Panmaeq 9 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Darhae Ngaq: Nyaevbanr-euq Guirmaf

¹ Mqtav ghaqkhaer ngaq ghaq tiqghaq darhae baw ngae, ngar, aqguir tiq siq, mq-euq khoertav nae mirtsaq-euq khoertav gaka lef-eu gar ya’mawr-euq ma. Aqguir khoersiq-anr li-eu maqbaw-eu duqkhanq-euq mawqtawfdur biftaq-euq mae.

² Khoerngae, aqguir khoersiq, li-eu maqbaw-eu duqkhanq khoerkhanq-anr pan-euq mae. Khoerngae, miqdzaq tsawqbym bym’ma-anr nae uqkhoeq tanqdov laf-eu lof-aer, duqkhanq khoerkhanq-anr nae uqkhoeq tanqdov laf-eu mae. Uqkhoeq khoer-euq baqda’nae, nanrma hawr-eu mq zanrtsuini pyeuf-ir-euq mae.

³ Khoernar-aq, uqkhoeq-euq lafkhoer nae nyaevbanr dovlar-awr, mirtsaq-euq khoertav gataq le-euq mae. Nyaevbanr khoerdeuq-anr boeqkaqlaqma lof-aer dur-eu baoq biftaq-euq mae.

⁴ Mirtsaq-euq khoertav khardaef-eu yarmof, arpaf yawnyoer yawqjeq navluf hawr-eu arbawr dawqtawv luf-anr maq lavcawv-aer, narkhawr-anr Miqyaer-euq jmq maq diqtaq-euq tsawrhaq deuq-anr taef-aer lavcawvni nyaevbanr khoerdeuq-anr dawq biftaq-euq mae.

⁵ Aerkhawf, nyaevbanr khoerdeuq, tsawrhaq khoerdeuq-anr saefni aryaq maqbif-aq. Bala ngaq siq byanni taef-aer aqyawf maf-anr khaeqnaeq nya-eu mae. Nyaevbanr khoerdeuq nae kawf-euq-aq, boeqkaqlaqma nae tsawrhaq-anr daeq-euq lof-aer gawr-eu mae.

⁶ Aryamq khoeryamq-euq lafkhoer, tsawrhaqzaq shir-eu jeq-anr sharpov-eu khawf maq shirnya-a. Shirmawf duidui-eu khawf, shir-eu jeq aqyawf maf-anr nae caevbyov taef-a.

⁷ Nyaevbanr khoerdeuq-aq, guirdeuv deuv-ir-eu laer laeqhmq taq-euq manqdeuq-anr dur-eu mae. Aqyawf maf-euq uqduq-aq, shuir uqkhov-anr dur-eu uqkhov khovluf-eu gar dur-awr, myavpyawq-aq, zaqyo aqli-euq myavpyawq-anr dur-eu mae.

⁸ Aqyawf maf-euq tsaerkanr-aq, zaqmiq aqbur-euq tsaerkanr-anr dur-awr, seuq-aq, arlaqjaqshir-euq seuq-anr dur-eu mae.

⁹ Aqyawf maf-euq khanq-anr daeqdaqduq-aq, shmrnae janr-euq khanq-anr daeqdaqduq lof-aer dur-eu mae. Aqyawfmaf danrdiq diq-eu tersar-aq, manq lavlawq ghawqmya’ni guirdeuv deuv-eu gar caevluf-eu tersar lof-aer manr-eu mae.

¹⁰ Aqyawf maf-euq dawqmiq-aq, boeqkaqlaqma-euq dawqmiq-anr dur-awr, byaqiq tsof-eu mae. Aqyawfmaf, byaqiq khoer nae tsawrhaqzaq-anr bala ngaq siq byanni lavnar lavgawr-eu baoq zataq-euq mae.

¹¹ Aqyawf maf-euq sanqpaq-aq, li-eu maqbaw-eu duqkhanq-euq mqtav ghaqkhaer mae. Aqyawf-euq tsawrmyanr-aq, Heqbyaer dawq “Aqbaqdoq” laer kur-awr, Heqlaqsar dawq “Aqpawrliroq” laer kur-eu mae. (Dawqtsuif-aq, “Lavcawv-eu ghaq” laer aermawf-eu mae.)

¹² Ghawqshar shaq-aer ghaelar paq-aer ghae-eu yawbae jeq jir-euq mae. Hawtaq-awq. Heu-euq maeqnan, ghawqshar shaq-aer ghaelar paq-aer ghae-eu nyiq jeq keuvle luf-eu mae.

Darhae Kof: Guirdeuv Deuv-eu Manq

¹³ Mqtav ghaqkhaer kof ghaq tiqghaq darhae baw ngae, ngar, Miqyaer-euq maeqshi jav-eu shuir nae janrtaq-euq lawrduq-euq lafcoer-euq uqcoer oeq coer-euq ghanrcae nae tersar manrdov lef-eu gar yagaq-euq ma.

¹⁴ Tersar khoer-aq, darhae yurluf-eu mqtav ghaqkhaer kof ghaq tiqghaq-anr heulof-aer aernaeq-euq mae, “Urbaqlar lawrbaq baqma-anr paftaq-euq mqtav ghaqkhaer khoer oeq ghaq-anr pyaeqnaeq-awq.”

¹⁵ Khoerngae, mqtav ghaqkhaer khoer oeq ghaq-anr laeqhmq taq-euq lof-aer, nanpax paxtaq-euq arkhof, arla, arnan, aryamq tsaq ngae, tsawrhaqzaq smq bymr-anr nae tiq bymr saefni pyaeqnaeq-euq mae.

¹⁶ Manq-anr dziq-eu guirzaq armyav ghaq byan-eu la laer aernar-aq, aqyawf maf-aq 200,000,000 ghaq byan-eu mae laer aer-eu gar, ngar yagaq-euq ma.

¹⁷ Mawrle-euq lafkhoer ngar, manq ghawqmya ni-anr ya’mawr-euq ma. Manq khoerdeuq-anr dziqluf-eu tsawrhaq-aq, miqdzaq lof-aer nertseuvni ghae-eu, nerpuir puir-eu hawr-eu miqdzar dzarshuir lof-aer shuir-eu, khanq-anr daeqdaqduq dmluf-eu mae. Manq-euq uqduq-aq, arlaqjaqshir-euq uqduq-anr dur-awr, manq khoerdeuq-euq khaqmae-anr nae miqdzaq, uqkhoeq hawr-eu miqdzar dzarshuir dovle-eu mae.

¹⁸ Manq khoerdeuq-euq khaqmae-anr nae dovle-eu miqdzaq, uqkhoeq hawr-eu miqdzar dzarshuir heu smr jeq-euq baqda’nae, tsawrhaqzaq smq bymr-anr nae tiq bymr shir-euq mae.

¹⁹ Manq khoerdeuq-euq baoq-aq, khaqmae hawr-eu dawqmiq-anr anr-eu mae. Aqyawf maf-euq dawqmiq-aq arlawr-anr dur-awr, uqduq khawf tsof-awr, aqyawfmaf, uqduq khoer nae tsawrhaqzaq-anr lavtanq lavnar-eu mae.

²⁰ Khaeq-awr khav-eu khoerdeuq nae maq lavsaef jir-aer dzerlar-euq tsawrhaq deuq-aq, aqyawf maf-euq aqlaf nae mrtaq-euq deuq-anr maq noeqpov maq noeqpar-a. Aqyawf maf-aq, naef sanqpaq-anr uqduq tanq-awr, pyur, shuir, guiqshuir, darkawq hawr-eu khaqlo nae janrtaq-euq, maq mawrnya-eu, maq gaqnya-eu, maq cannya-eu tanqpanq aqma mawrkawr khoerdeuq-anr uqduq tanq-eu mae.

²¹ Tsawrhaq khoerdeuq-aq, aqyawfmaf nae tsawrhaq-anr saef-euq, mawloq ja’maw mr-euq, banq-awr khaqmiq sheu-euq hawr-eu smrkhoeq khoeq-euq deuq-anr khawf, maq noeqpov maq noeqpar-a.