Yaˬkoˆ 1 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Dawqcawq Puq-eu Dawq

¹ Ngar-aq, Miqyaer hawr-eu Sanqpaq Yeqsur Kali-euq kuirlaf zaqkhav Yaqkov ma. Kharngeur-eu gar jawrbyav taq-euq tsawrjeuq 12 jeuq-anr dawqcawq puqanr lef-eu ma.

Jan-eu Jeq Hawr-eu Zaqsiq Tsawrganr

² Ngaq-euq aqyuif aqnyir deuq-or, tsermr haw-eu ghawqmya jeq nawmaf-euq khoertav keuvle ngae, laqkhaqcaer duidui-awq.

³ Aqjeq mirnae aernar-aq, nawmaf-euq jan-eu jeq-anr tsermr haw-eu khoer-aq, nawmaf-anr daqcoer orcoer-eu tsawrhaq bi pyeuflar-eu mae.

⁴ Nawmaf tiqjeq-iq maqteq-aer, byan-awr kuf-eu tsawrhaq pyeuflarni, aqmyanluf oror-aer daef-awq.

⁵ Nawmaf-euq lafkhoer tiqghaqnav zaqsiq tsawrganr teqluf nar-aq, Miqyaer-anr shar-eu tsaq mae. Miqyaer, aqyawf-anr bif taef-a. Aqjeq mirnae aernar-aq, Miqyaer-aq, aqyawf-anr kharshar-eu tsawrhaq-anr maqdaeq-aer ghawqmya’ni bif-eu mae.

⁶ Aerkhawf, nawmaf shar ngae, jan-eu nuima anr-awr shar-awq. Nuima povpov lavlav-aer tiqpawf-iq taqghae. Aqjeq mirnae aernar-aq, nuima povpov lavlav-aer ghae-eu tsawrhaq-aq, iqmalavshav-anr jaqlaer baw-awr irluv dzae-eu gar dur-eu mae.

⁷ Khoerlof-aer ghae-eu tsawrhaq-aq, Sanqpaq Miqyaer-anr nae tiqjeqnav za taef-a laer taqnoeq.

⁸ Aqyawf nuinoeq nyiq noeq anr-awr, kharmr kharshar-eu jeq-euq lafkhoer, tiqjeq-anr-iq maqzif-a.

Irshaq Hawr-eu Smrmuiq

⁹ Aqcawq-euq lafov teqni jawr-eu aqyuif aqnyir tiqghaqnav artiv gorler ngae, aqyawf laqkhaq caer-eu tsaq mae.

¹⁰ Smrmuiq muiq-eu tiqghaqnav artiv ga’awle ngae khawf, laqkhaq caer-eu tsaq mae. Aqjeq mirnae aernar-aq, smrmuiq muiq-eu tsawrhaq-aq, yarmof-euq aryaev byov-ir-eu lof-aer dur-eu mae.

¹¹ Nanrma dovlar-awr, uqtsar khavlar-awr lanrlar ngae, yarmof khoer nyoeq-ir kov-ir-eu mae. Khoerngae jawr, aryaev khoer ga-ir-awr, hawmuiq-eu jeq cawv-ir jir-eu mae. Khoergar durni, smrmuiq muiq-eu tsawrhaq khawf, yawqha-euq gar-anr khofghaluf ngae byov-ir taef-a.

Tsermr Haw-eu Jeq Hawr-eu Murjur Jur-eu Jeq

¹² Tsermr haw-eu jeq-anr yadaq ngae, daqcoer orcoer-eu tsawrhaq guiqlanq huiq-eu mae. Aqjeq mirnae aernar-aq, aqyawf daqdzeur ordzeurghaq ngae, daef-eu jeq-euq shuir uqkhov za taef-a. Shuir uqkhov khoer-aq, aqyawf-anr gaq-eu tsawrhaq deuq-anr bif ma laer Miqyaer nae sarjax dzaqtaq-euq shuir uqkhov mae.

¹³ Tsawrhaq tiqghaqnav murjur jur-eu jeq-anr yadaq ngae, “Miqyaer, ngaq-anr murjur jur-eu nga” laer taqaer. Aqjeq mirnae aernar-aq, yawdoer jeq, Miqyaer-anr murjur maqjur nya-eu uqtaf, Miqyaer-aq, tiqghaq-anr-iq murjur maqjur-a.

¹⁴ Aerkhawf, aqsur ghaq maqkaq, murjur jur-eu gar yadaq-eu khoer-aq, yawqha-euq lafkhoer anr-eu maerjuir juir-eu nuima iqbax mr-awq laer aqyawf-anr sheuqghae murghae-eu mae.

¹⁵ Khoernar-aq, aqyawf-euq lafkhoer anr-eu maerjuir juir-eu nuima, zaq jeuq-eu lof-aer jeuqler-awr, iqbax bi daefle-eu mae. Iqbax khoer huiqlovlar ngae, shir-eu jeq bi daefle-eu mae.

¹⁶ Ngar zawr gaq-eu aqyuif aqnyir deuq-or! Taq noeqbanq de-eq.

¹⁷ Guiqlanq yawmuiq dawqtawvluf hawr-eu kufdui byan duidui-eu lafsawq dawqtawvluf mq-euq khoertav jawr-eu yawshaef-euq Aqda-anr nae oe-euq mae. Aqyawf-aq, povlar parlar-eu narshmr maqbaw-aer, tiqjawr-iq maqpov maq parlar-a.

¹⁸ Khar baetaq-euq yawqjeq navluf-euq lafkhoer, aqdui-aq, awfbae baelar-euq arsiq lof-aer pyeufni, aqyawf nuima khartsaq-eu lof-aer yawtsaq yawdawr-euq dawq-anr ghoe-awr, aqdui-anr bi daefle-euq mae.

Yagaq-euq Lof-aer Mrcaw-eu

¹⁹ Khoermirnae, ngar zawr gaq-eu aqyuif aqnyir deuq-or! Nawmaf yawqghaq navluf, aqcawq dawq ngaeq-eu gar yawkawr-aer narhaq-awq, dawq ngaeq-eu taqtaeq, nuima paer-eu taqkawr.

²⁰ Aqjeq mirnae aernar-aq, tsawrhaqzaq-euq nuipaer-aq, Miqyaer-euq tsaq-awr dawr-eu jeq maqbi dovlar nya-a.

²¹ Khoermirnae, nawmaf-euq lafkhoer anr-eu yawjawf yawqjeq navluf hawr-eu yawcawv jeq dawqtawvluf byaerdzae jir-awq. Nawmaf-euq saflar-anr kakhof nya-eu, nawmaf-euq lafkhoer kataq-euq dawq-anr nuima nanqyuni anr-awr hageuf-awq.

²² Khoeruqtaf, nawmaf, naqbawr nae narhaq-eu tsawrhaq taef-aer maqpyeufni, Yaerdawq-anr mrcaw-eu tsawrhaq pyeuf-awq. Naqbawr nae narhaq-eu tsawrhaq taef-aer pyeuf nar-aq, yawqhar yawqha jaqmyawf myawf-eu tsawrhaq mae.

²³ Miqyaer-euq dawq yagaq-awr maq mrcaw-eu tsawrhaq-aq, pyawqhaw-anr haw-awr yawqha-euq myavpyawq-anr haw-eu gar dur-eu mae.

²⁴ Yawmuiq-aer hawduq-awr dov-ir ngae, yawqha-euq pyawqnaq arghaer aqjox-aer ghae-eu la laer tiqpov taef-aer ngaer-eu lof-aer dur-eu mae.

²⁵ Bibuq-ir-eu, byan duidui-eu zanrdawq-anr hawduq taq-euq uqtaf, aqmyanluf mrcaw-eu tsawrhaq-aq, aqyawf yagaq-awr maqngaerni mrdov shardov laf-eu mae. Khoerlof-aer ghae-eu tsawrhaq-aq, aqyawf mr-awr shar-eu yawqjeq navluf-euq lafkhoer guiqlanq baw taef-a.

²⁶ Tsawrhaq tiqghaqnav, “Ngar uqduq tanq-eu zanr yawmuiq-aer tawqluf-eu ma” laer noeqluf-eu khawf, aqyawf-euq maeqlar-anr maeqkawf maqnyaef nar-aq, yawqhar yawqha jaqmyawf myawfluf-eu mae. Aqyawf zanr tawq-eu khoer-aq, gardanr maqtsoeq-a.

²⁷ Murcoeq aqnmr hawr-eu miqcoeq miqma deuq shaq-eu gar cawba-eu uqtaf, mirtsaq-euq yawjawf, yawqha-anr maqbi jawflarni yanr-eu-aq, aqdui-euq Aqda Miqyaer-euq maeqshi, shawrjaevni ghae-awr maq lavjawf-euq uqduq tanq-eu zanr mae.