Tiˇtuˆ 2 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Tsaq-awr Tsanr-eu Dawqmaeq Dawqtsov

¹ Aerkhawf, nawr-aq, tsaq-awr tsanr-eu dawqmaeq dawqtsov-anr tsaqler-eu lof-aer taef-aer maeq-awq.

² Aqbawr tsawrmawq deuq-anr yawqha-euq nuima-anr ghaqlerni, aqcawq yawzeu bawni, nuima taqnya’ni maeqnaeq tsovnaeq-awq. Jan-eu jeq, gaq-eu jeq hawr-eu daqcoer orcoer-eu jeq, tiqbyan tiqlof anrlarni khawf maeqnaeq-awq.

³ Khoerlof-aer durni, aqpiq tsawrmawq deuq-anr khawf, mr-awr shar-eu, ngaeq-awr tmr-eu lafkhoer, aqcawq yawzeu bawni daef-awr, aqcawq-anr taq jabu taq jadoer, jirbaq-euq zaqkhav taqgeuf. Yawmuiq jeq maeqnaeq tsovnaeq nya-eu tsawrhaq pyeuflarni maeqnaeq-awq.

⁴ Aqyawf maf-anr khoerlof-aer maeqnaeq tsovnaeq nar-aq, aqma makhar deuq yawqha-euq khaqdzerzaq hawr-eu zaqdeuq-anr gaq-eu,

⁵ yawqha-euq nuima-anr nyaeftaeq nya-eu, yawshawr shawr-aer daef-eu, nymrkhanq-anr hawluiv nya-eu, nuima muiq-eu hawr-eu yawqha-euq khaqdzerzaq-euq lafov jawrnya-eu tsawrhaq khawf pyeuflar taef-a. Aqyawfmaf khoerlof-aer janr nar-aq, aqcawq, Miqyaer-euq dawq-anr yaeqbawq saerlu-aer aerkhar maqza-ar.

⁶ Khoerlof-aer durni, aqda dakhar deuq-anr khawf, yawqjeq navluf-euq lafkhoer nuima yawmuiq-aer taqnya’ni ghaq bif-awq.

⁷ Aqyawfmaf dzawgeuf nya’ni, yawqjeq navluf-euq lafkhoer, nawr yawmuiq jeq taef-aer mr-awr, dawqmaeq dawqtsovtsov ngae, nuima keuv-awr yawzeu baw-eu lafkhoer, dawrcoeni maeqnaeq tsovnaeq-awq.

⁸ Aqcawq iqbax taqkhar maqza’ni, tsaq-awr tsanr-eu dawq taef-aer maeqnaeq-awq. Khoerlof-aer maeqnaeq nar-aq, lavtsoeq-eu tsawrhaq, nawmaf-anr yawdoer jeq aerkhar maqza-aer, ya shafdawr-ir taef-a.

⁹ Zaqkhav deuq-aq, yawqha-euq yawsanr ghaq-euq lafov yawmuiq-aer jawr-awr, yawqjeq navluf-euq lafkhoer, aqyawf nuikhanr shirni mr-awq laer, zaqkhav deuq-anr maeqnaeq-awq. Dawqpov taqpov.

¹⁰ Myawq maqkhoeq-aer, yawqjeq navluf-euq lafkhoer sarjax zif-awq laer khawf maeqnaeq-awq. Khoerlof-aer janr nar-aq, yawqjeq navluf-euq lafkhoer aqdui-euq Kakhof-eu ghaq pyeuf-eu Miqyaer-euq dawqmaeq dawqtsov-anr ciqpoeq ciqgor taef-a.

¹¹ Aqjeq mirnae aernar-aq, tsawrhaqzaq dawqtawv luf-anr kakhof-eu laer Miqyaer-euq guiqlanq yawdzanr panmaeq naeqlaf-euq mae.

¹² Guiqlanq yawdzanr khoer, aqdui-anr heulof-aer maeqnaeq laf-eu mae. Miqyaer-anr yawzeu maqbaw-eu jeq-anr hawr-eu heuzir-anr maerjuir juir-eu jeq-anr byaerdzae-awq laer maeqnaeq laf-eu mae. Mirtsaq-euq khoertav jawr ngae, nuima taqnya-awr, tsaq-awr dawr-eu lafkhoer daef-eu uqtaf, Miqyaer-anr yawzeu baw-eu tsawrhaq pyeuf-awq laer khawf maeqnaeq laf-eu mae.

¹³ Aqdui-euq huiqdui manr duidui-eu Miqyaer pyeuf-eu, Kakhof-eu ghaq Yeqsur Kali-euq yawshaef khanqsaer dovle-eu gar, aqdui laqkhaq caertavni noeqtmq luf-eu ma.

¹⁴ Aqyawf-euq mawrdo lawrnaeq-euq khoer-aq, zanrdawq-anr leur-eu yawqjeq navluf-anr nae aqdui-anr kakhof naeqlaf-awr, aqyawf-euq gharduq aqdui-anr lavmuiq lavshawr-awr, yawmuiq jeq mr-eu gar nuima keuv duidui-eu aqyawf-euq tsawrjeuq bipyeuf-eu gharduq mae.

¹⁵ Garkawv heudeuq, nawr yawmuiq-aer maeqnaeq-awq. Aryaq dawqtawvluf anr-eu lafkhoer ngaeq-awr, ghaq bif-eu uqtaf, yawlaeq toeqmaeq naeq-awq. Tsawrhaq tiqghaq nae-iq, nawq-anr taqbi hawdoer.