Yaˬkoˆ 2 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Myavpyawq Huiqnyir Taqtser

¹ Ngaq-euq aqyuif aqnyir deuq-or! Nawmaf myavpyawq huiqnyir tser-eu jeq hawr-eu yawshaef khanqsaer huiq-eu Sanqpaq Yeqsur Kali-anr jan-eu jeq taq nyaefbawv.

² Nawmaf uqduq tanq-eu laer uiqler ngae, shuir lafbaeq baeq-awr, maeqtsoeq yawmuiq dmluf-eu tiq ghaq hawr-eu maeqtsoeq yawcaer yawju-aer dmluf-eu irshaqzaq tiq ghaq urlar ngae,

³ nawmaf maeqtsoeq yawmuiq dmluf-eu ghaq-anr yawzeubaw duidui-awr, “Nuirduq yawmuiq heutsanr-anr nuirlar-awq” laer aernaeq-eu mae. Aerkhawf, irshaqzaq ghaq-anr-aq, “Nawr khoergar yawf-awq.” Maqngeur nar-aq, “Ngaq-euq aqkuir cawqtaqduq-anr nuirlar-awq” laer nawmaf aernaeq-eu mae.

⁴ Teu-aq, nawmaf myavpyawq huiqnyir tser-awr, nuinoeq yawdoer anr-awr dar-eu maqngeur nya lor?

⁵ Ngar zawr gaq-eu aqyuif aqnyir deuq-or! Narhaq sher-eq. Miqyaer, mirtsaq-euq khoertav jawr-eu irshaqzaq-anr jan-eu paw smrmuiq muiqlarni, aqyawf maf-anr tserdov-awr aqyawf-anr gaq-eu tsawrhaq jeqbir of-awr, Miqyaer uvlanr-eu lafkhoer bijawr ma laer sarjax dzaqtaq-euq tsawrhaq maqngeur-a lor?

⁶ Aerkhawf, nawmaf-aq, irshaqzaq-anr yawzeu maqbawni janrnaeq-eu nga. Nawmaf-anr khaeqnaeq khavnaeq laf-awr, nawmaf-anr yarkhaq darduq-anr gheughae-eu tsawrhaq-aq, smrmuiq smrbaw khoerdeuq maqngeur-a lor?

⁷ Nawmaf-anr biftaq-euq tsawrmyanr yawmuiq-anr yaeqbawq saerlu-aer aerluf-eu tsawrhaq-aq, aqyawfmaf maqngeur-a laq?

⁸ “Yawqha-euq mawrdo-anr gaq-eu lof-aer, yawqha-euq dawqpae jawr-eu tsawrhaq-anr gaq-awq,” (Lb 19:18) laer Yaerbof-euq lafkhoer boftaq-euq Sanqpaq-euq zanrdawq uqdzan dawq-anr nawmaf mrbyan nar-aq, muiq duidui mae.

⁹ Aerkhawf, nawmaf myavpyawq huiqnyir tser nar-aq, iqbax mrluf-eu mae. Khoeruqtaf, nawmaf mrbanq mrlaeq-euq tsawrhaq nga laer zanrdawq khoer dar-eu mae.

¹⁰ Aqjeq mirnae aernar-aq, aqsur ghaq maqkaq, zanrdawq dawqtawv luf-euq maeqnan cantae luf-eu khawf, tiq dawq-anr sanqtif tif-euq nar-aq, aqyawf-aq, dawqtawv luf-anr mrbanq-euq mae.

¹¹ “Taqbanq taqjoe” laer aer-eu khoerghaq, “Tsawrhaq-anr taqsaef,” (Di 20:13-14; Dm 5:17-18) laer khawf aer-eu mae. Khoermirnae, nawr maqbanq maqjoe-euq khawf, tsawrhaq-anr saef nar-aq, zanrdawq-anr mrbanq-euq tsawrhaq mae.

¹² Aqkar, nawmaf bibuq-ir-eu zanrdawq-anr ghoe-awr yarkhaq yabi dar-eu lof-aer ngaeq-awr tmr-awr, mr-awr shar-awq.

¹³ Aqjeq mirnae aernar-aq, aqcawq-anr ghawqshaq maqgaq-eu tsawrhaq-anr ghawqshaq maqgaqni darnaeq taef-a. Ghawqshaq gaq-eu jeq-aq, yarkhaq dar-eu jeq-anr ghaqler-eu mae.

Jan-eu Lof-aer Mrcaw-awq

¹⁴ Ngaq-euq aqyuif aqnyir deuq-or! Ngar jan ma laer tsawrhaq tiqghaqnav aer-eu khawf, maqmr maqshar nar-aq, aqjeq gardanr tsoeq-eu la? Jan-eu khoerjeq aqyawf-anr kakhofnya taef-a lor?

¹⁵ Aqyuif aqnyir tiqghaqnav zaqmiq aqbur maqaer, zaqyo aqli maqkaq, dmghaq dmlmr maqjav-aer, nan-anr nae dzaq-awr dawr-eu jeq maqjavni shaq ngae,

¹⁶ nawmaf-euq lafkhoer-euq tiqghaqnav aqyawf maf-anr, “Nuima sarlaevni ir-awq. Nawmaf lmrboqni yadm-awr, tiqdaev yadzaq luf-ur” laer aernaeq-eu khawf, aqyawf maf-euq mawrdo mawf-eu jeq maq bifnaeq nar-aq, nawmaf aer-eu khoer aqjeq gardanr tsoeq-eu la?

¹⁷ Khoerlof-aer durni, jan-eu jeq-aq, maqmr maqshar nar-aq yawshir mae.

¹⁸ “Nawr-aq, nuijan anr-awr, ngar-aq, mrluf sharluf ma” laer tiqghaqnav aer-eu gar, ngar heulof-aer aermawf mir-a: “Mr-awr shar-eu jeq maqanr-eu nawq-euq nuijan ngaq-anr bimawr naeqlaf-awq. Ngar-aq, mr-awr shar-eu lafkhoer ngaq-euq nuijan nawq-anr bimawr ma.”

¹⁹ Miqyaer tiq ghaq jawr-eu taef mae laer nawr jan-eu khoer-aq, tsaq mae. Naefdeuq khawf jan-awr, yawdzuq gan’gan-aer guv-eu mae.

²⁰ Maq sharnoeq nya-eu tsawrhaq deuq-or! Mr-awr shar-eu jeq maqanr-eu nuijan-aq, tiqjeq-iq gardanr maqtsoeq nga laer nawr siqnya’mawf mir-a lor?

²¹ Aqdui-euq aqda yawdzanr Aqbyaqhaq, aqyawf-euq zaqyo Irtsav-anr lawrduq-euq khoertav lawr ngae, aqyawf mr-awr shar-eu lafkhoer tsaq-awr dawr-eu tsawrhaq pyeuflar-euq maqngeur-a lor?

²² Aqyawf jan-eu naeq-aer tiqkawv lof-aer mr-awr shar-euq mae. Mr-awr shar-euq mirnae, aqyawf-euq nuijan khoer byanlar-euq mae laer mawrlar-eu maqngeur-a lor?

²³ “Aqbyaqhaq, Miqyaer-anr jan-eu mirnae, aqyawf-anr tsaq-awr dawr-eu tsawrhaq laer sawxnaeq-euq mae,” (Adb 15:6) laer aertaq-euq Yaerbof khoerdawq byanlar-euq mae. Khoeruqtaf, aqyawf-anr Miqyaer-euq cawq laer khawf kur-eu mae.

²⁴ Khoermirnae, tsawrhaq tiq ghaq jan-eu mirnae taef-aer tsaq-awr dawr-eu tsawrhaq pyeuflar-eu maqngeur-aer, mr-awr shar-eu lafkhoer tsaq-awr dawr-eu tsawrhaq pyeuflar-eu nga laer nawq-anr siqlar taef-a.

²⁵ Khoerlof-aer durni, Laqhar laer kur-eu mawrdo anq-eu ghaq khawf, khaerghae lef-euq khoer nyiq ghaq-anr ha-awr, garma yawqkanr yawq-anr nae bi ghofler-euq mae. Aqyawf khoerlof-aer janr-euq mirnae, tsaq-awr dawr-eu tsawrhaq pyeuflar-euq maqngeur-a lor?

²⁶ Mawrdo-aq, saflar maqanr nar-aq yawshir mae. Nuijan khawf maqmr maqshar nar-aq yawshir mae.