Panmaeq 7 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Jmq Diqtaq-euq 144,000 Ghaq

¹ Khoernar-aq, ngar, mirma oeqcoer oeqbawq-anr mqtav ghaqkhaer oeq ghaq yawfluf-eu gar ya’mawr-euq ma. Aqyawfmaf, mirtsaq-euq khoertav, iqmalavshav-euq khoertav hawr-eu arbawr dawqtawv luf-anr jaqlaer maqbi bawzawni, mirma oeqcoer oeqbawq-euq jaqlaer-anr nyaeftaeq taq-euq mae.

² Khoerngae, ngar, mqtav ghaqkhaer yawqghaqyawq, daefluf-eu Miqyaer-euq jmq yur-awr, nanrma dovkhaeq paw nae dovlar-eu gar ya’mawr-euq ma. Mirtsaq hawr-eu iqmalavshav-anr lavcawv-eu baoq zataq-euq mqtav ghaqkhaer khoer oeq ghaq-anr, aqyawf tersar yawkhav-aer gurgur-aer,

³ aer-eu, “Aqduimaf, aqdui-euq Miqyaer-euq ghaqzaq ghaqkhaer deuq-euq narkhawr-anr jmq maqdiq-euq khoerkeuvni, mirtsaq, iqmalavshav hawr-eu arbawr deuq-anr nawmaf taq lavcawv law siq.”

⁴ Irsaqleqlav tsawrjeuq tsawrca dawqtawv luf-euq lafkhoer, jmq diqtaq-euq tsawrhaq 144,000 ghaq byan-eu mae laer aer-eu gar ngar yagaq-euq ma:

⁵ Yurdav-euq arjeuq arca, jmq diqtaq-euq 12,000 ghaq byan-eu mae. Lurbeq-euq arjeuq arca, jmq diqtaq-euq 12,000 ghaq byan-eu mae. Gav-euq arjeuq arca, jmq diqtaq-euq 12,000 ghaq byan-eu mae.

⁶ Aqsaq-euq arjeuq arca, jmq diqtaq-euq 12,000 ghaq byan-eu mae. Naqtaqlir-euq arjeuq arca, jmq diqtaq-euq 12,000 ghaq byan-eu mae. Maqnaqseq-euq arjeuq arca, jmq diqtaq-euq 12,000 ghaq byan-eu mae.

⁷ Surmoq-euq arjeuq arca, jmq diqtaq-euq 12,000 ghaq byan-eu mae. Leqbir-euq arjeuq arca, jmq diqtaq-euq 12,000 ghaq byan-eu mae. Irsaqkaq-euq arjeuq arca, jmq diqtaq-euq 12,000 ghaq byan-eu mae.

⁸ Zaqburloq-euq arjeuq arca, jmq diqtaq-euq 12,000 ghaq byan-eu mae. Yorsaev-euq arjeuq arca, jmq diqtaq-euq 12,000 ghaq byan-eu mae. Beqyaqmiq-euq arjeuq arca, jmq diqtaq-euq 12,000 ghaq byan-eu mae.

Tsawrhaq Armaf Mafma

⁹ Khoernar-aq, ngar hawghae ngae, hawsher-eq, tsawrhaq tiqghaq-iq maq guijir coer-eu tsawrhaq armaf mafma-anr ya’mawr-euq ma. Aqyawf maf-aq, tsawrjeuq tsawrca, arjeuq arca, tsawrhaq hawr-eu dawqngaeq dawqbav yawqjeq navluf-euq lafkhoer nae lartaq-euq mae. Aqyawfmaf pyurdeuqni ghae-eu paerkhanq paermanr dm-awr, aqlaf-anr daor uqpyaq baf-awr nae, nuirmanq hawr-eu Yawrzaq-euq maeqshi yawfluf-eu mae.

¹⁰ Aqyawfmaf tersar yawkhav-aer gur-awr aer-eu, “Kakhof-eu jeq-aq, nuirmanq-anr nuirluf-eu aqdui-euq Miqyaer hawr-eu, Yawrzaq-anr nae oe-eu mae.”

¹¹ Mqtav ghaqkhaer dawqtawvluf, nuirmanq-euq tiqjawq, aqyuif aqtsu deuq hawr-eu yawdaef jeq khoer oeq mawr-euq tiqjawq yawfluf-eu mae. Khoerngae, aqyawfmaf nuirmanq-euq maeqshi awbyav-awr, Miqyaer-anr uqduq tanq-eu lafkhoer,

¹² aer-eu, “Aqmeq. Jaceuq-eu jeq hawr-eu yawshaef khanqsaer, Zaqsiq tsawrganr hawr-eu guiqlanq-anr jaceuq-eu jeq, Taqhuiq taqmanr-eu jeq, baoq hawr-eu ghaq dawqtawvluf, Mqmaq maqbyav yarzir, aqdui-euq Miqyaer-anr of luf-ur. Aqmeq.”

¹³ Khoerngae, aqyuif aqtsu deuq-euq lafkhoer-euq tiq ghaq, ngaq-anr narhaq-eu, “Pyurdeuqni ghae-eu paerkhanq paermanr dmluf-eu tsawrhaq heudeuq aqsur ghaq la? Aqyawfmaf aqgeugar nae lar-euq la?”

¹⁴ Khoerngae, ngar, aqyawf-anr, “Ngaq-euq sanqpaq-or! Nawr siqnya mae” laer aerkhof naeq-euq ma. Khoernar-aq, aqyawf, ngaq-anr heulof-aer aernaeq laf-euq mae: “Tsawrhaq heudeuq-aq, shaqdui zanq duidui-eu aryamq-euq lafkhoer nae dovlar-euq mae. Aqyawf maf-aq, yawqha-euq paerkhanq paermanr pyurdeuqni ghaelarni, Yawrzaq-euq shiq nae laeqtsiq ghaq-euq mae.

¹⁵ Khoermirnae, aqyawfmaf, Miqyaer-euq nuirmanq-euq maeqshi jawr-awr, uqcif nan’ghanr maqaer, aqyawf-euq uqduq tanqnymr nymrma-euq lafkhoer, aqyawf-euq gar mrluf-eu mae. Nuirmanq-anr nuirluf-eu khoerghaq khawf, aqyawf maf-euq ghanrcae jawr taef-a.

¹⁶ Aqyawf maf-aq, dzaqdzaq dawrdawr maqpar maef-aer, nanrma hawr-eu yawsaf yawlanr khawf, aqyawf maf-anr maqcoeq maqciv-ar.

¹⁷ Aqjeq mirnae aernar-aq, nuirmanq-euq ghanrcae jawr-eu Yawrzaq-aq, yawr-anr bo-eu lof-aer aqyawf maf-anr bosav taef-a. Daef-eu jeq bif-eu ircuf irbyoe jav-eu gar, aqyawf maf-anr sheuqghae taef-a. Miqyaer, aqyawf maf-euq myavnuiv-anr nae myavbir yawqdzuif navluf-anr sivdzaejir naeq taef-a.”