Yoˇhaˬ 14 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yeqsur-aq, Garma Mae

¹ “Nawmaf-euq nuima maqsar-aer taqghae. Nawmaf, Miqyaer-anr jan-awr, ngaq-anr khawf jan-awq.

² NgaqDa-euq nymr-anr jawrkhar zaganq mae. Jawrkhar maqza lawnmr-aq, ngar, nawmaf-anr aernaeq taef-a. Ngar, nawmaf-euq gharduq jawrzar lavsavler ma.

³ Ngar ghofler-awr, nawmaf-euq gharduq jawrzar lavsav ghaq-euq nar-aq, ngar tiq pov paroe-awr, nawmaf-anr sheuqlaqle ma. Aqjeq mirnae aernar-aq, ngar aqgar jawr nar-aq, nawmaf khawf khoergar yajawr taef-a.

⁴ Ngar aqgeugar leluf-eu la laer nawmaf siqnya-awr, ngar le-eu garma-anr khawf nawmaf siqnya-eu mae.”

⁵ Tormav, aqyawf-anr aernaeq-eu, “Sanqpaq-or! Nawr aqgeugar leluf-eu la laer nga’maf maq siqnya nya. Nga’maf, garma khoerkanr-anr aqjox-aer siqnya nmr-mq?”

⁶ Yeqsur, aqyawf-anr heulof-aer aernaeq-euq mae, “Ngar-aq, garma ma, yawtsaq yawdawr jeq hawr-eu daef-eu jeq khawf ngeur ma. Ngaq-anr maqghoe nar-aq, tsawrhaq tiqghaq-iq Aqda jawr-eu gar maq lekeuv nya-a.

⁷ Nawmaf, ngaq-anr siqnya-euq nar-aq, ngaqDa-anr khawf siqnya-euq mae. Iqnan tafnar-aq, nawmaf, aqyawf-anr ya’mawr-awr, aqyawf-anr ya siqnya-euq mae.”

⁸ Pirlirpuv, aqyawf-anr aernaeq-eu, “Sanqpaq-or! Nga’maf-anr Aqda bimawr naeqlaf-awq. Ya’mawr nar-aq, nga’maf nuikhanrshir ma.”

⁹ Yeqsur, aqyawf-anr heulof-aer aernaeq-euq mae, “Pirlirpuv-or! Ngar, nawq naeq-aer heumyanni jawrlaf-euq khawf, nawr, ngaq-anr maq siqnya-eu le siq lor? Ngaq-anr mawr-euq tsawrhaq-aq, Aqda-anr mawr-euq mae. ‘Nga’maf-anr Aqda bimawr naeqlaf-awq’ laer nawr aqjox-aer aer-eu le?

¹⁰ Ngar, Aqda-euq lafkhoer jawr-awr, Aqda, ngaq-euq lafkhoer jawr-eu mae laer nawr maqjan-eu le lor? Ngar, nawmaf-anr aernaeq-eu dawqdeuq-aq, ngaq-euq aryaq zmq-awr aer-eu maqngeur. Aerkhawf, ngaq-euq lafkhoer jawr-eu Aqda, aqyawf-euq gar heudeuq mrluf-eu mae.

¹¹ Ngar, Aqda-euq lafkhoer jawr-awr, Aqda, ngaq-euq lafkhoer jawr mae laer jan-awq. Maqngeur nar-aq, gar khoerdeuq-euq baqda’nae taef-aer khawf ngaq-anr jan-awq.

¹² “Ngar, nawmaf-anr aqdirma-aer aernaeq nyar, ngaq-anr jan-eu tsawrhaq-aq, ngaq nae mr-euq gardeuq mr taef-a. Ngar, ngaqDa jawr-eu gar ghofler-eu mirnae, aqyawf heunav maqtser huiq-eu gardeuq mr taef-a.

¹³ Zaqyo-euq baqda’nae Aqda yawshaef khanqsaer za’ni, nawmaf, ngaq-euq tsawrmyanr-anr ghoe-awr kharshar-eu yawqjeq navluf ngar bi pyeuflar ma.

¹⁴ Nawmaf, ngaq-euq tsawrmyanr-anr ghoe-awr, aqgeu jeq shar-eu maqkaq, ngar bi pyeuflar ma.”

Yawshawr Saflar Bi’oe Ma Laer Aer-eu

¹⁵ “Nawmaf, ngaq-anr gaq nar-aq, ngaq nae bif-euq dawqdeuq-anr mrcaw taef-a.

¹⁶ Ngar, Aqda-anr shar-awr, aqmyanluf nawmaf naeq-aer bijawr-eu gharduq, aqyawf, nawmaf-anr Cawba-eu ghaq, tiq ghaq bifnaeqlaf taef-a.

¹⁷ Aqyawf-aq, yawtsaq yawdawr-euq Saflar mae. Mirtsaqzaq, aqyawf-anr maq siqnya-aer maq mawrnya-eu mirnae, aqyawf-anr maq hageuf nya-a. Aerkhawf, nawmaf, aqyawf-anr siqnya-eu mae. Aqjeq mirnae aernar-aq, aqyawf, nawmaf naeq-aer jawrluf-awr, nawmaf-euq lafkhoer jawr taef-a.

¹⁸ “Ngar, nawmaf-anr murcoeq aqnmr lof-aer maq byaerdzaeyaf. Ngar, nawmaf jawr-eu gar par ghofle ma.

¹⁹ Tiqkhaeq ghae nar-aq, mirtsaqzaq, ngaq-anr maqpar ya’mawr-ar. Aerkhawf, nawmaf, ngaq-anr ya’mawr taef-a. Aqjeq mirnae aernar-aq, ngar daefluf-eu mirnae, nawmaf khawf yadaef taef-a.

²⁰ Khoerngae nan keuvle nar-aq, ngar, Aqda-euq lafkhoer jawr-awr, nawmaf, ngaq-euq lafkhoer jawr-awr, ngar khawf nawmaf-euq lafkhoer jawr-eu gar nawmaf yasiq taef-a.

²¹ Ngaq nae bif-euq dawq yagaq-awr mrcaw-eu tsawrhaq-aq, ngaq-anr gaq-eu tsawrhaq mae. Ngaq-anr gaq-eu tsawrhaq-anr ngaqDa gaq taef-a. Khoeruqtaf, ngar khawf aqyawf-anr gaq-awr, ngaq-euq mawrdo aqyawf-anr byacaevni bimawr ma.”

²² Yurdav laer kur-eu (Yurdav Irsaqgaqliqoq maqngeur-eu) ghaq narhaq-eu, “Sanqpaq-or! Nawq-euq mawrdo, nga’maf-anr byacaevni bimawr-eu gar nae, aqjeq mirnae mirtsaqzaq-anr maqbi mawr-eu le?”

²³ Yeqsur, aqyawf-anr heulof-aer aerkhof naeq-euq mae, “Aqgeu ghaq maqkaq, ngaq-anr gaq nar-aq, ngaq-euq dawq-anr mrcaw taef-a. Khoeruqtaf, ngaqDa khawf aqyawf-anr gaq-awr, nga’nyaf Dazaq, aqyawf jawr-eu gar oe-awr, aqyawf naeq-aer jawr ma.

²⁴ Ngaq-anr maqgaq-eu tsawrhaq-aq, ngaq-euq dawq-anr maq mrcaw-ar. Nawmaf ya gaqluf-eu dawq heu-aq, ngaq-euq dawq maqngeur, ngaq-anr khaerghae lef-euq Aqda Miqyaer-euq dawq mae.

²⁵ “Ngar, nawmaf naeq-aer jawrluf ngae, dawq heudeuq nawmaf-anr aernaeq-euq ma.

²⁶ Ngaq-euq tsawrmyanr-euq uqmov nae, Aqda, Cawba-eu ghaq pyeuf-eu Yawshawr Saflar-anr bi’oe ngae, aqyawf, nawmaf-anr yawqjeq navluf maeqnaeq laf-awr, ngaq nae nawmaf-anr aernaeq taqyaf-euq dawq khoer dawqtawvluf, aqyawf, nawmaf-anr bi noeqdovlar taef-a.

²⁷ “Ngar, nawmaf-anr nuisar of-eu jeq bifyaf ma. Ngar, nawmaf-anr bif-eu ngaq-euq nuisar of-eu jeq heu-aq, mirtsaqzaq bif-eu lof-aer bif-eu maqngeur. Nawmaf-euq nuima maqsar-aer taqghae, guv khawf taqguv.

²⁸ ‘Ngar ghofler khawf, nawmaf jawr-eu gar tiq pov paroe ma’ laer ngaq nae nawmaf-anr aernaeq-euq dawq nawmaf yagaq-euq mae. Nawmaf, ngaq-anr gaq nar-aq, ‘Ngar, Aqda jawr-eu gar ghofler ma’ laer aer-eu mirnae, nawmaf laqkhaqcaer taef-a. Aqjeq mirnae aernar-aq, Aqda-aq, ngaq-euq navmaqtser huiq-eu mae.

²⁹ “Khoerdeuq pyeuflar ngae nawmaf janni, nymq-mr maq pyeuflar-euq minav-aer, ngar, nawmaf-anr aernaeq-eu ma.

³⁰ Aqkar nar-aq, ngar, nawmaf naeq-aer dawq ghawqmya’ni maqpar ngaeq ma. Aqjeq mirnae aernar-aq, mirtsaq heu-anr uvlanr luf-eu ghaq larluf-eu mae. Aqyawf, ngaq-euq khoertav baoq tiqpawf-iq maqjav-a.

³¹ Aerkhawf, ngar, Aqda-anr gaq-eu nga laer mirtsaqzaq yasiqni, Aqda, ngaq-anr dawq bifnaeq laf-euq lof-aer ngar mr-eu ma. Tur-awq, aqdui ir kar-eur.”