Piˇliˇpiˆ 1 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Dawqcawq Puq-eu Dawq

¹ Yeqsur Kali-euq kuirlaf zaqkhav pyeuf-eu Pawrluv hawr-eu Tivmorseq nga’nyaf, Pirlirpiv-anr jawr-eu Yeqsur Kali-euq tsawrshawr dawqtawv luf-anr khawf, Kalizaq armur-anr hawpir-eu deuq hawr-eu cawba-eu deuq-anr khawf, sanqbof bofanr lef-eu ma.

² Aqdui-euq Aqda Miqyaer hawr-eu Sanqpaq Yeqsur Kali-euq guiqlanq yawdzanr hawr-eu, nuisar of-eu jeq nawmaf-euq khoertav jav luf-ur.

Miqyaer-anr Jaceuq-eu

³ Ngar, nawmaf-anr khar noeqdovlar ngae, ngaq-euq Miqyaer-anr jaceuq-eu ma.

⁴ Ngar, nawmaf yawqghaq navluf-euq gharduq guiqlanq kharshar ngae, laqkhaq caertavni sharluf-eu ma.

⁵ Aqjeq mirnae aernar-aq, ardanqbae ngae nan-anr nae iqnan keuvni, nawmaf khawf guiqlanq dawq-anr tafler-awr nae gar cawmr luf-eu mae.

⁶ Nawmaf-euq lafkhoer gar yawmuiq jeq mrdanq bae-euq ghaq, Yeqsur Kali-euq arnan-anr keuvni, gar heu mrluivjir taef-a laer ngar yawduq baw-eu ma.

⁷ Ngar, nawmaf yawqghaq navluf-euq garkawv heulof-aer noeq-eu-aq tsaq taef-a. Aqjeq mirnae aernar-aq, nawmaf, ngaq-euq nuima-euq lafkhoer jawrluf-eu mae. Ngar shmrcav ya daqluf ngae khawf, guiqlanq dawq-euq gharduq jashaw-eu lafkhoer tsaq mae laer sarkir kamqluf ngae khawf, nawmaf, ngaq naeq-aer tiqkawv lof-aer guiqlanq yawdzanr zaluf-eu mae.

⁸ Yeqsur Kali-euq ghoer-awr gaq-eu jeq nae, ngar, nawmaf yawqghaq navluf-anr mawrmawf duidui luf-eu ma. Heu-euq gharduq, Miqyaer, ngaq-euq sarkir pyeuf-eu mae.

⁹ Ngar heulof-aer guiqlanq sharluf-eu ma: nawmaf siqnya-eu tsawrganr hawr-eu yawqjeq navluf tserpav birpav nya-eu lafkhoer, nawmaf-euq gaq-eu jeq tiqjawr sair tiqjawr myaqlar-awr,

¹⁰ nawmaf yawmuiq jeq-anr tserpav nya’ni, nawmaf, Kali-euq arnan-anr keuvni, shawrjaevni ghae-awr sanqtif tifkhar maqza-eu tsawrhaq pyeuf-eu uqtaf,

¹¹ Yeqsur Kali-euq baqda’nae tsaq-awr dawr-eu arsiq tiqbyanni siqle-awr, Miqyaer-euq yawshaef khanqsaer hawr-eu, Miqyaer-anr jaceuq-eu jeq dovlarni guiqlanq sharluf-eu ma.

Ngar Daefluf-eu-aq, Kali Mae

¹² Aqyuif aqnyir deuq-or! Ngaq-anr khar pyeuflar-euq jeq khoer-aq, guiqlanqdawq bikhawq-ir-eu gharduq law hawrngaq laer nawmaf-anr bi siqnya’mawf mir-a.

¹³ Khoerlof-aer pyeuflar-euq mirnae, ngar, Kali-euq gharduq shmrcav daqluf-eu mae laer, sanqpaq-euq nymr-anr lofpir-eu deuq hawr-eu, nuideuq dawqtawvluf byacaevni siqnya-eu mae.

¹⁴ Khoeruqtaf, ngar shmrcav daqluf-eu baqda’nae, Sanqpaq Yeqsur-euq lafkhoer jawr-eu aqyuif aqnyir myaqni tiqpav yawduq bawlar-awr, nuima khaqdzaeq lar-euq uqtaf, guv-eu jeq maqanrni, Yaerdawq ngaeqpeuq lar-euq mae.

¹⁵ Tsawrhaq tiqghaq nav-aq, myavnav nav-awr caeghaq mawf-eu mirnae, Kali-euq garkawv dawqmaeq maeqluf-eu mae. Aerkhawf, tiqghaq nav-aq, aqdir nuima keuv-awr maeqluf-eu mae.

¹⁶ Yawbae deuq-aq, yawqha, aqcawq taf-aer dzaeqler nya’ni sharnoeq-awr nuima maqshawr-eu lafkhoer, ngar shmrcav yadaq-eu heu yawbae navmaqtser lavshaq dzaeq-eu laer, Kali-euq garkawv dawqmaeq maeq-eu mae.

¹⁷ Yawqdeuq yawq-aq, ngaq-anr guiqlanq dawq-euq gharduq bi japir-eu laer khaertaq-euq mae laer aqyawfmaf siqnya-eu mirnae, gaq-eu lafkhoer dawqmaeq maeq-eu mae.

¹⁸ Tox-aer mar-iq aqjox-aer la? Yawmuiq janrgeuf-awr maeq-eu maqaer, yawtsaq yawdawr-euq lafkhoer maeq-eu maqkaq, yawqdzer dzaq-anr navluf Kali-euq garkawv dawqmaeq maeq-eu mirnae, ngar laqkhaqcaer mir-a, maeqhu paw khawf laqkhaq yacaer taef-a.

¹⁹ Aqjeq mirnae aernar-aq, nawmaf guiqlanq shar-eu mirnae hawr-eu, Yeqsur Kali-euq Saflar cawba naeqlaf-eu mirnae, ngaq-anr pyaeqnaeqlaf taef-a laer ngar siqnya ma.

²⁰ Ngar geufmawf duidui-awr, noeqtmq taq-euq jeq-aq heulof-aer ma. Ngar tiqjeq-iq-euq lafkhoer maqya shafdawr-aer, dzeurlaf ngae lof-aer nymq-mr khawf, nuima khaqduqni anr-awr, daef khawf shir khawf ngaq-euq mawrdo nae Kali-anr taqhuiq taqmanr ma.

²¹ Aqjeq mirnae aernar-aq, ngaq-euq gharduq ngar daefluf-eu-aq, Kali mae. Ngar shir nar-aq, ngaq-euq gharduq jirjeuq ma.

²² Aerkhawf, ngaq-euq mawrdo daefluf nar-aq, ngaq nae mr-euq gardeuq arsiq siqle taef-a. Khoermirnae, ngar aqgeu jeq-anr tsergeuf-eu paq nga laer maqpar aernya mir-a.

²³ Ngaq-anr yawkhav-aer nyaefsuf lar-eu heu nyiq jeq-euq yawkaq-anr jawrluf-eu ma. Ngar geufmawf-eu jeq-aq, mirtsaq-anr ghawq-awr, Kali naeq-aer jawrlermawf mir-a. Heu-aq, muiqdzaeq-eu jeq pyeuf-eu mae.

²⁴ Aerkhawf, ngaq-euq mawrdo daef-eu-aq, nawmaf-euq gharduq gardanr tsoeqdzaeq-eu mae.

²⁵ Nawmaf huiqlar manrlar-awr, jan-eu jeq-euq lafkhoer laqkhaq yacaerni, ngar, nawmaf dawqtawvluf naeq-aer jawr-awr daefdav lef-eu tsaq taef-a laer, siqnya-awr yawduq baw-eu ma.

²⁶ Khoermirnae, ngar, nawmaf jawr-eu gar paroe ngae, ngaq-euq baqda’nae nawmaf, Yeqsur Kali-euq lafkhoer laqkhaq caer-eu jeq byandzaeqlar taef-a.

²⁷ Aqjox-aer law khawf, nawmaf, Kali-euq guiqlanq dawq-anr geuxni yawdaef daef-awq. Khoerlof-aer daef nar-aq, ngar oekeuv-awr nawmaf-anr ya’mawr ngae maqaer, nawmaf naeq-aer maqjawr ngae maqkaq, nawmaf nuima tiqsiq taef-aer taq-awr, nuinoeq tiqjeq taef-aer taq-eu uqtaf, guiqlanq dawq-anr taf-eu jan-eu jeq-euq gharduq, tiqkawv lof-aer laejae duidui-eu garkawv-anr ngar yagaq taef-a.

²⁸ Aqgeu dzerdzaq-anr maqkaq, nawmaf-anr muir-eu deuq-anr taqguv. Maqguv nar-aq, aqyawfmaf cawv-ir-awr, nawmaf-aq, Miqyaer-anr nae dovle-euq kakhof-eu jeq za-euq nga laer byacaevni mawrlar taef-a.

²⁹ Aqjeq mirnae aernar-aq, nawmaf, Kali-anr janni taef-aer maqngeur-eu, aqyawf-euq gharduq daqnya’ni khawf guiqlanq bifnaeq taq-euq mae.

³⁰ Nawmaf deuvcae caeluf-eu teu-aq, dzeurlaf ngae, ngaq-euq lafkhoer deuvluf-eu gar nawmaf ya’mawr-awr, nymq-mr khawf ngaq-euq lafkhoer deuvluf-eu gar nawmaf ya gaqluf-eu mae.