Yoˇhaˬ 13 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yeqsur, Zaqlanr Deuq-euq Aqkuir Dzuifnaeq-euq

¹ Baqsaqkaq yawbui bui-eu maq keuvlar-euq minav-aer, Yeqsur-aq, aqyawf, mirtsaq heu-anr yaghawq-awr, Aqda jawr-eu gar ya ghofler-eu aryamq keuvlar-euq mae laer siqnya luf-eu mae. Aqda-aq, mirtsaq-euq khoertav jawr-eu aqyawf-euq tsawrhaq-anr gaq-awr, arsaqsaq ngae keuvni, aqyawf, aqyawf maf-anr gaq-euq mae.

² Cifhawq dzaqluf ngae, naef sanqpaq nae Sirmoq-euq zaqyo, Yurdav Irsaqgaqliqoq-euq nuima-euq lafkhoer, Yeqsur-anr anqdzaq-eu nuinoeq dawvanr naeq-euq mae.

³ Aqda Miqyaer nae aqyawf-euq aqlaf-euq lafkhoer yawqjeq navluf a’naeq jir-awr, aqyawf, Miqyaer jawr-eu gar nae oe-awr, Miqyaer jawr-eu gar ya ghofler-eu mae laer Yeqsur siqnya luf-eu mae.

⁴ Khoerngae, Yeqsur hawqjawq jawqluf-eu gar nae tur-awr, aqyawf-euq paerkhanq paermanr laevtaq ghaq-euq nar-aq, parjae yur-awr nae jof-anr paf-euq mae.

⁵ Khoernar-aq, aqyawf, ircuf saerbyaer-anr ircuf shaevdanq-awr, danqbae-awr, aqyawf-euq zaqlanr deuq-euq aqkuir-anr dzuifshawr naeq-euq uqtaf, aqyawf-euq jof-anr pafluf-eu parjae nae sivgui naeq-euq mae.

⁶ Khoernar-aq, aqyawf, Sirmoq Beqtuvluv jawr-eu gar irkeuv ngae, Beqtuvluv, aqyawf-anr narhaq-eu, “Sanqpaq-or! Nawr, ngaq-euq aqkuir dzuifshawr naeq-eu laer ghae-eu le lor?”

⁷ Yeqsur aerkhof naeq-eu, “Nymq-mr ngar janrluf-eu jeq-anr nawr maq siqnya-eu khawf, aqkar ghovshaw nyalar taef-a.”

⁸ Beqtuvluv, aqyawf-anr aernaeq-eu, “Nawr, tiqjawr-iq ngaq-euq aqkuir maqya dzuifshawr naeq-ar.” Yeqsur, aqyawf-anr aerkhof naeq-eu, “Ngar, nawq-anr maq dzuifshawrnaeq nar-aq, nawr, ngaq-anr maqtaf-a.”

⁹ Sirmoq Beqtuvluv, aqyawf-anr aernaeq-eu, “Sanqpaq-or! Ngaq-euq aqkuir taef-aer maqngeur-eu, ngaq-euq aqlaf khawf dzuifshawr-awr, ngaq-euq uqduq khawf tsiqnaeq laf-awq.”

¹⁰ Yeqsur, aqyawf-anr aernaeq-eu, “Ircuf dzuifghaq-euq tsawrhaq-aq, aqkuir dzuif-euq nar-aq, mawrdo dolan-aer shawr-eu mae. Nawmaf-aq, yawshawr mae. Aerkhawf, yawqghaq navluf-aer shawr-eu maqngeur-a.”

¹¹ Yeqsur, aqsur ghaq, aqyawf-anr anqdzaq-eu laer ghae-eu la laer siqnya-eu mirnae aer-eu, “Nawmaf yawqghaq navluf-aer shawr-eu maqngeur-a.”

¹² Khoerngae, Yeqsur, aqyawf maf-euq aqkuir dzuifshawrnaeq ghaq-euq nar-aq, aqyawf-euq paerkhanq paermanr dm-awr parnuir-euq mae. Khoerngae, aqyawf, aqyawf maf-anr heulof-aer aernaeq-euq mae, “Ngar, nawmaf-anr aqjox-aer janrnaeq-euq gar nawmaf ghovshaw-euq ma lor?

¹³ Nawmaf, ngaq-anr Saqlaq hawr-eu Sanqpaq laer kurluf-eu mae. Nawmaf kur-eu-aq tsaq mae. Aqjeq mirnae aernar-aq, ngar-aq, nawmaf kur-eu lof-aer ngeur-eu ma.

¹⁴ Ngar, nawmaf-euq Sanqpaq, nawmaf-euq Saqlaq pyeuf-eu khawf, nawmaf-euq aqkuir dzuifshawrnaeq nar-aq, nawmaf khawf tiqghaq tirghaq-euq aqkuir-anr dzuifshawr naeq-eu tsaq taef-a.

¹⁵ Ngaq nae mr-euq lof-aer nawmaf khawf mrni, nawmaf bi hawgeuf-eu laer ngar mrmaeq naeq-eu ma.

¹⁶ Ngar, nawmaf-anr aqdirma-aer aernaeq nyar, kuirlaf zaqkhav-aq, yawqha-euq yawsanr navmaqtser maq huiqdzaeq-a. Bikhaer-eu ghaq khawf, aqyawf-anr khaer-euq ghaq navmaqtser maq huiqdzaeq-a.

¹⁷ Nawmaf garkawv heudeuq siqnya-awr mr-ir nar-aq, guiqlanqhuiq taef-a.

¹⁸ “Ngar heulof-aer aer-eu-aq, nawmaf yawqghaq navluf-anr aer-eu maqngeur. Ngaq nae tserdov taq-euq tsawrhaq-anr ngar siqnya ma. Aerkhawf, ‘Ngaq naeq-aer kaqmur dzaqtaf-eu tsawrhaq, Aqyawf-euq kuirnuif bafdir-awr, ngaq-anr muirlar-eu mae,’ (Jc 41:9) laer Yaerbof-euq lafkhoer boftaq-euq lof-aer ya byanlar taef-a.

¹⁹ Garkawv heudeuq pyeuflar ngae, ngar-aq, khoerghaq ngar-a laer nawmaf janni, nymq-mr maq pyeuflar-euq minav-aer, ngar, nawmaf-anr aernaeq-eu ma.

²⁰ Ngar, nawmaf-anr aqdirma-aer aernaeq nyar, ngaq nae khaerghae-euq tsawrhaq-anr hageuf-eu ghaq-aq, ngaq-anr hageuf-eu mae. Ngaq-anr hageuf-eu tsawrhaq-aq, ngaq-anr khaerghae lef-euq ghaq-anr hageuf-eu mae.”

Aqyawf-anr Anqdzaq Taef-a Laer Yeqsur Aer-eu

²¹ Yeqsur heudeuq aerghaq ngae, aqyawf-euq saflar tiqpawf-iq maqsar-aer byacaevni aer-eu, “Ngar, nawmaf-anr aqdir aqmar-aer aernaeq nyar, nawmaf-euq lafkhoer nae tiq ghaq, ngaq-anr anqdzaq taef-a.”

²² Khoerngae, aqyawf, aqsur ghaq-anr aermawf-eu nga laer zaqlanr deuq noeq ngae maqdov-aer, tiqghaq tirghaq haw-eu mae.

²³ Zaqlanr deuq-euq lafkhoer nae Yeqsur zawr gaq-eu zaqlanr khoerghaq, Yeqsur-euq bawkhanr-anr khawqdar luf-eu mae.

²⁴ Yeqsur, aqsur ghaq-anr aermawf-eu la laer narhaqni Sirmoq Beqtuvluv, zaqlanr khoerghaq-anr lafdzawr dzawrnaeq-euq mae.

²⁵ Khoerngae, zaqlanr khoerghaq, Yeqsur-euq bawkhanr-anr khawqdar paedzaeq lef-awr narhaq-eu, “Sanqpaq-or! Aqsur ghaq la?”

²⁶ Yeqsur aerkhof naeq-eu, “Ngar, kaqmur tiq pyaeq laef-awr, aqsur ghaq-anr bifnaeq nar-aq, ngaq-anr anqdzaq-eu-aq khoerghaq mae.” Khoernar-aq, Yeqsur, kaqmur tiq pyaeq laef-awr, Sirmoq-euq zaqyo, Yurdav Irsaqgaqliqoq-anr bifnaeq-euq mae.

²⁷ Yurdav, kaqmur khoerpyaeq yurghaq-euq naeq-aer, naef Saqdaq, aqyawf-euq nuima-euq lafkhoer urler-euq mae. Khoerngae, Yeqsur, aqyawf-anr aernaeq-eu, “Nawr mr-eu laer ghae-eu jeq yawkawr-aer mr-ir-awq.”

²⁸ Yeqsur, aqyawf-anr aqjeq mirnae khoerlof-aer aernaeq-eu nga laer hawqjawq jawqluf-eu tsawrhaq tiqghaq-iq maq siqnya-a.

²⁹ Yurdav-aq, pyur pawqbaev jeqhmq-eu ghaq pyeuf-eu mirnae, aqyawfmaf, “Aqdui yawbui bui-eu gar yageuf-eu jeq zeur-ir-awq” laer Yeqsur, aqyawf-anr khaer-eu jeq nga. Maqngeur nar-aq, shaqzaq zanqzaq deuq-anr tiqjeqpaq bifnaeq-ir-eu nga laer noeq-euq mae.

³⁰ Yurdav-aq, kaqmur khoerpyaeq yurghaq-euq naeq-aer dov-ir-euq mae. Khoerngae, uqcif cifle-euq mae.

Dawq Yawshuif Tiq Dawq Bif-euq

³¹ Yurdav dov-ir ghaq-euq nar-aq, Yeqsur heulof-aer aer-eu mae, “Nymq-mr Tsawrhaq-euq Zaqyo yawshaef khanqsaer zaghaq-awr, aqyawf-euq lafkhoer Miqyaer khawf yawshaef khanqsaer za-euq mae.

³² Tsawrhaq-euq Zaqyo-euq lafkhoer Miqyaer-euq yawshaef khanqsaer za-euq ngeur nar-aq, Miqyaer khawf aqyawf-euq lafkhoer, Tsawrhaq-euq Zaqyo-anr yawshaef khanqsaer biza taef-a. Yawshaef khanqsaer biza-eu khoer-aq, yawkawr-aer biza taef-a.

³³ Ngar gaq-euq zaqdeuq-or! Ngar, nawmaf naeq-aer ghawqmyanrni maqpar yajawr-eu mae. Nawmaf, ngaq-anr pov taef-a. Aerkhawf, ‘Ngar ir-eu gar nawmaf maq oenya-a’ laer ngar, Yurdav tsawrhaq-anr aernaeq-euq lof-aer, nymq-mr ngar, nawmaf-anr khawf aernaeq-eu ma.

³⁴ Nawmaf tiqghaq tirghaq gaq-awq laer ngar, nawmaf-anr dawq yawshuif tiq dawq bif-eu ma. Ngar, nawmaf-anr gaq-euq lof-aer, nawmaf khawf tiqghaq tirghaq gaq-awq.

³⁵ Nawmaf tiqghaq tirghaq gaq nar-aq, gaq-eu khoer baqda’nae, tsawrhaq dawqtawvluf, nawmaf-aq, ngaq-euq zaqlanr ngar-a laer yasiq taef-a.”

Beqtuvluv, Yeqsur-anr Maqsiq Laer Pyaer Taef-a

³⁶ Sirmoq Beqtuvluv, Yeqsur-anr narhaq-eu, “Sanqpaq-or! Nawr aqgeugar ir-eu laer ghaeluf-eu le?” Yeqsur, aqyawf-anr aerkhof naeq-eu, “Nymq-mr ngar ir-eu laer ghaeluf-eu gar, nawr maq cantaelaf nya-a. Aerkhawf, aqkar, ngaq-euq maeqnan yacan taelaf taef-a.”

³⁷ Beqtuvluv, aqyawf-anr aernaeq-eu, “Sanqpaq-or! Nymq-mr nae ngar aqjeq mirnae nawq-euq maeqnan maq cantaelaf nya-eu la? Nawq-euq gharduq ngaq-euq zir shirdanpeuq ma.”

³⁸ Yeqsur, aqyawf-anr aerkhof-eu, “Nawr, ngaq-euq gharduq nawq-euq zir shirdanpeuq le laer? Ngar, nawq-anr aqdirma-aer aernaeq nyar, yapoer maq doerlar-euq minav-aer, nawr, ngaq-anr maqsiq laer smq pov keuvni pyaer taef-a.”