryamq maq tsaqlar-aq siq. Aerkhawf, nawmaf-euq aryamq-aq, aqmyanluf tsaq-eu mae.

⁷ Mirtsaqzaq, nawmaf-anr maqbyae nya-ar. Aerkhawf, ngar, aqyawfmaf nae mr-euq deuq yawdoer nga laer sarkir kamq-eu mirnae, aqyawfmaf, ngaq-anr byae-eu mae.

⁸ Nawmaf yawbui bui-eu gar le-awq. Ngaq-euq aryamq yawmuiq-aer maq tsaqlar-euq mirnae, ngar yawbui bui-eu gar maqle siq.”

⁹ Yeqsur, aqyawf maf-anr heulof-aer aernaeq ghaq-awr nae, Gaqliqlaer mirkhanq-anr jawryaf-euq mae.

Yeqsur, Saeqghawv Yawbui-anr Le-euq

¹⁰ Aerkhawf, aqyawf-euq maernmr deuq ledzeur-euq nar-aq, Yeqsur khawf aqcawq-anr maqbi siqnya’ni yawzaf zaf-aer yawbui bui-eu gar le-euq mae.

¹¹ Yawbuibui ngae, Yurdav tsawrhaq, “Aqyawf aqgeugar jawr-eu la?” laer narhaq narhaq-aer povluf-eu mae.

¹² Tsawrhaq armaf deuq-euq yawkaq, aqyawf-euq garkawv lawflawf-aer jaluf-eu mae. Tiqpavnav deuq aer-eu, “Aqyawf-aq, yawmuiq mae.” Yawqdeuqyawq aer-eu, “Maqngeur-a, aqyawf-aq, tsawrhaq-anr sheuqbanq-eu tsawrhaq mae.”

¹³ Aerkhawf, aqyawfmaf, Yurdav tsawrhaq-anr guv-eu mirnae, tiqghaq-iq Yeqsur-euq garkawv byacaevni maq japeuq-a.

¹⁴ Yawbui bui-eu tiqpav pavlar ngae, Yeqsur, uqduq tanqnymr nymrma-anr le-awr maeqnaeq tsovnaeq-euq mae.

¹⁵ Yurdav tsawrhaq zanqler-awr aer-eu, “Tsawrhaq teughaq-aq, sanqbof maq dzawhaw-euq gar nae, sanqbof aqjox-aer siqnya-eu nga?”

¹⁶ Yeqsur, aqyawf maf-anr heulof-aer aerkhof naeq-euq mae, “Ngar maeq-eu dawqmaeq dawqtsov heu-aq, ngaq-euq dawq maqngeur, ngaq-anr khaerghae lef-euq ghaq-euq dawq mae.

¹⁷ Miqyaer nuima tsaqni mrmawf-eu tsawrhaq-aq, ngar maeq-eu dawqmaeq dawqtsov heu, Miqyaer nae bimaeq-euq nga lor? Maqngeur nar-aq, ngar yawqha yawqha ngaeq-eu nga laq laer siqnya taef-a.

¹⁸ Yawqha-anr nae dovlar-euq jeq ngaeq-eu tsawrhaq-aq, yawqha-euq yawshaef khanqsaer pov-eu mae. Aerkhawf, aqyawf-anr khaerghae lef-euq ghaq-euq yawshaef khanqsaer-anr pov-eu ghaq-aq, tsaq-awr dawr-awr, aqyawf-euq lafkhoer maqtsaq maqdawr-eu jeq maqanr-a.

¹⁹ Morseq, nawmaf-anr zanrdawq bif-euq maqngeur-a lor? Aerkhawf, nawmaf tiqghaq-iq zanrdawq-euq maeqnan maq cantae-a. Ngaq-anr aqjeq mirnae saef-eu laer jawq-eu le?”

²⁰ Tsawrhaq khoerdeuq aerkhof naeq-eu, “Nawr-aq, naef ur-eu ngar-a. Aqsur ghaq, nawq-anr saef-eu laer jawqluf-eu la?”

²¹ Yeqsur, aqyawf maf-anr heulof-aer aerkhof naeq-euq mae, “Ngar tiq jeq mr-euq gar, nawmaf dawqtawvluf zanqler-eu mae.

²² Khoermirnae, Morseq, nawmaf-anr bawkhov maeqdzaq yaeq-eu zanr bijanr-euq mae. Nawmaf, landaw jawrnan ngae nan khawf, zaqyo aqli-anr bawkhov maeqdzaq yaeqnaeq-eu mae. (Zanr heu-aq, Morseq-anr nae ardanq bae-euq maqngeur-a. Aqpoeq aqbawr deuq nae tawqka lef-euq mae).

²³ Landaw jawrnan ngae nan, tsawrhaq tiq ghaq bawkhov maeqdzaq yaeq-eu khoer, Morseq-euq zanrdawq-anr maqbanqni mrkhmq-eu ngeur nar-aq, landaw jawrnan ngae nan, ngar, tsawrhaq tiq ghaq-euq mawrdo dolan-aer bi taqler jir-euq gar, nawmaf, ngaq-anr nuima paer-eu le lor?

²⁴ Lafnyir paw mawrlar-eu jeq-anr haw-awr nae yarkhaq maqdar-aer, tsaq-awr dawr-eu yarkhaq dar-eu jeq nae dar-awq.”

Teughaq Kali Mae Lor?

²⁵ Yeqlursaqlaeq-anr jawr-eu tsawrhaq tiqpavnav deuq heulof-aer aer-eu mae, “Aqyawfmaf saef-eu laer jawqluf-eu khoerghaq, teughaq maqngeur-a lor?

²⁶ Aerkhawf, hawsher-eq! Aqyawf khaqduqni maeqluf-eu gar aqyawfmaf, aqyawf-anr tiqjeq-iq maqaer nga. Tsawrhaq teughaq aqdir Kali mae laer uvlanr-eu deuq aqdir siqnya-eu maqsiq.

²⁷ Tsawrhaq teughaq aqgeugar nae oe-euq la laer aqduimaf siqnya-eu beu. Aerkhawf, Kali oe ngae-aq, aqyawf aqgeugar nae oe-euq la laer tiqghaq-iq maqsiq nya-ar.”

²⁸ Khoerngae, Yeqsur, uqduq tanqnymr nymrma-euq lafkhoer maeq-awr tsov-eu lafkhoer, tersar yawkhav-aer heulof-aer aer-eu mae, “Nawmaf, ngaq-anr siqnya-awr, ngar aqgeugar nae oe-euq la laer khawf siqnya-eu mae. Aerkhawf, ngar-aq, yawqha yawqha oe-euq maqngeur. Ngaq-anr khaerghae lef-euq ghaq tsaq-awr dawr-eu mae. Nawmaf, aqyawf-anr maq siqnya-a.

²⁹ Aerkhawf, ngar-aq, aqyawf-anr siqnya ma. Aqjeq mirnae aernar-aq, aqyawf, ngaq-anr khaerghae lef-awr, ngar-aq, aqyawf jawr-eu gar nae oe-euq ma.”

³⁰ Khoer-euq baqda’nae, aqyawfmaf, aqyawf-anr nyaef-eu laer jawq-eu mae. Aerkhawf, aqyawf-euq aryamq maq tsaqlar-euq mirnae, aqyawf-anr tiqghaq-iq maqnyaef-a.

³¹ Tsawrhaq khoerdeuq-euq lafkhoer ghawqmya ghaq aqyawf-anr janlar-awr aer-eu, “Kali oe ngae, tsawrhaq heughaq nae mr-euq bisiq bimawr-euq deuq myavmaqtser aqyawf mr taef-a lor?”

Yeqsur-anr Binyaef-ir-euq

³² Tsawrhaq armaf deuq, Yeqsur-euq garkawv lawflawf-aer jaluf-eu gar Paqliqsaer deuq yagaq-euq mirnae, Yeqsur-anr binyaef-ir-eu laer pirma aqyuif deuq hawr-eu Paqliqsaer deuq, lofpir-eu kuirlafdeuq-anr khaerghae-euq mae.

³³ Khoerngae, Yeqsur, aqyawf maf-anr aernaeq-eu, “Ngar, nawmaf naeq-aer tiqkhaeq jawr nar-aq, ngaq-anr khaerghae lef-euq ghaq jawr-eu gar ghofler ma.

³⁴ Nawmaf, ngaq-anr pov taef-a. Aerkhawf, maq povmawr nya-ar. Nawmaf, ngar jawr-eu gar maq larnya-a.”

³⁵ Khoerngae, Yurdav tsawrhaq-euq yawkaq heulof-aer aer-eu mae, “Aqduimaf, aqyawf-anr maq povmawr nya’ni, aqyawf aqgeugar ir-eu laer aer-eu nga? Heqlaqsar tsawrhaq-euq ghanrcae jawrbyav taq-euq deuq jawr-eu gar ir-awr, Heqlaqsar tsawrhaq deuq-anr maeqnaeq tsovnaeq-ir-eu laer aer-eu nga lor?

³⁶ ‘Nawmaf, ngaq-anr pov taef-a. Aerkhawf, maq povmawr nya-ar. Ngar jawr-eu gar nawmaf maq larnya-a’ laer aqyawf aer-eu khoer aqjeq-anr aermawf-eu nga?”

Daef-eu Jeq Bif-eu Lawrgawv

³⁷ Yawbui bui-eu arsaqsaq ngae nan-aq, huiqdzaeq-eu nan mae. Yeqsur gawqyawf yawf-awr, tersar yawkhav-aer heulof-aer aer-eu mae, “Ircuf kharmaef-eu tsawrhaq, ngar jawr-eu gar lar-awr dawrlar-awq.

³⁸ Ngaq-anr jan-eu tsawrhaq-aq, Yaerbof boftaq-euq lof-aer, ‘Aqyawf-euq nuima-anr nae daef-eu jeq bif-eu ircuf lawrgawv yoerdovlef taef-a.’ ”

³⁹ Yeqsur heulof-aer aer-eu-aq, aqyawf-anr jan-eu tsawrhaq deuq aqkar muiq-eu Saflar za-eu gar aermawf-eu mae. Aqjeq mirnae aqkar za-eu laer aernar-aq, Yeqsur yawshaef khanqsaer maqza-euq siq mirnae, aqyawf maf-anr Yawshawr Saflar maq bifdan-aq siq.

Yeqsur Baqda’nae Armur Pav-ir-euq

⁴⁰ Tsawrhaq armaf deuq dawq khoerdawq-anr yagaq ngae ghawqmya ghaq aer-eu, “Heughaq-aq, aqdirma-aer Miqyaer gharduq ngaeqdan-eu khoerghaq ngar-a.”

⁴¹ Tiqpavnav deuq aer-eu, “Heughaq-aq, Kali ngar-a.” Aerkhawf, tiqpavnav deuq aer-eu, “Kali, Gaqliqlaer mirkhanq-anr nae dovlar-a lor?

⁴² Yaerbof-euq lafkhoer, ‘Kali-aq, Daqbir-euq aryoeq-anr nae dovle-awr, Daqbir-euq jawrduq Baeqlaeqhaeq-anr nae dovlar taef-a’ laer boftaq-euq maqngeur-a laq?”

⁴³ Khoerngae, Yeqsur-euq baqda’nae, aqyawf maf-euq yawkaq pav-ir-euq mae.

⁴⁴ Tiqpavnav deuq, aqyawf-anr nyaefmawf-eu mae. Aerkhawf, tiqghaq-iq aqyawf-anr maqnyaef-a.

Aqyuif Aqtsu Deuq Maqjan-a

⁴⁵ Khoerngae, pirma aqyuif deuq hawr-eu Paqliqsaer deuq, lofpir-eu kuirlaf deuq ghoflar-euq gar narhaq-eu, “Nawmaf aqjeq mirnae aqyawf-anr maq nyaeflaf-euq le?”

⁴⁶ Lofpir-eu kuirlaf khoerdeuq aerkhof-eu, “Tsawrhaq heughaq lof-aer tiqghaq-iq maq ngaeqhaw-aq.”

⁴⁷ Khoerngae, Paqliqsaer deuq, aqyawf maf-anr heulof-aer aerkhof naeq-euq mae, “Nawmaf khawf bi sheuqbanq ghae-euq le lor?

⁴⁸ Uvlanr-eu deuq hawr-eu Paqliqsaer deuq, aqyawf-anr janlar-euq tsawrhaq tiqghaqnav jawr mae lor?

⁴⁹ Aerkhawf, zanrdawq-anr maq siqnya-eu tsawrhaq armaf heudeuq-aq, yaqkhaer yaq-eu gar yadaq taef-a.”

⁵⁰ Uqcif paw Yeqsur jawr-eu gar irhaw-euq aqyawf maf-euq lafkhoer keuq-eu Nirgawrdiq, aqyawf maf-anr aernaeq-eu,

⁵¹ “Aqdui-euq zanrdawq, aqyawf ngaeq-eu gar jeqhu maq narhaq-aer, aqyawf mrluf-eu jeq-anr jeqhu maqya siq-euq gar, tsawrhaq tiq ghaq-anr yarkhaqdar taef-a lor?”

⁵² Aqyawfmaf, aqyawf-anr aerkhof naeq-eu, “Nawr khawf, Gaqliqlaer mirkhanq-anr nae oe-euq le lor? Nawr povtser haw-ir sher-eq. Gaqliqlaer mirkhanq-anr nae Miqyaer gharduq ngaeqdan-eu tsawrhaq tiqghaq-iq maq dovlar haw-aq.”

⁵³ Khoernar-aq, yawqghaq navluf yawqha-euq nymr-anr yawqha ghof-ir jir-euq mae.