Yaˬkoˆ 5 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Smrmuiq-anr Maeqnaeq-eu Dawq

¹ Nawmaf smrmuiq muiq-eu deuq narhaq sher-eq. Shaqdui zanq duidui-eu jeq nawmaf-euq khoertav keuvle taef-a. Khoermirnae, nawmaf gurgur-aer ngoer duidui-awq.

² Nawmaf-euq myawqganq deuq-aq, cawv-ir jir-awr; nawmaf-euq maeqtsoeq-aq, aqiqshaer nae dzaqjir-euq mae.

³ Nawmaf-euq pyur hawr-eu shuir khawf shmrkaw kawjir-euq mae. Shmrkaw khoer nawmaf nae mr-euq iqbax-anr toeqmaeq-eu jeq pyeuf-eu uqtaf, miqdzaq lof-aer nawmaf-euq shaqjir-anr puivdzaqjir taef-a. Nawmaf, arsaq saq-eu arnan aryamq-euq gharduq, myawqganq pucu povuiqcu taq-euq nga.

⁴ Nawmaf-euq daeyar-anr caer biyaeq-euq tsawrhaq-anr nawmaf ghaqgarpoeq maq bifbyan-aer shuirdzaq-euq mirnae, ghaqgarpoeq khoer gurluf-awr, caer yaeq-euq deuq gur-eu tersar, Guirmaf-euq Sanqpaq Miqyaer-euq naqbawr-anr gaqkeuv ler-euq mae.

⁵ Nawmaf, mirtsaq-euq khoertav lurgha caergha-eu lafkhoer byaeqlaeq shaevdae-aer daefluf-awr, saef-eu arnan-euq gharduq, nawmaf yawqha-euq nuima cutsur taq-euq mae.

⁶ Nawmaf, dawr-awr tsaq-eu tsawrhaq-anr yarkhaq dar-awr, aqyawf-anr saef-euq mae. Aerkhawf, aqyawf, nawmaf-anr maq lavtsoeq-aq.

Or-eu Hawr-eu Guiqlanq Shar-eu

⁷ Khoermirnae, aqyuif aqnyir deuq-or! Sanqpaq Yeqsur zafkale ngae keuvni oror-aer jawr-awq. Kadzaq kadawr-eu tsawrhaq, mirtsaq-anr kataq-euq poeq-eu sanqlanq ghawqdar, arsiq arlu deuq za ngae keuvni dawq-eu mae. Uqyaer yaerbae baele-eu banq-anr nae yaersaq saqle-eu banq-anr keuvni oror-aer dawq-eu mae.

⁸ Sanqpaq Yeqsur zafka le-eu arnan paelar-euq mirnae, nawmaf khawf nuima zifdanni anr-awr oror-aer dawq-awq.

⁹ Aqyuif aqnyir deuq-or! Nawmaf yarkhaq dar-eu gar maqya daq paq-aer, tiqghaq tirghaq dawqghof taqdov. Hawsher-eq! Yarkhaq dar-eu ghaq ghovkhaeq-anr yawfluf ngar-a.

¹⁰ Aqyuif aqnyir deuq-or! Sanqpaq Miqyaer-euq tsawrmyanr-anr ghoe-awr, Miqyaer gharduq ngaeqdan-eu deuq shaqzanq daqnya-euq gar hawr-eu ornya-euq gar dzawgeuf-awq.

¹¹ Aqdui, daqdzeur ordzeur nya-euq deuq-anr guiqlanq huiq-eu tsawrhaq laer sawx-eu ma. Yorbav orcoer duidui-euq garkawv nawmaf yagaq-awr, Sanqpaq Miqyaer, aqyawf-anr aqjox-aer arsaq bisaq-euq gar khawf mawrlar-eu mae. Sanqpaq Miqyaer-aq, ghawqshaq gaq-eu jeq hawr-eu ghawqshaq gaqnaeq-eu jeq tiqbyanni anr nga laer siqlar-eu mae.

¹² Ngaq-euq aqyuif aqnyir deuq-or! Huiq duidui-eu dawq-aq heudawq mae. Tiqjeq-anr-iq ghoe-awr taqkamq. Mq-anr ghoe-awr taqkamq, mirtsaq-anr ghoe-awr nae khawf taqkamq, tiqjeq-anr-iq ghoeghoe-aer taqkamq. Nawmaf yarkhaq dar-eu gar maqya daqni, nawq-euq dawq-aq, ngeur nar-aq “Ngeur ma,” maqngeur nar-aq “Maqngeur” laer taef-aer aer-awq.

¹³ Nawmaf-euq lafkhoer, tiqghaqnav shaq-awr zanq-eu jeq-anr daqluf nar-aq, aqyawf guiqlanq shar-eu tsaq mae. Tiqghaqnav laqkhaq caer-eu ngeur nar-aq, aqyawf, Miqyaer-anr jaceuq-eu cardawq car-eu tsaq mae.

¹⁴ Nawmaf-euq lafkhoer tiqghaqnav narluf gawrluf nar-aq, aqyawf, Kalizaq armur-euq aqyuif aqtsu deuq-anr kur-eu tsaq mae. Aqyawfmaf, Sanqpaq Yeqsur-euq tsawrmyanr-anr ghoeghoe-aer, nar-eu khoerghaq-anr tsir laefnaeq-awr, aqyawf-euq gharduq guiqlanq sharnaeq-eu tsaq mae.

¹⁵ Jan-eu lafkhoer guiqlanqshar ngae, nar-eu khoerghaq taqler-awr, Sanqpaq Miqyaer, aqyawf-anr jawrsar bi dovlar taef-a. Aqyawf iqbax mrtaq-euq jav law nar-aq, aqyawf-euq iqbax-anr pyaeqnaeq taef-a.

¹⁶ Khoermirnae, nawmaf nargawr taqlerni tiqghaq tirghaq, yawqha-euq iqbax jadov-awr, tiqghaq tirghaq-euq gharduq guiqlanq shar-awq. Tsaq-awr dawr-eu tsawrhaq-euq guiqlanq shardawq-aq, huiq-eu baoq anr-awr ghawqmya jeq bi pyeuflar nya-eu mae.

¹⁷ Erlirya-aq, aqdui lof-aer ghae-eu tsawrhaq mae. Uqyaer taqbi yaerle laer aqyawf guiqlanqshar duidui ngae, smr khof taf tiq pav mirtsaq-euq khoertav uqyaer maq yaerle-aq.

¹⁸ Aqyawf guiqlanq tiq pov parshar ngae, uqyaer yaerle-awr, mirtsaq-anr dzaqla ghovcaer bawle zale-euq mae.

¹⁹ Ngaq-euq aqyuif aqnyir deuq-or! Nawmaf-euq lafkhoer tiqghaqnav yawtsaq yawdawr jeq-anr nae garbanq banq-ir-euq gar sheuqkhoflaf nar-aq,

²⁰ iqbaxzaq laeq-ir-euq gar nae sheuqkhof laf-eu khoer-aq, iqbaxzaq-euq saflar shir-eu jeq-anr nae bibuq-ir-awr, iqbax ghawqmya jeq-anr daeqkaq-eu mae laer sheuqkhof-eu khoerghaq siqnya paq-aer ghae-eu mae.