Piˇliˇpiˆ 3 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Kali-anr Siqnya Mawf-eu

¹ Ngaq-euq aqyuif aqnyir deuq-or! Arsaq saq-eu dawq-aq heulof-aer ma. Sanqpaq Miqyaer-euq lafkhoer laqkhaq caer-awq. Ngar, nawmaf-anr bofnaeq dzeur-euq jeq tiq pov par bofnaeq-eu khawf, nawmaf-anr gardanr tsoeq-eu jeq pyeuf-eu mirnae, ngaq-euq gharduq shaq-eu jeq maqngeur nya.

² Aqkuiq lof-aer ghae-eu tsawrhaq-anr yanr-awq. Yawdoer jeq mr-eu tsawrhaq-anr yanr-awr, yawqha-euq mawrdo-anr yaeq-awr pyaev-eu tsawrhaq-anr yanr-awq!

³ Aqdui-aq, aqdir aqmar bawkhov maeqdzaq yaeq-awr, muiq-eu Saflar-euq lafkhoer Miqyaer-anr uqduq tanq-eu tsawrhaq ma. Shiqshaq-euq lafkhoer yawduq baw-eu maqngeur, Yeqsur Kali-euq lafkhoer laqkhaq caer-eu tsawrhaq ma.

⁴ Aqdir aernar-aq, ngar shiqshaq-anr yawduqbaw nya-eu ma. Aerkhawf, tiqghaqnav, yawqha shiqshaq-anr yawduqbaw ma laer noeq nar-aq, ngar, aqyawf-euq navmaqtser yawduqbaw ma.

⁵ Ngar daefle-awr yaef nan byanlar-euq nar-aq, bawkhov maeqdzaq biyaeq-euq ma. Ngar-aq, Irsaqleqlav tsawrjeuq-euq lafkhoer, Beqyaqmiq-euq arjeuq arca, Heqbyaer tsawrhaq-anr nae daefle-euq Heqbyaer tsawrhaq ma. Zanrdawq paw aerlef nar-aq, ngar-aq, Paqliqsaer tiq ghaq ma.

⁶ Nuima keuv-eu gar aerlef nar-aq, ngar-aq, Kalizaq armur-anr khaeqnaeq khavnaeq haw-euq tsawrhaq ma. Zanrdawq-anr taf-eu tsaq-awr dawr-eu jeq-anr aerlef nar-aq, ngar-aq, aerkhar maqza-eu tsawrhaq ma.

⁷ Aerkhawf, dzeurlaf ngae, ngaq-euq gharduq jirjeuq ma laer sawxtaq-euq deuq-aq, nymq-mr ngar, Kali-euq baqda’nae smq-eu jeq laer sawx-eu ma.

⁸ Aqdir aernar-aq, ngar, ngaq-euq Sanqpaq Yeqsur Kali-anr yawmuiq-aer siqnya-eu tsawrganr baqda’nae, khoerdeuq-anr smq-eu jeq laer sawxtaq-euq ma. Ngar, Kali-anr za’ni, aqyawf-euq gharduq yawqjeq navluf smq-euq gar yadaq-awr, khoerdeuq dawqtawv luf-anr javguv javmeuq lof-aer sawxtaq-euq ma.

⁹ Ngar, Kali-euq lafkhoer jawrnya’ni khoerlof-aer sawxtaq-euq ma. Zanrdawq-anr taf-eu ngaq-euq tsaq-awr dawr-eu jeq maqjav. Aerkhawf, Kali-euq lafkhoer jan-eu jeq-euq baqda’nae tsaq-awr dawr-eu jeq jav ma. Tsaq-awr dawr-eu heujeq-aq, jan-eu mirnae, Miqyaer-anr nae za-euq tsaq-awr dawr-eu jeq pyeuf-eu mae.

¹⁰ Ngar, Kali hawr-eu aqyawf ghofdaef lar-euq baoq-anr siqnya mawf-awr, aqyawf-euq shaqzanq-anr daqcaw mawf-eu uqtaf, aqyawf shir-euq lof-aer shirmawf mir-a.

¹¹ Aqjox-aer ghae-awr nae law-awr khawf, ngar shir-euq gar nae ya ghofdaef lar-eu gar noeqtmq-eu ma.

Arpyar Jav-awr Daef-eu

¹² Ngar zadzeur-euq ma laer aer-eu maqngeur. Nymq-mr ngar byanlar-euq ma laer aer-eu khawf maqngeur. Yeqsur Kali, ngaq-anr nyaeftaeq taq-euq lof-aer, ngar khawf byan-eu jeq-anr nyaefza nya’ni laejae-eu lafkhoer taeluf-eu ma.

¹³ Aqyuif aqnyir deuq-or! Ngar nyaefza dzeur-euq ma laer sawx-eu maqngeur. Aerkhawf, ngar heu tiq jeq mrluf-eu ma. Narkhan paw dzeurlaf-euq deuq-anr ngaer-awr, maeqhu paw jav-eu deuq-anr taemir nya’ni laejae luf-eu ma.

¹⁴ Yeqsur Kali-euq lafkhoer Miqyaer-euq zawr gor-eu kur-eu jeq-euq lafsawq za’ni, ngar arpyar-anr hawtsov taq-awr taeluf-eu ma.

¹⁵ Khoermirnae, aqdui saflar paw tsawrkhav khavlar-euq yawqghaq navluf nuima khoerlof-aer taq kar-eur. Nawmaf noeq-eu tiqjeqnav beugar-eu nar-aq, Miqyaer, nawmaf-anr garkawv khoer panmaeq naeqlaf taef-a.

¹⁶ Aqjox-aer law-awr khawf, aqdui nuima tiqgar taf-awr, aqdui aqgeu tiv-anr zataq-euq ngeur nar-aq, khoertiv-anr geuxni daef kar-eur.

Mqtav Mirkhanq-euq Zaqlanr

¹⁷ Aqyuif aqnyir deuq-or! Nawmaf tiqkawv lof-aer ngaq-anr dzawgeuf-awr mrcaw-awq. Nga’maf hawgeufduq pyeuf-eu gar dzawgeuf-euq deuq-anr khawf hawdov nya-awq.

¹⁸ Aqjeq mirnae aernar-aq, dzeurlaf ngae, khoerdeuq-euq garkawv, ngar, nawmaf-anr ghawqmya pov aernaeq-euq ma. Nymq-mr khawf myavbir dovdov-aer tiq pov par aernaeq nyar. Aqyawf maf-aq, Kali-euq lafyaq-anr muir-eu tsawrhaq mae.

¹⁹ Aqyawf maf-euq uqmav-aq, aqyawf maf-euq miqyaer pyeuf-awr, aqyawf maf-euq khanqsaer-aq, shafdawr paq-aer ghae-eu jeq-euq lafkhoer jav-eu uqtaf, aqyawf maf-euq nuinoeq-aq, mirtsaq-anr taf-eu jeq-anr sharnoeq-eu mirnae, arsaq saqlar ngae-aq, aqyawfmaf yacawv-ir taef-a.

²⁰ Aerkhawf, aqdui-aq, mqtav-euq mirkhanqzaq pyeuf-awr, Kakhof-eu ghaq Sanqpaq Yeqsur Kali-anr nuima keuv duidui-eu lafkhoer dawqluf-eu ma.

²¹ Aqyawf, yawqjeq navluf-anr aqyawf-euq uqmov bijawr bijav-eu baoq-anr ghoe-awr, yawshaef khanqsaer jav-eu aqyawf-euq mawrdo lof-aer pyeuflarni, aqdui-euq teq-eu mawrdo heu-anr janrpar naeqlaf taef-a.