Tiˇtuˆ 1 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Dawqcawq Puq-eu Dawq

¹ Ngar-aq, Miqyaer-euq zaqkhav hawr-eu Yeqsur Kali-euq ghaqkhaer Pawrluv ma. Miqyaer nae tserdov taq-euq tsawrhaq jan-eu jeq-anr cantae-awr, Miqyaer-anr yawzeu baw-eu yawtsaq yawdawr-anr siqnya larni,

² khoer-aq, mqmaq maqbyav yarzir daef-eu jeq za taef-a laer noeqtmq-eu jeq-anr dawqpaeq taq-awr, jaqmyawf maqmyawf-eu Miqyaer-aq, mqmir maq javle-euq minav-aer sarjax dzaqtaq-euq mae.

³ Aryamq tsaq ngae, dawqmaeq maeq-eu gar ghoe-awr, Miqyaer, aqyawf-euq dawq bisiqni, aqdui-anr Kakhof-eu ghaq pyeuf-eu Miqyaer, ngaq-anr khaerdar naeqlaf-euq mae.

⁴ Jan-eu jeq tiqgar dur-eu lafkhoer, aqdir ngaqli pyeuf-eu Tirtuv-anr sanqbof bofanr lef-eu ma. Aqda Miqyaer hawr-eu aqdui-euq Kakhof-eu ghaq Yeqsur Kali-euq guiqlanq yawdzanr hawr-eu nuisar of-eu jeq, nawq-euq khoertav jav luf-ur!

Kalizaq Armur-euq Aqyuif Aqtsu

⁵ Maq mrluiv-euq gardeuq mrluiv-eu uqtaf, ngaq nae nawq-anr khaertaq yaf-euq lof-aer, yawqmeuq navluf-euq lafkhoer jawr-eu Kalizaq armur-euq aqyuif aqtsu deuq-anr bi tserdov-eu laer, khoerngae, ngar, nawq-anr Gaqlaqdeq irjawlanr-anr bi jawryaf-euq ma.

⁶ Tsawrhaq tiqghaqnav, iqbax taqkhar maqza-eu, miqzaq tiq ghaq taef-aer baw-eu, zaqdeuq khawf Sanqpaq Yeqsur-anr jan-awr, aqcawq aerkhar maqza’ni yawmuiq yawshawr shawr-aer daef-eu uqtaf, zaqdeuq aerdawq narhaq-eu ngeur nar-aq, nawr khoerghaq-anr aqyuif aqtsu bigeuf-awq.

⁷ Kalizaq armur-anr hawlanr-eu tsawrhaq-aq, Miqyaer-euq myawq-anr hawpir-eu tsawrhaq pyeuf-eu mirnae, aerkhar maqza-eu, yawqha-euq nuinoeq nuilov maqgeuf-eu, nuima maqsuq-eu, jirbaq maqyaef-aer, aqcawq-anr maqdiq maqkhov-eu uqtaf, pyur-anr maerjuir maqjuir-eu tsawrhaq yapyeuf-eu mae.

⁸ Daqyan-anr ha’nya-eu, yawmuiq jeq mr-eu gar gaq-eu, noeqganr-awr daef-eu, dawr-awr tsaq-eu, yawshawr shawr-aer daef-awr, yawqha-euq nuima-anr ghaqler-eu tsawrhaq yapyeuf-eu mae.

⁹ Sarjax zif-eu dawq maeqmaeq-aer, aqcawq-anr ghaq bifnya-eu uqtaf, tsawrpyaer pyaer-eu tsawrhaq-anr maeqghaq nya’ni, aqyawf nae yadzaw-euq tsaq-awr tsanr-eu dawqmaeq dawqtsov-anr zifdanni nyaeftaeq taq-euq tsawrhaq khawf yapyeuf-eu mae.

¹⁰ Aqjeq mirnae aernar-aq, aqcawq-euq dawq maq narhaq-eu tsawrhaq ghawqmya’ni jawr-eu mae. Aqyawf maf-aq, gardanr maqtsoeq-eu dawq taef-aer ngaeq-eu uqtaf, jaqmyawf myawfmyawf-aer aqcawq-anr sheuqbanq luf-eu mae. Aqyawfmaf myaqni-aq, bawkhov maeqdzaq yaeq-eu tsawrhaq-euq lafkhoer keuq-eu mae.

¹¹ Aqyawf maf-anr maqbi ja’ni lavtsoeq-awq. Aqjeq mirnae aernar-aq, aqyawf maf-aq, pyurshuir za’ni, maqmaeq paq-aer ghae-eu jeq maeqmaeq-aer nymrkhanq khanqlan ni-anr lavcawv luf-eu mae.

¹² “Gaqlaqdeq irjawlanr-anr jawr-eu tsawrhaq deuq-aq, aqmyanluf jaqmyawf myawf-eu, bawrtsanq-euq jeqzaq yawghae deuq-anr dur-eu, yawdoer doer-awr dzaqyaef dawrbov-eu tsawrhaq mae” laer aqyawf maf-euq lafkhoer jawr-eu, Miqyaer gharduq ngaeqdan-eu tiq ghaq nae aertaq-euq dawq jav-eu mae.

¹³ Heulof-aer aertaq-euq dawq heudawq-aq tsaq mae. Khoermirnae, aqyawfmaf jan-eu jeq byanlar ziflarni, nawr, aqyawf maf-anr yawkhav-aer maeqnaeq tsovnaeq-awq.

¹⁴ Yawtsaq yawdawr dawq-anr byaerdzae-euq tsawrhaq nae dawq bif-euq deuq-anr hawr-eu Yurdav tsawrhaq-euq dawqmawq dawqoer-anr taq narhaq.

¹⁵ Yawshawr tsawrhaq deuq-euq gharduq-aq, yawqjeq navluf yawshawr mae. Aerkhawf, maqjan-aer jawflafni ghae-eu tsawrhaq deuq-euq gharduq-aq, yawshawr tiqjeq-iq maqjav-a. Aqyawf maf-euq nuinoeq nuidur hawr-eu zaqsiq nuisiq khawf yawjawf mae.

¹⁶ Aqyawfmaf, Miqyaer-anr siqnya ma laer aer-eu khawf, aqyawfmaf mrgar shargar haw nar-aq, Miqyaer-anr siqnya gar tiqpawf-iq maqdur-a. Aqyawf maf-aq, byae duiduilar paq-aer ghae-awr, aerdawq maq narhaq-eu tsawrhaq mirnae, yawmuiq jeq mr-eu tiqpawf-iq maqgeux-a.