Piˇliˇpiˆ 2 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Kali Nuima Taq-eu Lof-aer Taq-awq

¹ Khoermirnae, Kali-euq lafkhoer nuima sarlaevni ghae-awr, gaq-eu lafkhoer nuima sarlar-euq uqtaf, muiq-eu Saflar naeq-aer cawq cawqtaf-awr, ghoer-awr gaq-eu jeq hawr-eu ghawqshaq gaq-eu jeq anr nar-aq,

² ngar laqkhaq caer-eu jeq byanlarni, nawmaf nuinoeq tiqgar bidur-awr, gaq-eu tiqkawv lof-aer bidur-eu uqtaf, nuima tiqgar gm-awr, nuinoeq tiqjeq taef-aer bipyeuf-awq.

³ Yawqha, aqcawq taf-aer dzaeqlerni sharnoeq-awr khanqsaer jaev-eu gharduq tiqjeq-iq taqmr. Nuima nanqyuni taq-awr, yawqhar yawqha taqhuiq-eu navmaqtser, aqcawq-anr taqhuiq-awq.

⁴ Nawmaf yawqghaq navluf, yawqha-anr taf-eu garkawv taef-aer maq sharnoeq-aer, aqcawq-anr taf-eu garkawv khawf sharnoeq-awq.

Nuinanq Nuiyu Taq-awr Bi Ciqgor-euq

⁵ Yeqsur Kali nuima taq-eu lof-aer, nawmaf khawf taq-awq.

⁶ Aqyawf, Miqyaer pyeuf-eu khawf, Miqyaer lof-aer pyeuf-awr di-eu jeq-anr ya nyaeftaeq taq-eu mae laer maqnoeq-aq.

⁷ Aqyawf, tsawrmyanr muiq-eu jeq-anr byaerdzae yaf-awr, kuirlaf zaqkhav geuf-eu jeq-anr hageuf-euq uqtaf, tsawrhaq lof-aer daefle-euq mae.

⁸ Aqcawq, aqyawf-anr tsawrhaq lof-aer pyeuf-eu gar ya’mawr-euq mae. Aqyawf nuinanq nuiyu taq-awr, shir-eu gar keuvni aerdawq narhaq geuf-euq mae. Shir-euq khoer-aq, lafyaq-euq khoertav shir-euq mae.

⁹ Khoermirnae, Miqyaer, aqyawf-anr taqhuiq taqmanr naeq-awr, aqyawf-anr tsawrmyanr dawqtawv luf-euq navmaqtser gordzaeq-eu tsawrmyanr bifnaeq-euq mae.

¹⁰ Mq-euq khoertav, mirtsaq-euq khoertav hawr-eu mirtsaq-euq dawqdan khardaef kharjawr-eu jeq, Yeqsur-euq tsawrmyanr-anr yawqghaq navluf pawqtsuif pawqdmq yadmq taef-a.

¹¹ Khoeruqtaf, Aqda Miqyaer-euq yawshaef khanqsaer za’ni, maeqlar yawqlar navluf, Yeqsur Kali-aq, Sanqpaq Miqyaer mae laer ya aerdov taef-a.

Yawshaef Lof-aer Bya-awq

¹² Khoermirnae, ngar zawr gaq-eu cawqdeuq-or! Ngar, nawmaf naeq-aer jawr ngae, nawmaf aqmyanluf ngaq-euq dawq narhaq geuf-euq lof-aer, khoernav maqtser, nymq-mr ngar, nawmaf naeq-aer maqjawr ngae khawf ngaq-euq dawq narhaq geuf-awq. Nawmaf, yawqha-euq kakhof-eu jeq za’nya paq-aer, guv-awr yawdzuq dzuq-eu lafkhoer laejae duidui-awq.

¹³ Aqjeq mirnae aernar-aq, Miqyaer nuikhanr shir-eu lof-aer, nawmaf mrmawf-eu nuima anrlar-awr mrnya’ni, Miqyaer, nawmaf-euq lafkhoer gar mrluf-eu mae.

¹⁴ Nawmaf kharmr kharshar-eu jeq-euq lafkhoer, tiqghaq tirghaq dawqghof maqdov-aer tsawrpyaer maqpyaerni mr-awq.

¹⁵ Khoerlof-aer mr nar-aq, nawmaf iqbax taqkhar maqza-aer, aqcawq-anr maqcoeq maqciv-eu tsawrhaq pyeuf taef-a. Khoeruqtaf, nuighof anr-awr, nanrpov-aer daefluf-eu heuzir-euq tsawrhaq hawr-eu mirtsaqzaq-euq ghanrcae, nawmaf-aq, yawlaeq maqanr-eu yawshaef lof-aer bya’naeq luf-eu Miqyaer-euq zaq pyeuf taef-a.

¹⁶ Daef-eu jeq bif-eu dawq-anr zifdanni nyaeftaeq taq-awq. Khoerlof-aer mr nar-aq, Kali-euq arnan keuvle ngae, ngaq nae caev-awr, ngaq nae mr-awr shar-euq yawqngaef maqngeur nga laer ngar laqkhaq yacaer taef-a.

¹⁷ Nawmaf-euq jan-eu jeq-anr taf-eu uqduq tanq-eu gar hawr-eu, lawrnaeq-eu jeq-euq khoertav ngaq-euq mawrdo shaevdav-awr, lawr-eu jeq lof-aer yabi shaevdav-eu law khawf, ngar laqkhaq caer-awr, nawmaf dawqtawvluf naeq-aer laqkhaq cawcaer ma.

¹⁸ Khoerlof-aer durni, nawmaf khawf laqkhaq caer-awr, ngaq naeq-aer laqkhaq cawcaer-awq.

Tivmorseq Hawr-eu Irbaqpawqdir

¹⁹ Ngar, nawmaf-euq garkawv yasiq-awr nuima ghaq anrlarni, ghawqmyanr maqghae-aer, Tivmorseq, nawmaf jawr-eu gar bi’oe ma laer Sanqpaq Yeqsur-euq lafkhoer noeqtmq luf-eu ma.

²⁰ Aqjeq mirnae aernar-aq, ngaq naeq-aer nuima tiqsiq taef-aer taq-awr, nawmaf-euq gharduq nuima shawrjaevni sharnoeq naeq-eu tiqghaq-iq maqjawr-a.

²¹ Tiqghaq-iq Yeqsur Kali-euq gharduq maq sharnoeq-aer, yawqghaq navluf yawqha-euq gharduq taef-aer povluf-eu mae.

²² Aerkhawf, nawmaf, Tivmorseq aqjox-aer ghae-eu tsawrhaq la laer siqnya-eu mae. Zaqyo tiq ghaq, aqda naeq-aer gar mr-eu lof-aer, guiqlanqdawq maeq-eu gar, aqyawf, ngaq naeq-aer mrluf-eu mae.

²³ Khoermirnae, ngaq-anr aqjox-aer pyeuflar-eu nga laer ngar ya siqnya-euq naeq-aer, tiqpov taef-aer aqyawf, nawmaf jawr-eu gar bi’oe ma laer ngar noeqtmq luf-eu ma.

²⁴ Ngar khawf ghawqmyanr maqghae-aer nawmaf jawr-eu gar ya’oe taef-a laer, Sanqpaq Yeqsur-euq lafkhoer yawduqbaw ma.

²⁵ Ngaq-euq maernmr Irbaqpawqdir-anr nawmaf jawr-eu gar bighofle-eu tsaq-eu paq laer khawf ngar sharnoeq luf-eu ma. Aqyawf-aq, ngaq-euq gar mrcawq hawr-eu, saflar paw-euq guirdeuv deuvcawq mae. Nawmaf nae ngar mawf-eu jeq-anr bi cawba-eu laer khaerlef-euq tiq ghaq khawf pyeuf-eu mae.

²⁶ Aqyawf, nawmaf yawqghaq navluf-anr mawrmawf duidui-eu mae. Aqyawf nar-euq garkawv nawmaf yagaq-euq mirnae, aqyawf noeqshaq duidui-euq mae.

²⁷ Aqdir aernar-aq, aqyawf shirtaw taeqni nar-euq mae. Aerkhawf, Miqyaer, aqyawf-anr ghawqshaq gaqnaeq-euq mae. Aqyawf-anr taef-aer ghawqshaq gaq-euq maqngeur-aer, ngar noeqshaq duidui luf-eu gar maqbi noeqshaq dzaeq-eu laer, ngaq-anr khawf ghawqshaq gaqnaeq laf-euq mae.

²⁸ Khoermirnae, nawmaf, aqyawf-anr parya mawr ngae laqkhaq caerlar-awr, ngar noeqshaq-eu uicuiv maqgar larni, ngar, aqyawf-anr yawkawr-aer bi ghofle ma.

²⁹ Nawmaf, Sanqpaq Miqyaer-euq lafkhoer, laqkhaq caertavni aqyawf-anr hageuf-awq. Aqyawf lof-aer ghae-eu tsawrhaq-anr noeqpoeq-awq.

³⁰ Aqjeq mirnae aernar-aq, nawmaf nae ngaq-anr maq cawba jirnya-euq jeq-anr cawba-eu gharduq, aqyawf-euq daefzir lawrnaeq-awr, shirtaw taeqni Kali-euq gar mr-euq mae.