Yaˬkoˆ 4 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Mirtsaq Naeq-aer Cawq Taqcawq

¹ Nawmaf-euq lafkhoer guirdeuv deuv-eu hawr-eu caedzaq-eu jeq aqgeugar nae dovlar-euq la? Nawmaf lurgha caergha-eu gar geufmawf-eu baqda’nae, nawmaf-euq arsaer deuq deuvcae cae-eu jeq dovlar luf-eu maqngeur-a lor?

² Nawmaf maqjav-eu jeq-anr maerjuir juir-eu mirnae, aqcawq-anr saef-eu mae. Nawmaf, aqcawq-euq myawq-anr geufmawf-eu khawf maqza nya-eu mirnae, caedzaq-awr guirdeuv deuv-eu jeq dovlar-eu mae. Nawmaf maqjav-eu-aq, maqshar-eu mirnae mae.

³ Nawmaf shar-euq khawf maqza-eu-aq, nuima taq-eu maqtsaq-aer, yawqha-euq nuikhanr gharduq shar-eu mirnae mae.

⁴ Banqluf muvluf-eu tsawrhaq deuq-or! Nawmaf, mirtsaq naeq-aer cawq cawq-eu deuq-aq, Miqyaer-anr muir-eu jeq pyeuf-eu mae laer maq siqnya-eu le lor? Khoermirnae, mirtsaq naeq-aer cawq khar cawqmawf-eu tsawrhaq-aq, Miqyaer-anr muir-eu tsawrhaq mae.

⁵ “Miqyaer nae aqdui-euq lafkhoer bijawr naeqlaf-euq Saflar myavnav nav-eu mae” laer Yaerbof-euq lafkhoer boftaq-euq dawq khoerdawq yawqngaef-aer boftaq-euq nga laer nawmaf noeq-eu le lor?

⁶ Aerkhawf, Miqyaer-aq, guiqlanq yawdzanr ghawqmya’ni bifnaeq laf-eu mae. “Miqyaer, nuima huiq-eu tsawrhaq-anr lavtsoeq-awr, nuima nanqyuni anr-eu tsawrhaq-anr guiqlanq yawdzanr bif-eu mae,” (Dd 3:34) laer Yaerbof-euq lafkhoer aertaq-euq mae.

⁷ Khoermirnae, Miqyaer-euq dawq narhaq geuf-awr, naef sanqpaq-anr lavtsoeq-awq. Lavtsoeq nar-aq, naef sanqpaq, nawmaf jawr-eu gar nae caevdov taef-a.

⁸ Miqyaer-euq dawqpae taeqni jivler-awq. Jivler nar-aq, Miqyaer khawf nawmaf-euq dawqpae jivle taef-a. Iqbaxzaq-or! Nawmaf-euq aqlaf dzuifshawr-awq. Nuinoeq nyiq noeq anr-eu tsawrhaq-or! Nawmaf-euq nuima lavmuiq lavshawr-awq.

⁹ Nawmaf noeqshaq duidui-awr, tsawrngoer ngoer-awq, ngoerkhav lef-awr, uiryoer-eu jeq tsawrngoer ngoer-eu jeq bi pyeuflar-awr, laqkhaq caer-eu jeq ghawqshaq-aer ghae-eu jeq bi pyeuflar-awq.

¹⁰ Sanqpaq Miqyaer-euq maeqshi nuima nanqyuni taq-awq. Aqyawf, nawmaf-anr taqhuiq taqmanr naeqlaf taef-a.

Aqyuif Aqnyir-anr Iqbax Taqtaq

¹¹ Aqyuif aqnyir deuq-or! Nawmaf-euq yawkaq tiqghaq tirghaq taq jadoer, taq jacawv. Tsawrhaq tiqghaqnav aqyuif aqnyir-anr jadoer-awr, yarkhaqdar nar-aq, zanrdawq-anr jadoer-awr yarkhaq dar-eu mae. Nawr zanrdawq-anr yarkhaqdar nar-aq, nawr-aq, zanrdawq-anr narhaq geuf-eu tsawrhaq maqngeur-aer, zanrdawq-anr yarkhaq dar-eu tsawrhaq mae.

¹² Zanrdawq khofdawq bifnaeq laf-eu tiq ghaq taef-aer jawr-eu mae. Aqyawf-aq, tsawrhaqzaq-anr bibuq-ir nya-awr, tsawrhaqzaq-anr lavcawv nya-eu mae. Nawq-euq dawqpae jawr-eu tsawrhaq-euq khoertav yarkhaqdar paq-aer nawr aqsur ghaq le?

Nishawq-euq Garkawv Nuima Taqhuiq

¹³ Narhaq sher-eq! “Iqnan maqngeur nar-aq, nishawq, nga’maf meuq tiqmeuq nav-anr ir-awr, khoergar tiq khof jawr-ir ma. Jeqgafgaf ngae jirjeuq za taef-a” laer nawmaf tiqpavnav deuq aerluf-eu mae.

¹⁴ Aqdir aernar-aq, nishawq aqjox-aer pyeuflar-eu laer nawr maq siqnya-a. Nawmaf-euq daefzir aqgeu jeq-anr dur-eu nga? Tiqkhaeq taef-aer ya’mawr-awr byov-ir-eu ircuf-euq safkhoeq lof-aer dur-eu mae.

¹⁵ Khoermirnae, “Sanqpaq Miqyaer nuima tsaq nar-aq, aqdui yawdaef yadaef-awr, khoerjeq heujeq mr ma” laer nawmaf aer-eu tsaq mae.

¹⁶ Aerkhawf, nymq-mr nawmaf nuima huiq-awr, khanqsaer jaevluf-eu mae. Khanqsaer jaev-eu dawqtawvluf yawdoer mae.

¹⁷ Khoermirnae, tsawrhaq tiq ghaq yawmuiq jeq mr-eu tsaq mae laer siqnya-eu khawf maqmr nar-aq, khoer-aq, aqyawf-euq gharduq iqbax mae.