Panmaeq 8 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Jmq Shif: Dofdamq-eu Shuir Kuqpaeq

¹ Yawrzaq, jmq diqtaq-euq shif tsanr tiqtsanr-anr pan ngae, mq-euq khoertav, naqliq 30 peu aerghaqni ciqcurni jav-euq mae.

² Khoerngae, ngar, Miqyaer-euq maeqshi yawfluf-eu mqtav ghaqkhaer khoer shif ghaq-anr darhae tiq ghaq-anr tiq hmq bifnaeq-eu gar ya’mawr-euq ma.

³ Khoernar-aq, yawsaw jeq dofdamq-eu shuir kuqpaeq sheuluf-eu mqtav ghaqkhaer yawqghaqyawq dovle-awr, lawrduq-euq dawqpae yawfluf-eu mae. Nuirmanq-euq maeqshi jav-eu shuir nae janrtaq-euq lawrduq-euq khoertav, tsawrshawr dawqtawv luf-euq guiqlanq shardawq naeq-aer tiqkawv lof-aer lawrnaeq-eu laer, dofdamq-eu yawsaw jeq ghawqmya’ni aqyawf-anr bifnaeq taq-euq mae.

⁴ Khoerngae, mqtav ghaqkhaer-euq aqlaf-euq lafkhoer anr-eu, dofdamq-eu yawsaw jeq-euq uqkhoeq hawr-eu tsawrshawr deuq-euq guiqlanq shardawq, tiqkawv lof-aer Miqyaer-euq maeqshi lekeuv-euq mae.

⁵ Khoernar-aq, mqtav ghaqkhaer khoerghaq, yawsaw jeq dofdamq-eu shuir kuqpaeq sheu-awr, lawrduq-anr dofluf-eu miqdzaq tiqbyanni paevanr-awr, mirtsaq-euq khoertav biqka ghae-euq mae. Khoerngae, tersar ghawqmya jeq manr-awr mqjeq jeq-eu uqtaf, mqmyawf khawf myawf-awr, mirluv khawf luvlar-euq mae.

⁶ Darhae yurluf-eu mqtav ghaqkhaer shif ghaq, darhae baw-eu laer laeqhmq taq-euq mae.

Darhae Tif: Sanqlanqdar-anr Lavcawv-euq

⁷ Khoernar-aq, mqtav ghaqkhaer yawbae ghaq darhae baw ngae, shiq keuq-eu uqyaer arsiq hawr-eu miqdzaq, mirtsaq-euq khoertav biqka ghae-euq mae. Miqdzaq khoer nae arbawr smq bymr-anr nae tiq bymr puivdzaq jir-awr, yarmof yawnyoer dawqtawv luf-anr khawf puivdzaq jir-euq mae.

Darhae Nyif: Iqmalavshav-anr Lavdeuq-euq

⁸ Khoernar-aq, mqtav ghaqkhaer nyiq ghaq tiqghaq darhae baw ngae, miqdzaq dofluf-eu gawqjawq jawqma-anr dur-eu tiq jeq, iqmalavshav-anr biqpuf ghae-euq mae. Khoerngae, iqmalavshav smq bymr-anr nae tiq bymr shiq pyeuf-ir-euq mae.

⁹ Iqmalavshav-euq lafkhoer khardaef kharjawr-eu jeq, smq bymr-anr nae tiq bymr shir-euq mae. Lawqdeuq khawf, smq bymr-anr nae tiq bymr cawv-ir-euq mae.

Darhae Smr: Ircuf-anr Lavdeuq-euq

¹⁰ Khoernar-aq, mqtav ghaqkhaer smr ghaq tiqghaq darhae baw ngae, dofluf-eu miqdzaq miqdof lof-aer dur-eu aqguir guirma tiq siq, mq-anr nae gale-awr, ircuf lawrbaq smq bymr-anr nae tiq bymr hawr-eu ircuf irbyoe deuq-euq khoertav gadav lef-euq mae.

¹¹ Aqguir khoersiq-euq tsawrmyanr-aq, “Khaqjawfni ghae-eu shiqteuv” laer kur-eu mae. Ircuf smq bymr-anr nae tiq bymr khaqjawfni ghae-ir-awr, dof tav-eu mirnae, tsawrhaq ghawqmya’ni shir-euq mae.

Darhae Oeq: Nanrma, Bala Hawr-eu Aqguir-anr Lavdeuq-euq

¹² Khoernar-aq, mqtav ghaqkhaer oeq ghaq tiqghaq darhae baw ngae, nanrma smq bymr-anr nae tiq bymr, bala smq bymr-anr nae tiq bymr hawr-eu aqguir smq bymr-anr nae tiq bymr-anr ciqtanq ciqtuv-euq mirnae, nanrma, bala, aqguir-euq yawshaef, smq bymr-anr nae tiq bymr zanr-ir-euq mae. Nan’ghanr paw smq bymr-anr nae tiq bymr yawshaef maqbya-aer pyeuf-ir-awr, uqcif paw khawf khoerlof-aer pyeuf-ir-euq mae.

¹³ Ngar hawghae ngae, mq-euq ghanrcae zawluf-eu mqtav ghaqkhaer tiq ghaq, tersar yawkhav-aer heulof-aer aer-eu gar yagaq-euq ma, “Darhae maqya baw-euq mqtav ghaqkhaer heu smr ghaq darhae bawlar-eu laer ghae-eu mae. Mirtsaq-euq khoertav jawr-eu tsawrhaqzaq-aq, ghawqshar shaq-aer, ghawqshar shaq-aer, ghawqshar shaq-aer yaghae saeflef taef-a.”