Piˇleˇmoˬ 1 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Dawqcawq Puq-eu Dawq

¹ Ngar-aq, Yeqsur Kali-euq gharduq kuv-anr urluf-eu Pawrluv ma. Aqnyir Tivmorseq nga’nyaf, nga’nyaf zawr gaq-eu gar mrcawq Pirlermoq-anr maqaer,

² zawr gaq-eu dmrma Aqbir hawr-eu nga’nyaf-euq guir deuvcawq Aqgirpuv-anr hawr-eu nawq-euq nymr-anr uiqlar luf-eu Kalizaq armur-anr sanqbof bofanr lef-eu ma.

³ Aqdui-euq Aqda Miqyaer hawr-eu Sanqpaq Yeqsur Kali-anr nae oe-euq guiqlanq yawdzanr hawr-eu nuisar of-eu jeq, nawmaf-euq khoertav jav luf-ur!

Pirlermoq Jan-awr Gaq-eu Jeq

⁴ Ngar guiqlanq kharshar ngae, nawq-anr aerkeuv-awr aqmyanluf nawq-euq gharduq ngar, ngaq-euq Miqyaer-anr jaceuq luf-eu ma.

⁵ Aqjeq mirnae aernar-aq, nawr, Sanqpaq Yeqsur-anr hawr-eu tsawrshawr yawqghaq navluf-anr jan-awr gaq-eu mae laer, ngar yagaq-euq ma.

⁶ Yeqsur Kali-euq lafkhoer nawq nae zataq-euq yawmuiq yawqjeq navluf-anr siqnya lar-awr, nawr jan-eu lafkhoer cawq cawq-eu jeq gardanr tsoeqlerni guiqlanq sharluf-eu ma.

⁷ Maernmr-or! Nawr gaqnya-eu mirnae nga’nyaf laqkhaqcaer duidui-awr, nuima sarlar-euq mir-a. Aqjeq mirnae aernar-aq, nawq-euq baqda’nae tsawrshawr deuq-euq nuima ghaqnaq biza-euq mae.

Awqneqsiqmur-euq Gharduq Shar-eu

⁸ Khoermirnae, nawr mr paq-aer ghae-eu deuq mr-awq laer ngar, Kali-euq lafkhoer nawq-anr nuima khaqduqni dawq bifnya-eu ma.

⁹ Aerkhawf, ngar khoerlof-aer maqjanr. Ngar-aq, tsawrmawq mawqle-awr, Yeqsur Kali-euq gharduq kuv-anr khawf urluf-eu Pawrluv ma. Gaq-eu lafkhoer taef-aer ngar, nawq-anr heulof-aer sharmawf-eu ma.

¹⁰ Ngar kuv-anr urluf ngae, saflar paw ngaq-euq zaqyo pyeuflar-euq Awqneqsiqmur-euq gharduq nawq-anr heulof-aer sharmawf mir-a.

¹¹ Dzeurlaf ngae, aqyawf-aq, nawq-euq gharduq gardanr maqtsoeq-a. Aerkhawf, nymq-mr-aq, nawq-euq gharduq hawr-eu ngaq-euq gharduq khawf gardanr tsoeq-eu mae.

¹² Nymq-mr ngar, aqyawf-anr nawr jawr-eu gar bi ghofle ma. Aqyawf-aq, ngaq-euq nuima ma. Khoermirnae, nawr, aqyawf-anr hageuf-awq.

¹³ Guiqlanqdawq baqda’nae, ngar kuv-anr urluf-eu yawkaq, aqyawf, nawq-euq danzar geuf-awr, ngaq-anr bi cawba-eu gharduq, ngaq naeq-aer bi jawrmawf-eu law mir-a.

¹⁴ Aerkhawf, nawr nuima maq tsaqgar ngar khoerlof-aer maq janrmawf nya. Aqjeq mirnae aernar-aq, nawr yawmuiq jeq janrnaeqlaf ngae, nawr nuima keuv-awr janrnaeq laf-eu gar ngar geufmawf-awr, maq ghaenya-aer janrnaeq laf-eu jeq maqbi pyeufmawf nya.

¹⁵ Aqyawf, nawq-anr tiqkhaeq ghawq-ir-euq khoer-aq, aqyawf, nawq naeq-aer aqmyanluf jawrnya’ni gharduq ngeur-eu dur.

¹⁶ Nymq-mr-aq, aqyawf zaqkhav maqpar ngeur-aer, zaqkhav taf-aer gordzaeq-eu aqdui zawr gaq-eu maernmr pyeuflar-euq mae. Ngaq-euq gharduq-aq, aqdir khoerlof-aer pyeuf mir-a. Nawq-euq gharduq ngeurdzaeq, shiqshaq paw hawr-eu Sanqpaq Yeqsur-euq lafkhoer, zawr gaq-eu maernmr par pyeufdzaeq taef-a.

¹⁷ Khoermirnae, ngar-aq, nawq-euq gar mrcawq ma laer nawr sawxluf-eu ngeur nar-aq, ngaq-anr hageuf-eu lof-aer aqyawf-anr hageuf-awq.

¹⁸ Aqyawf, nawq-anr mrlaeq taq-awr, dzirdzov dav-eu tiqjeqnav jav nar-aq, ngaq-euq khoertav sawxdav jir-awq.

¹⁹ Ngar-aq, Pawrluv ma. Dzirdzov khoer, ngar tsoeqnaeq ma laer ngaq-euq aqlaf nae, ngar sanqbof bofanr lef-euq ma. Nawq-euq mawrdo ngaq-anr dzirdzov dav-eu khoer ngar tiqjeq-iq maqcaw.

²⁰ Euq, maernmr-or! Nawr, Sanqpaq Yeqsur-euq lafkhoer ngaq-euq gharduq yawmuiq jeq janrnaeq laf-awq. Kali-euq lafkhoer ngaq-euq nuima-anr ghaqnaq biza naeqlaf-awq.

²¹ Nawr, ngaq-euq dawq narhaq taef-a laer ngar yawduq baw-eu mirnae, ngar, nawq-anr sanqbof heu bofanr lef-eu ma. Ngar shar-eu navmaqtser nawr janr taef-a laer ngar siqnya ma.

²² Khoeruqtaf, ngaq-euq gharduq jawrzar lavsavtaq de-eq. Aqjeq mirnae aernar-aq, nawmaf guiqlanq shar-eu mirnae, ngar, nawmaf jawr-eu gar bi’oe naeqlaf taef-a laer noeqtmq luf-eu ma.

Arsaq Saq-eu Dawq

²³ Yeqsur Kali-euq gharduq, ngaq naeq-aer kuv-anr urluf-eu Irbaqpaqlar dawqtsaf tsafanr lef-euq mae.

²⁴ Ngaq-euq gar mrcawq Maqkuv, Aqliqdaqgur, Deqmav hawr-eu Lurkaf, aqha’maf khawf dawqtsaf tsafanr lef-euq mae.

²⁵ Sanqpaq Yeqsur Kali-euq guiqlanq yawdzanr nawmaf-euq saflar-euq lafkhoer jav luf-ur. Aqmeq.