Piˇliˇpiˆ 4 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Aqmyanluf Laqkhaq Caer-awq

¹ Khoermirnae, ngar zawr gaq-awr, mawrmawf duidui-eu aqyuif aqnyir deuq-or! Nawmaf-aq, ngaq-euq laqkhaq caerduq hawr-eu ngaq-euq shuir uqkhov ma. Ngar gaq-eu cawqdeuq-or! Nawmaf, Sanqpaq Miqyaer-euq lafkhoer zifdanni yawf-awq.

² Ngar, Irbawrdir hawr-eu Surtuv-anr Sanqpaq Miqyaer-euq lafkhoer nuinoeq tiqgar tsaq-awq laer shar-eu ma.

³ Aqdir ngaq-euq gar mrcawq pyeuf-eu ghaq-or! Zaqmiq aqbur heu nyiq ghaq-anr cawba naeq-awq laer ngar, nawq-anr khawf shar-eu ma. Aqyawfnyaf, ngaq naeq-aer guiqlanqdawq maeq-eu gar mr-euq mae. Gaqleqmeq hawr-eu ngaq-euq gar mrcawq nuideuq khawf, aqyawf maf-euq tsawrmyanr Daef-eu jeq bif-eu sanqbof-euq lafkhoer bofanr taq-euq mae.

⁴ Aqmyanluf Sanqpaq Miqyaer-euq lafkhoer laqkhaq caer-awq. Ngar tiq pov par aernaeq nyar, laqkhaq caer-awq!

⁵ Nawmaf nuima nanqyuni ghae-eu gar tsawrhaq dawqtawvluf siqnya’ni daef-awq. Sanqpaq Miqyaer dawqpae jawrluf-eu mae.

⁶ Tiqjeq-anr-iq khanq taqlanr. Aerkhawf, yawqjeq navluf-euq lafkhoer guiqlanq sharshar-aer, tanqshar-awr jaceuq-eu lafkhoer, nawmaf sharmawf-eu jeq Miqyaer-anr dzawrnaeq-awq.

⁷ Khoerlof-aer shar nar-aq, Miqyaer-anr nae dovle-euq tsawrhaqzaq maq ghovshaw nya-eu nuisar of-eu jeq, Yeqsur Kali-euq lafkhoer, nawmaf-euq nuima hawr-eu nuinoeq nuidur-anr bosav naeqlaf taef-a.

Yawmuiq Jeq-anr Sharnoeq-awq

⁸ Aqyuif aqnyir deuq-or! Arsaq saq-eu dawq-aq, heudeuq-anr sharnoeq-awq laer aermawf-eu ma. Aqdir tsaq-eu jeq, noeqpoeq paq-aer ghae-eu jeq, tsaq-awr dawr-eu jeq, shawrjaevni ghae-eu jeq, hawmuiq-eu jeq, yawmuiq mae laer aer-eu jeq, muiq-awr jaq-eu jeq hawr-eu jaceuq paq-aer ghae-eu jeq, nawmaf garkawv heudeuq dzardziv dziv-awr sharnoeq sharsawx-awq.

⁹ Nawmaf, ngaq-anr nae dzaw-awr hageuf-euq deuq hawr-eu, yagaq-awr ya’mawr-euq deuq, heudeuq dawqtawv luf-anr nawmaf mrghae-awq. Khoerlof-aer mr nar-aq, nuisar bif-eu Miqyaer, nawmaf naeq-aer jawr taef-a.

Nuijer Jer-eu Pirlirpiv Kalizaq Armur

¹⁰ Dzeurlaf ngae, nawmaf, ngaq-anr noeqkeuv-eu khawf cawba-eu aryamq maqza-aq. Aerkhawf, nymq-mr par noeqkeuv naeqlaf-eu mirnae, ngar, Sanqpaq Miqyaer-euq lafkhoer laqkhaqcaer duidui nya.

¹¹ Ngar tiqjeqpaq mawf-eu mirnae heulof-aer aer-eu maqngeur. Ngar aqgeu tiv-anr yajawr-eu law-awr khawf, khoertiv-euq lafkhoer nuikhanrshir nya’ni dzawtaq-euq ma.

¹² Ngar, nym ngae khawf daefnya-awr, javmyaq ngae khawf daefnya ma. Daev ngae khawf, maef ngae khawf, yaw’aw tiv-anr khawf, yawgor tiv-anr khawf, yawqgar navluf hawr-eu yawqjeq navluf-euq lafkhoer, ngar aqjox-aer yadaef-a laer siqnya ma.

¹³ Ngaq-anr ghaq bifnaeq laf-eu Kali-anr ghoeghoe-aer, ngar dawqtawvluf mrnya sharnya ma.

¹⁴ Aerkhawf, ngar shaqzanq daqluf ngae, nawmaf daqcaw naeqlaf-euq khoer muiq duidui nya.

¹⁵ Pirlirpiv-anr jawr-eu deuq-or! Ngar, Maqgeqdawrniv mirkhanq-anr nae dov-ir-awr guiqlanqdawq maeqbae bae-ir ngae, pyur yurnya’ni bifnaeq laf-euq-aq, nawmaf maqngeur nar-aq, Kalizaq armur nuideuq maq bifnaeq laf-aq laer nawmaf siqnya-eu mae.

¹⁶ Ngar, Tersaqlorni-anr jawr ngae khawf, ngar mawf-eu jeq-anr cawba-eu laer, nawmaf tiq pov nyiq pov dawvanrghae lef-euq mae.

¹⁷ Ngar lafsawq za’ni sharpov-eu maqngeur. Aerkhawf, nawmaf-euq jeqma-anr jirjeuq bijeuq larni sharpov luf-eu ma.

¹⁸ Nymq-mr ngar yawqjeq navluf javlof-eu uqtaf, ardzaeq jav-eu nya siq. Nawmaf nae Irbaqpawqdir-anr khaer-awr bi shaha le-euq lafsawq khoerdeuq-euq baqda’nae, ngar tiqbyanni javluf-eu ma. Lafsawq khoerdeuq-aq, Miqyaer nuikhanr shir-awr hageuf-eu, saw duidui-eu lawrnaeq-eu jeq pyeuf-eu mae.

¹⁹ Yeqsur Kali-euq lafkhoer anr-eu Miqyaer-euq yawshaef khanqsaer sanr-eu gar geuxni, nawmaf kharmawf-eu yawqjeq navluf bifnaeqlaf taef-a.

²⁰ Aqdui-euq Aqda Miqyaer, mqmaq maqbyav yarzir yawshaef khanqsaer huiq luf-ur. Aqmeq.

Arsaq Saq-eu Dawq

²¹ Yeqsur Kali-euq lafkhoer jawr-eu tsawrshawr yawqghaq navluf-anr dawqcawqpuq ma. Heugar, ngaq naeq-aer jawr-eu aqyuif aqnyir deuq khawf nawmaf-anr dawqcawq puqanr lef-euq mae.

²² Tsawrshawr dawqtawvluf, nawmaf-anr dawqcawq puqanr lef-awr, aqcawq navmaqtser, sanqpaq Gaersaq-euq nymr-anr jawr-eu deuq, nawmaf-anr dawqcawq puqanr lef-euq mae.

²³ Sanqpaq Yeqsur Kali-euq guiqlanq yawdzanr nawmaf yawqghaq navluf-euq khoertav jav luf-ur. Aqmeq.