Tiˇtuˆ 3 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Kalizaq Aqjox-aer Yadaef-eu

¹ Aqyawfmaf garkawv heudeuq-anr maqya ngaerni, nawr yawmuiq-aer ja’noeq naeq-awq. Sanqpaq sanqma deuq hawr-eu aryaq jav-eu deuq-euq lafov yawmuiq-aer jawr-awq. Aqyawf maf-euq dawq narhaq geuf-awr, yawmuiq yawqjeq navluf mrni laeqhmq taq-awq.

² Aqcawq-anr dawqdoer taqngaeq, taq caedzaq. Nuima nanqyuni taq-eu lafkhoer tsawrhaq yawqghaq navluf-anr nuinanq nuiyu anr-eu nga laer bimawr-awq.

³ Aqjeq mirnae aernar-aq, dzeurlaf ngae aqdui khawf, aqdzawq argan gan-awr, aerdawq maq narhaq-eu uqtaf, maershuir-anr tawvler-awr, nuikhanr hawr-eu lurgha caergha-eu ghawqmya jeq-euq zaqkhav geuf-euq, muir-eu hawr-eu myavnav nav-eu lafkhoer daef-awr, aqcawq, aqdui-anr byae-eu uqtaf, aqdui khawf tiqghaq tirghaq byae-euq ma.

⁴ Aerkhawf, aqdui-euq Kakhof-eu ghaq pyeuf-eu Miqyaer, tsawrhaqzaq-anr ghawqshaq gaq-eu jeq hawr-eu aqyawf gaq-eu jeq bimawr naeqlaf ngae,

⁵ aqyawf, aqdui-anr kakhof naeqlaf-euq khoer-aq, aqdui tsaq-awr dawr-eu jeq mr-euq mirnae maqngeur-a. Aerkhawf, aqyawf, aqdui-anr ghawqshaq gaq-eu mirnae, Yawshawr Saflar-euq lafkhoer lavshuif-eu jeq hawr-eu daefpov daeqpar-eu jeq-anr taf-eu tsiqshawr-eu jeq baqda’nae, aqyawf, aqdui-anr bibuq-ir naeqlaf-euq mae.

⁶ Aqdui-euq Kakhof-eu ghaq pyeuf-eu Yeqsur Kali-anr ghoe-awr, Miqyaer, aqdui-euq khoertav Yawshawr Saflar tiqbyanni shaevdav naeqle-euq mae.

⁷ Aqyawf-euq guiqlanq yawdzanr baqda’nae, aqdui tsaq-awr dawr-eu tsawrhaq pyeuflar-awr, mqmaq maqbyav yarzir daef-eu jeq-anr noeqtmqkhar za-eu aqyawf-euq jeqbir of-eu tsawrhaq ma.

⁸ Dawq heudawq-aq, jancoer ghoecoer paq-aer ghae-eu mae. Miqyaer-anr jan-eu tsawrhaq deuq, aqmyanluf yawmuiq jeq ya’mr mae laer maqya ngaerni, ngar, nawq-anr yawmuiq-aer bimaeq bi tsovmawf mir-a. Gar khoerdeuq-aq, muiq-eu gar pyeuf-eu uqtaf, tsawrhaq yawqghaq navluf-euq gharduq gardanr tsoeq-eu mae.

⁹ Dawrga deuq tsawrpyaer pyaer-eu, tsuif gui-eu, caedzaq-eu, zanrdawq-euq garkawv pyaer-eu, heudeuq-anr garjaw jaw-awq. Aqjeq mirnae aernar-aq, garkawv khoerdeuq-aq, tiqjeq-iq gardanr maqtsoeq-eu uqtaf, yawqngaef yawqkuq mae.

¹⁰ Armur birpav-awr ghawq-ir ghaer-ir ni janr-eu tsawrhaq deuq-anr, tiqpov nyiqpov yawmuiq-aer maeqnaeq ngae maq narhaq nar-aq, aqyawf naeq-aer cawq taqcawq.

¹¹ Aqjeq mirnae aernar-aq, khoerlof-aer ghae-eu tsawrhaq deuq-aq, yawtsaq yawdawr jeq-anr byaerdzae-awr, aqmyanluf iqbax mrluf-eu mae laer nawr siqnya-eu mae. Khoerdeuq-aq, yawqhar yawqha iqbaxzaq ma laer dartsaev taq-euq mae.

Arsaq Saq-eu Maeqnaeq Tsovnaeq-eu Dawq

¹² Ngar, Aqdeqmar maqngeur nar-aq, Durjir-anr nawr jawr-eu gar bi’oe ngae, ngar jawr-eu Nirgawrbaqlir-anr yawkawr-aer lar-awq. Aqjeq mirnae aernar-aq, ngar khoergar tsanqgav yamq jawrjir ma laer noeqtsaev taq-euq ma.

¹³ Yarkhaq ja-eu tsawrhaq pyeuf-eu Seqnar hawr-eu Aqpawrluv-anr yawkawr-aer bilar-awq. Aqyawfnyaf lar ngae, kharmawf-eu yawqjeq navluf cawba naeq-awq.

¹⁴ Nawmaf yawmuiq jeq ya’mr mae laer, aqdui-euq tsawrhaq deuq-anr maeqnaeq tsovnaeq-awq. Aqyawfmaf khoerlof-aer mr nar-aq, aqyawfmaf kharmawf-eu yawqjeq navluf javlar-awr, gar maq mrdovlaf nya-eu tsawrhaq maqpyeuf-ar.

¹⁵ Ngaq naeq-aer jawr-eu tsawrhaq yawqghaq navluf, “Nawq-anr noeqmawr luf-eu ma” laer dawqtsaf tsafanr lef-euq mae. Kali-anr jan-eu lafkhoer aqdui-anr gaq-eu tsawrhaq deuq-anr, “Nga’maf noeqmawr luf-eu ma jer” laer aernaeq de-eq. Nawmaf yawqghaq navluf-euq khoertav guiqlanq yawdzanr jav luf-ur.