Yoˇhaˬ 5 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Landzer-anr Jawr-eu Tiq Ghaq-anr Bi Taqler-euq

¹ Khoernar-aq, Yurdav tsawrhaq yawbui bui-eu aryamq keuvlar-euq mirnae, Yeqsur, Yeqlursaqlaeq-anr le-euq mae.

² Yeqlursaqlaeq meuq-euq lafkhoer, Yawr lanrkhaeq-euq dawqpae, Heqbyaer dawq Beqdeqsaqdar laer kur-eu lan tiq lan jav-eu mae. Lan heulan-euq dawqpae saeqghawv ngaq ghawv jav-eu mae.

³ Saeqghawv heudeuq-euq lafkhoer, myavbaef baef-eu tsawrhaq, kuircawv cawv-eu tsawrhaq hawr-eu kuirshir lafshir shir-eu tsawrhaq, nar-eu tsawrhaq ghawqmya’ni yufluf-eu mae. Aqyawfmaf ircuf nyinyi-aer ghaelar-eu gar dawqluf-eu mae.

⁴ Aryamq baw-awr tsaqlar ngae, mqtav ghaqkhaer lan-euq lafkhoer zafka le-awr, ircuf-anr lavnyi le-eu mae. Ircuf khoer nyinyi-aer ghaelar ngae, aqcawq-euq jeqhu ur-ir-euq ghaq-aq, aqjeq-euq nargawr narluf-eu khawf taqler-eu mae.

⁵ Khoergar, 38 khof byanni narlaf-euq zaqyo aqli tiq ghaq jawr-eu mae.

⁶ Yeqsur, khoerghaq yufluf-eu gar ya’mawr ngae, aqyawf khoerlof-aer pyeufluf-eu myanrlar-euq siqnya-awr aqyawf-anr narhaq-eu, “Nawr taqlermawf mir-a lor?”

⁷ Nar-eu khoerghaq, aqyawf-anr aerkhof naeq-eu, “Saqlaq-or! Ircuf nyinyi-aer ghaelar ngae, ngaq-anr lan-euq lafkhoer ciqur naeqlaf-eu tiqghaq-iq maqjawr-a. Ngar ur-ir-eu laer ghae ngae, aqcawq, ngaq-euq maeqhu nae ur-ir dzeur-eu mae.”

⁸ Yeqsur, aqyawf-anr aernaeq-eu, “Tur-awr, nawq-euq yufzar baf-awr can-awq.”

⁹ Khoerghaq tiqpov taef-aer taqler-awr, yufzar baf-awr can-euq mae. Khoerngae nan-aq, landaw jawrnan tsaq-eu mae.

¹⁰ Khoermirnae, Yurdav tsawrhaq, taqler-euq khoerghaq-anr aernaeq-eu, “Iqnan-aq, landaw jawrnan mae. Nawr yufzar baf-awr maq cankhmq-a.”

¹¹ Khoerngae, aqyawf, aqyawf maf-anr aernaeq-eu, “Ngaq-anr bi taqler naeqlaf-euq ghaq, ngaq-anr, ‘Nawq-euq yufzar baf-awr can-awq’ laer aer-eu mae.”

¹² Aqyawfmaf, aqyawf-anr narhaq-eu, “Nawq-anr, ‘Yufzar baf-awr can-awq’ laer aer-eu khoerghaq aqsur ghaq la?”

¹³ Khoergar tsawrhaq ghawqmya’ni jawr-awr, Yeqsur can’yawq ghae-euq mirnae, taqler-euq khoerghaq, Yeqsur-anr aqsur ghaq la laer maq siqnya-a.

¹⁴ Arnan, Yeqsur, khoerghaq-anr uqduq tanqnymr nymrma-euq lafkhoer mawr-awr aernaeq-eu, “Hawsher-eq, nawr taqler-euq mae. Khoernav maqtser doerdzaeq-eu jeq nawq-euq khoertav maqya keuvleni iqbax taqpar mr de-eq.”

¹⁵ Khoernar-aq, khoerghaq, Yurdav tsawrhaq jawr-eu gar ir-awr aer-eu, “Ngaq-anr bi taqler-euq khoerghaq-aq Yeqsur mae.”

¹⁶ Heu-euq baqda’nae, Yurdav tsawrhaq, Yeqsur-anr khaeq-eu ardanq bae-awr Yeqsur-anr saef-eu laer sharpov-eu mae. Aqjeq mirnae aernar-aq, Yeqsur, landaw jawrnan ngae nan khoerlof-aer ghae-eu jeq mr-euq mae.

¹⁷ Khoerngae, Yeqsur, aqyawf maf-anr aernaeq-eu, “Nymq-mr keuvni ngaqDa gar mrluf-eu mae. Ngar khawf mrluf-eu ma.”

¹⁸ Khoermirnae, yawbae navmaqtser, Yurdav tsawrhaq, Yeqsur-anr saef-eu laer tov-eu mae. Aqjeq mirnae aernar-aq, aqyawf-aq, landaw jawrnan-anr maq mrkhmq-eu jeq mr-euq uqtaf, Miqyaer-aq, aqyawf-euq Aqda ma laer aer-awr, aqyawf, Miqyaer naeq-aer tiqkawv dini taq-eu mae.

Zaqyo-euq Baoq

¹⁹ Khoernar-aq, Yeqsur, aqyawf maf-anr heulof-aer aerkhof naeq-euq mae, “Ngar, nawmaf-anr aqdir aqmar aernaeq nyar, Zaqyo-aq, yawqha yawqha tiqjeq-iq maq mrnya-a. Aqda mr-eu gar mawr-awr, aqyawf mr-eu taef mae. Aqda kharmr-eu yawqjeq navluf Zaqyo khawf mrluf-eu mae.

²⁰ Aqda-aq, Zaqyo-anr gaq-awr, aqyawf kharmr-eu dawqtawvluf Zaqyo-anr bimawr-eu mae. Nawmaf bi zanqler paq-aer heudeuq navmaqtser huiq-eu jeq khawf, aqyawf, Zaqyo-anr bimawr taef-a.

²¹ “Aqda, shir-euq tsawrhaq-anr bi ghofdaef lar-awr, daef-eu jeq bif-euq lof-aer, Zaqyo khawf, aqyawf nuima tsaq-eu tsawrhaq-anr daef-eu jeq bif-eu mae.

²² Aqda tiqghaq-anr-iq yarkhaq maqdar-a. Yarkhaq dar-eu jeq dawqtawvluf Zaqyo-anr bifjir taq-euq mae.

²³ Khoer-aq, tsawrhaq dawqtawvluf, Aqda Miqyaer-anr yawzeu baw-eu lof-aer, Zaqyo-anr khawf yawzeu bi bawlar-eu gharduq mae. Zaqyo-anr yawzeu maqbaw-eu tsawrhaq-aq, Zaqyo-anr khaerghae lef-euq Aqda Miqyaer-anr khawf yawzeu maqbaw-a.

²⁴ “Ngar, nawmaf-anr aqdir aqmar aernaeq nyar, aqsur ghaq maqkaq, ngaq-euq dawq narhaq-awr, ngaq-anr khaerghae lef-euq ghaq-anr jan nar-aq, mqmaq maqbyav yarzir daef-eu jeq za-awr, yarkhaq dar-eu gar maqya daq-aer, shir-eu jeq-anr nae dovle ghaq-awr, daef-eu jeq-euq lafkhoer urler dzeur-euq mae.

²⁵ “Ngar, nawmaf-anr aqdir aqmar aernaeq nyar, shir-euq tsawrhaq deuq, Miqyaer-euq Zaqyo-euq tersar-anr yagaq-eu aryamq keuvle luf-eu mae. Nymq-mr nae keuvle-euq mae. Yagaq-euq tsawrhaq yadaef taef-a.

²⁶ Aqjeq mirnae aernar-aq, Aqda, aqyawf-euq lafkhoer daef-eu jeq anr-eu lof-aer durni, Zaqyo-euq lafkhoer khawf daef-eu jeq anrni, aqyawf-anr biftaq-euq mae.

²⁷ Khoeruqtaf, aqyawf-aq, Tsawrhaq-euq Zaqyo pyeuf-eu mirnae, aqyawf-anr yarkhaq dar-eu aryaq biftaq-euq mae.

²⁸ “Nawmaf garkawv heu-anr taq zanqler. Aqjeq mirnae aernar-aq, aryamq keuvlar ngae, lmqbymr-anr bafpanq taq-euq tsawrhaq dawqtawvluf, aqyawf-euq tersar yagaq-awr,

²⁹ lmqbymr-anr nae dovlar taef-a. Yawmuiq jeq mr-euq tsawrhaq-aq, ghofdaef lar-awr daef-eu jeq za taef-a. Yawdoer jeq mr-euq tsawrhaq-aq, ghofdaef lar-awr yarkhaq dar-eu gar yadaq taef-a.”

Yeqsur-euq Garkawv Sarkir Kamq-eu Deuq

³⁰ “Ngar-aq, yawqha yawqha tiqjeq-iq maq mrnya nya. Ngaq nae yagaq-euq lof-aer ngar yarkhaq dar-eu ma. Ngaq nae yarkhaq dar-euq-aq, tsaq-awr dawr-eu ma. Aqjeq mirnae aernar-aq, ngar-aq, ngar nuima tsaq-eu lof-aer mr-eu maqngeur, ngaq-anr khaerghae lef-euq Aqda nuima tsaq-eu lof-aer mr-eu ma.

³¹ “Ngar, yawqha-euq garkawv yawqha sarkirkamq nar-aq, ngaq-euq sarkir maqbyan-a.

³² Ngaq-euq garkawv sarkir kamq-eu tiq ghaq jawr-eu mae. Ngaq-euq garkawv aqyawf kamq-eu khoer-aq, byan mae laer ngar siqnya-eu ma.

³³ “Nawmaf, Yorhaq jawr-eu gar tsawrhaq khaerghae ngae, aqyawf yawtsaq yawdawr jeq-euq garkawv sarkir kamq-euq mae.

³⁴ Aqdir aernar-aq, tsawrhaq kamq-eu sarkir-anr ngar maqghoe. Aerkhawf, nawmaf yabuq-ir ni ngar heulof-aer aer-eu ma.

³⁵ Yorhaq-aq, dofbya taq-euq tsirkhmq lof-aer dur-eu mae. Nawmaf, aqyawf-euq yawshaef-euq lafkhoer tiqkhaeq-euq lafkhoer laqkhaq caer-eu nuima anr-eu mae.

³⁶ “Aerkhawf, ngar-aq, Yorhaq-euq sarkir navmaqtser huiq-eu jeq jav-eu ma! Aqda nae ngaq-anr bifnaeq laf-euq gardeuq mrluivni, nymq-mr ngar mrluf-eu heu-aq, Aqda nae ngaq-anr khaerghae lef-euq mae laer sarkir kamq-eu mae.

³⁷ Ngaq-anr khaerghae lef-euq Aqda khawf ngaq-euq garkawv sarkir kamq-eu mae. Nawmaf-aq, aqyawf-euq tersar tiqpov-iq maq gaqhaw-aer, aqyawf-euq pyawqnaq-anr khawf maq mawrhaw-aq.

³⁸ Nawmaf-euq lafkhoer aqyawf-euq dawq maq jeqhmq taq-aq. Aqjeq mirnae aernar-aq, nawmaf, aqyawf nae khaerghae lef-euq ghaq-anr maqjan-a.

³⁹ “Yaerbof-euq lafkhoer mqmaq maqbyav yarzir daef-eu jeq anr-eu mae laer nawmaf noeq-eu mirnae, nawmaf, Yaerbof guigui-aer povtser luf-eu mae. Yaerbof khoer-aq, ngaq-euq garkawv sarkir kamq-eu mae.

⁴⁰ Aerkhawf, nawmaf saflar daef-eu jeq za’ni, ngar jawr-eu gar maq larmawf-a.

⁴¹ “Ngar-aq, tsawrhaqzaq nae taqhuiq taqmanr-euq jeq-anr maq hageuf.

⁴² Aerkhawf, ngar, nawmaf-anr siqnya ma. Nawmaf-euq lafkhoer Miqyaer-anr gaq-eu jeq maqanr-a.

⁴³ “Ngar, ngaqDa-euq tsawrmyanr-euq uqmov oe-euq khawf, nawmaf, ngaq-anr maq hageuf-a. Aqcawq, yawqha-euq tsawrmyanr-euq uqmov oe-eu lawnmr-aq, nawmaf, aqyawf-anr hageuf taef-a.

⁴⁴ “Nawmaf-euq yawkaq tiqghaq tirghaq taqhuiq taqmanr-eu jeq povluf-awr, nawmaf, aqyawf tiq ghaq taef-aer Miqyaer pyeuf-eu ghaq-anr nae oe-euq taqhuiq taqmanr-eu jeq-anr maqpov-eu mirnae, nawmaf, ngaq-anr aqjox-aer jannya nmr-mq?

⁴⁵ Ngar, Aqda-euq maeqshi nawmaf-euq yawlaeq daqler taef-a laer taqnoeq. Nawmaf-anr iqbax taq-eu tiq ghaq jawr-eu mae. Khoerghaq-aq, nawmaf noeqtmq luf-eu Morseq mae.

⁴⁶ “Nawmaf, Morseq-anr jan-eu lawnmr-aq, ngaq-anr khawf jan taef-a. Aqjeq mirnae aernar-aq, aqyawf, ngaq-euq garkawv boftaq-euq mae.

⁴⁷ Nawmaf, aqyawf nae boftaq-euq deuq-anr maqjan nar-aq, ngaq-euq dawq-anr aqjox-aer jan nmr-mq?”