Yoˇhaˬ 18 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yeqsur-anr Nyaef-euq

¹ Yeqsur dawq heudeuq ngaeqghaq-euq nar-aq, aqyawf-euq zaqlanr deuq naeq-aer dov-ir-awr, Girdaqloq lawrgawv-euq khoerpaw baq-anr tsaev-ir-euq mae. Khoergar yarkmr tiq kmr jav-eu mae. Yeqsur hawr-eu aqyawf-euq zaqlanr deuq, yarkmr khoerkur-anr urler-euq mae.

² Khoergar, Yeqsur, aqyawf-euq zaqlanr deuq naeq-aer tiqkhaeq maqtaqni dzoerhaw-euq mirnae, Yeqsur-anr anqdzaq-euq Yurdav khoerghaq khawf, jawrduq khoertsanr-anr siqnya-eu mae.

³ Yurdav-aq, pirma aqyuif deuq hawr-eu Paqliqsaer deuq nae khaerghae lef-euq lofpir-eu kuirlaf hawr-eu guirzaq tiq maf sheuq-awr oe-euq mae. Aqyawfmaf tsirkhmq dof-awr, miqdof keuq-awr, guirdeuv keuka khawf yur-awr, yarkmr-anr oekeuv taq-euq mae.

⁴ Yeqsur-aq, aqyawf-euq khoertav keuvle-eu laer ghae-eu yawqjeq navluf-anr siqnya-awr, maeqhu paw ledov-awr aqyawf maf-anr narhaq-eu, “Nawmaf aqsur ghaq-anr povluf-eu le?”

⁵ Aqyawfmaf, aqyawf-anr aerkhof naeq-eu, “Naqzaqlaer tsawrhaq Yeqsur-anr povluf-eu ma.” Khoerngae, Yeqsur, aqyawf maf-anr aerkhof naeq-eu, “Ngar-aq, khoerghaq ma.” Aqyawf-anr anqdzaq-euq Yurdav khawf aqyawfmaf naeq-aer yawfluf-eu mae.

⁶ Yeqsur, aqyawf maf-anr, “Ngar-aq, khoerghaq ma” laer aernaeq ngae, aqyawfmaf narkhan paw jivkhof ghae-awr mirtsa coqdzae ghae-euq mae.

⁷ Khoerngae, Yeqsur, aqyawf maf-anr tiq pov par narhaq-eu, “Nawmaf aqsur ghaq-anr povluf-eu le?” Aqyawfmaf aer-eu, “Naqzaqlaer tsawrhaq Yeqsur-anr povluf-eu ma.”

⁸ Yeqsur aer-eu, “Ngar-aq, khoerghaq ma laer ngar, nawmaf-anr aernaeq-euq ma. Khoermirnae, nawmaf, ngaq-anr pov-eu ngeur nar-aq, heudeuq-anr pyaeq-awr bican-awq.”

⁹ Yeqsur khoerlof-aer aer-eu-aq, “Ngar, nawq nae ngaq-anr bifnaeq laf-euq tsawrhaq tiqghaq-iq maqbi byov-ir-aq” laer aqyawf nae aertaq-euq dawq khoerdawq bi byanlar-eu gharduq mae.

¹⁰ Sirmoq Beqtuvluv, micaer tiq kanr anr-eu mae. Aqyawf, micaer khoerkanr ghawrdov-awr, pirma yawhuiq ghaq-euq kuirlaf zaqkhav-anr coerghae-awr, aqyawf-euq naqpaf armar pyawq coertsaev-euq mae. Kuirlaf zaqkhav khoerghaq-aq, Maqlaqkur laer kur-eu mae.

¹¹ Khoerngae, Yeqsur, Beqtuvluv-anr aernaeq-eu, “Nawq-euq micaer, tawvkhawv-anr soeqanr-awq. NgaqDa nae ngaq-anr bidawr-euq khmqmaq, ngar maqdawrni ghaenya taef-a lor?”

Yeqsur-anr Aqna Jawr-eu Gar Sheuqghae-euq

¹² Khoerngae, guirzaq khoermaf, tanrdzoeq guirhuq hawr-eu Yurdav tsawrhaq-euq lofpir-eu kuirlaf deuq laer Yeqsur-anr nyaef-awr paf-euq mae.

¹³ Khoernar-aq, aqyawf-anr Aqna jawr-eu gar jeqhu sheuqghae-euq mae. Aqjeq mirnae aernar-aq, Aqna-aq, khoerngae khof pirma yawhuiq ghaq geufluf-eu Gaqyaqpar-euq tsawrmawq mae.

¹⁴ Gaqyaqpar heughaq-aq, yawbae Yurdav tsawrhaq-anr, ‘Tsawrjeuq tiq jeuq-euq gharduq tsawrhaq tiq ghaq shirdan nar-aq muiq taef-a’ laer, nuinoeq nuidur bif-euq khoerghaq mae.

Beqtuvluv, Yeqsur-anr Maq Siqnya Nya Laer Pyaer-euq

¹⁵ Sirmoq Beqtuvluv hawr-eu zaqlanr yawqghaqyawq, Yeqsur-euq maeqnan cantae ghae-euq mae. Pirma yawhuiq ghaq, zaqlanr yawqghaq yawq-anr siqnya-eu mirnae, aqyawf, Yeqsur naeq-aer pirma yawhuiq ghaq-euq nymr-euq povka urler-euq mae.

¹⁶ Aerkhawf, Beqtuvluv-aq, larghov-euq lafnyir paw yawfyaf-euq mae. Khoerngae, pirma yawhuiq ghaq siqnya-eu zaqlanr khoerghaq dov-ir-awr, larghov-anr lof-eu kuirlaf zaqkhav aqbur-anr tiq dawq aernaeq-awr, Beqtuvluv-anr sheuqur laq-ir-euq mae.

¹⁷ Larghov-anr lof-eu kuirlaf zaqkhav aqbur khoerghaq, Beqtuvluv-anr narhaq-eu, “Nawr khawf tsawrhaq heughaq-euq zaqlanr tiq ghaq maqngeur lor?” Khoerngae, Beqtuvluv aer-eu, “Ngar maqngeur.”

¹⁸ Khoerngae, yawgav gav-eu mirnae, kuirlaf zaqkhav deuq hawr-eu lofpir-eu kuirlaf deuq, khaqgheuq bawdof-awr, gawqyawf yawf-awr yawgav lmrluf-eu mae. Beqtuvluv khawf aqyawfmaf naeq-aer yawf-awr lmrluf-eu mae.

Pirma Yawhuiq Ghaq, Yeqsur-anr Narhaq-euq

¹⁹ Khoerngae, pirma yawhuiq ghaq, Yeqsur-anr aqyawf-euq zaqlanr deuq-euq garkawv hawr-eu, aqyawf-euq dawqmaeq dawqtsov-euq garkawv narhaq-euq mae.

²⁰ Yeqsur, aqyawf-anr heulof-aer aerkhof naeq-euq mae, “Ngar yawzaf zaf-aer ngaeq-euq tiqjeq-iq maqjav. Ngar, mirtsaqzaq-anr byacaevni ngaeqnaeq-euq ma. Ngar aqmyanluf Yurdav tsawrhaq deuq yawqjawr navluf dzoer-eu zanrdawq khawqnymr hawr-eu uqduq tanqnymr nymrma-euq lafkhoer maeqnaeq-euq ma.

²¹ Aqjeq mirnae nawr, ngaq-anr narhaq-eu le? Ngar, aqyawf maf-anr maeqnaeq ngae, gaq-euq deuq-anr narhaq-ir-awq lawr. Ngaq nae ngaeq-euq jeq aqyawfmaf siqnya taef-a.”

²² Yeqsur khoerlof-aer aerghaq ngae, dawqpae yawfluf-eu lofpir-eu kuirlaf tiq ghaq, Yeqsur-anr aqlaf nae taev-awr aer-eu, “Nawr, pirma yawhuiq ghaq-anr teulof-aer ngaeqkhof-eu le laq?”

²³ Yeqsur, aqyawf-anr aerkhof naeq-eu, “Ngaq-euq dawq yawlaeq nar-aq, yawlaeq toeqmaeq naeqlaf-awq. Aerkhawf, ngaq-euq dawq tsaq nar-aq, aqjeq mirnae nawr, ngaq-anr taev-eu le?”

²⁴ Khoernar-aq, Aqna-aq, Yeqsur-anr paftaq-euq maqpuirni pirma yawhuiq ghaq geufluf-eu Gaqyaqpar jawr-eu gar bi sheuqghae-euq mae.

Beqtuvluv, Yeqsur-anr Maqsiq Laer Pyaer-euq

²⁵ Khoerngae, Sirmoq Beqtuvluv gawqyawf yawf-awr yawgav lmrluf ngae, aqcawq, aqyawf-anr narhaq-eu, “Nawr khawf aqyawf-euq zaqlanr tiq ghaq maqngeur lor?” Khoerngae, Beqtuvluv pyaer-eu, “Ngar maqngeur.”

²⁶ Beqtuvluv nae naqpaf coertsaev-euq khoerghaq-euq aqyuif aqnyir pyeuf-eu, pirma yawhuiq ghaq-euq kuirlaf zaqkhav tiq ghaq narhaq-eu, “Nawr yarkmr-euq lafkhoer, khoerghaq naeq-aer jawrluf ngae, ngar, nawq-anr mawr-euq maqngeur-a laq?”

²⁷ Beqtuvluv, ngar maqngeur laer tiq pov parpyaer-euq mae. Khoerlof-aer aerghaq-euq naeq-aer yapoer doerlar-euq mae.

Pirlav, Yeqsur-anr Narhaq-euq

²⁸ Uqshawq yawnaf-aer, aqyawfmaf, Yeqsur-anr Gaqyaqpar jawr-eu gar nae guirmaf dzoeqnymr-anr sheuqghae-euq mae. Aerkhawf, aqyawfmaf Baqsaqkaq yawbui-anr dzaqtaf nya’ni, guirmaf dzoeqnymr-anr maq urler-aq. Urler nar-aq, aqyawf maf-euq mawrdo maqshawrni pyeuf-ir-eu mae.

²⁹ Khoermirnae, Pirlav, aqyawfmaf jawr-eu gar dovle-awr narhaq-eu, “Nawmaf, tsawrhaq heughaq-anr yawlaeq aqjeq daq-eu le?”

³⁰ Aqyawfmaf aerkhof naeq-eu, “Tsawrhaq teughaq yawdoer jeq maqmr-euq lawnmr-aq, nga’maf, nawr jawr-eu gar maq sheuqha lar-ar.”

³¹ Pirlav, aqyawf maf-anr aernaeq-eu, “Nawmaf, aqyawf-anr sheuqghae-awr, nawmaf-euq zanrdawq jav-eu lof-aer aqyawf-anr yarkhaq darnaeq-awq.” Khoerngae, Yurdav tsawrhaq, aqyawf-anr aernaeq-eu, “Nga’maf, tsawrhaq tiq ghaq shirni maq janrkhmq-a.”

³² Aqyawfmaf khoerlof-aer aer-eu-aq, Yeqsur, aqyawf aqjox-aer yashir-eu garkawv, Yeqsur nae aertaq-euq lof-aer byanlarni aer-eu mae.

³³ Khoernar-aq, Pirlav, guirmaf dzoeqnymr-anr par urler-awr, Yeqsur-anr kur-awr aqyawf-anr narhaq-eu, “Nawr, Yurdav tsawrhaq-euq Sanqpaq le lor?”

³⁴ Yeqsur, aqyawf-anr aerkhof naeq-eu, “Dawq teudawq, nawr yawqha yawqha noeqdov-awr narhaq-eu le laq? Maqngeur nar-aq, ngaq-euq garkawv aqcawq, nawq-anr aernaeq laf-aq lor?”

³⁵ Pirlav aerkhof naeq-eu, “Ngar, Yurdav tsawrhaq nga laq? Nawq-euq tsawrjeuq tsawrca hawr-eu pirma aqyuif deuq, nawq-anr ngar jawr-eu gar sheuqha lar-euq mae. Nawr aqjeq mr-euq le?”

³⁶ Yeqsur aerkhof naeq-eu, “Ngar uvlanr-eu jeq-aq, mirtsaq heu-anr maqtaf. Ngar uvlanr-eu jeq mirtsaq heu-anr taf-eu lawnmr-aq, ngar, Yurdav tsawrhaq-euq aqlaf-anr maqya keuv-ir ni, ngaq-euq kuirlaf deuq guirdeuvdeuv taef-a. Aerkhawf, nymq-mr ngar uvlanr-eu jeq-aq, mirtsaq heu-anr maqtaf.”

³⁷ Khoermirnae, Pirlav, aqyawf-anr narhaq-eu, “Tox-aer mar-iq, nawr sanqpaq le lor?” Yeqsur aerkhof naeq-eu, “Nawr, ngaq-anr sanqpaq laer aer-eu tsaq mae. Ngar yawtsaq yawdawr-euq gharduq sarkir kamqni daefle-awr, ngar heu-euq gharduq mirtsaq-euq khoertav oe-euq ma. Yawtsaq yawdawr-anr khartaf-eu tsawrhaq-aq, ngaq-euq tersar-anr narhaq-eu mae.”

³⁸ Khoerngae, Pirlav, Yeqsur-anr narhaq-eu, “Yawtsaq yawdawr laer-aq, aqjeq la?” Pirlav khoerlof-aer aer-awr, Yurdav tsawrhaq jawr-eu gar pardov-ir-awr nae heulof-aer aernaeq-euq mae, “Ngar, tsawrhaq heughaq-euq lafkhoer yawlaeq tiqjeq-iq maq povmawrnya nya.

³⁹ Aerkhawf, Baqsaqkaq yawbuibui ngae, nawmaf-euq zanr jav-eu lof-aer, ngar, nawmaf-euq gharduq kuv-anr nyaefur taq-euq tiq ghaq-anr ya pyaeqnaeq-eu mae. Khoermirnae, ngaq nae nawmaf-euq gharduq, Yurdav tsawrhaq-euq Sanqpaq heughaq-anr bi pyaeqnaeqmawf mir-a lor?”

⁴⁰ Khoerngae, aqyawfmaf dawqtawvluf pargur-awr aer-eu, “Teughaq maqngeur-eu, Baqlaqbar-anr pyaeq-awq.” Baqlaqbar khoerghaq-aq tanrjoe mae.