Panmaeq 6 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Jmq Tif: Ghaqler-eu Manqpyur

¹ Khoernar-aq, ngar, Yawrzaq, jmq diqtaq-euq khoerdeuq-anr nae tiq tsanr-anr pan-eu gar ya’mawr-awr, yawdaef jeq khoer oeq mawr-euq lafkhoer nae tiq mawr, mqjeq jeq-eu tersar-anr durni heulof-aer aer-eu gar yagaq-euq ma, “Lar-awr, hawlar-awq.”

² Hawsher-eq. Ngar hawghae ngae, manq manqpyur tiq mawr-anr dziqluf-eu ghaq, kav tiq kanr bafluf-eu gar ya’mawr-euq ma. Aqyawf-anr shuir uqkhov bif-awr, aqyawf ghaqler-euq ghaq lof-aer ghaqlerni dov-ir-euq mae.

Jmq Nyif: Guir Deuv-eu Manqner

³ Khoernar-aq, Yawrzaq, jmq diqtaq-euq nyiq tsanr tiqtsanr-anr pan ngae, ngar, yawdaef jeq nyiq mawr tiqmawr heulof-aer aer-eu gar yagaq-euq ma, “Lar-awr, hawlar-awq.”

⁴ Khoerngae, miqdzaq lof-aer ner-eu manq tiq mawr dovle-euq mae. Mirtsaq-euq khoertav tsaqler dzoerler-eu jeq-anr yurdzae-awr, tsawrhaqzaq tiqghaq tirghaq saefni, manq heumawr-anr dziqluf-eu ghaq-anr baoq biftaq-euq mae. Aqyawf-anr micaer mima tiq kanr khawf bifnaeq taq-euq mae.

Jmq Smr: Nym-eu Manqnav

⁵ Khoernar-aq, Yawrzaq, jmq diqtaq-euq smq tsanr tiqtsanr-anr pan ngae, ngar, yawdaef jeq smq mawr tiqmawr heulof-aer aer-eu gar yagaq-euq ma, “Lar-awr, hawlar-awq.” Hawsher-eq. Ngar hawghae ngae, manq manqnav tiq mawr-anr ya’mawr-euq ma. Manq-anr dziqluf-eu khoerghaq-euq aqlaf-euq lafkhoer pavyawq tuvtaeq taq-euq mae.

⁶ Khoerngae, ngar, yawdaef jeq khoer oeq mawr-euq ghanrcae, dawq ngaeq-eu gar dur-eu tersar heulof-aer aer-eu gar yagaq-euq ma, “Caer tiq paeq deqnaqlir tiq byav poeq-awr, caerguiq smr paeq deqnaqlir tiq byav poeq-eu mae. Tsir hawr-eu aqgaf dzaruir-anr taq lavcawv.”

Jmq Oeq: Shir-eu Manqpyurpya

⁷ Khoernar-aq, Yawrzaq, jmq diqtaq-euq oeq tsanr tiqtsanr-anr pan ngae, ngar, yawdaef jeq oeq mawr tiqmawr heulof-aer aer-eu gar yagaq-euq ma, “Lar-awr, hawlar-awq.”

⁸ Hawsher-eq. Ngar hawghae ngae, pyurpya’ni ghae-eu manq tiq mawr-anr ya’mawr-euq ma. Manq-anr dziqluf-eu ghaq-euq tsawrmyanr-aq, Shir-eu jeq laer kur-awr, Shir-eu mirkhanq, aqyawf-euq maeqnan cantae luf-eu mae. Micaer, maef-awr shuf-eu jeq, shir-eu jeq hawr-eu, mirtsaq-anr jawr-eu jeqzaq yawghae deuq-anr ghoeghoe-aer mirtsaq oeq bymr-anr nae tiq bymr-anr jawr-eu tsawrhaq-anr saef-eu aryaq, aqyawf nyaf-anr biftaq-euq mae.

Jmq Ngaq: Bisaef-euq Tsawrshawr-euq Tersar

⁹ Khoernar-aq, Yawrzaq, jmq diqtaq-euq ngaq tsanr tiqtsanr-anr pan ngae, ngar, Miqyaer-euq dawq hawr-eu aqyawfmaf nyaefzif luf-eu sarkir-euq baqda’nae bisaef-euq tsawrhaq deuq-euq saflar, lawrduq-euq uqmov jawr-eu gar ya’mawr-euq ma.

¹⁰ Aqyawfmaf tersar yawkhav-aer gurgur-aer aer-eu, “Dawrcoeni ghae-eu shawr-eu Sanqpaq-or! Mirtsaq-euq khoertav jawr-eu, nga’maf-euq shiq bi yoerle-euq tsawrhaq deuq-anr, nawr yarkhaq darnaeq-awr janrkhof naeq-eu aryamq, aqmyan bi keuvle-eu laer ghae-eu le?”

¹¹ Khoerngae, aqyawfmaf yawqghaq navluf-anr pyurdeuqni ghae-eu paerkhanq paermanr bifnaeq-awr aernaeq-eu, “Nawmaf naeq-aer Kali-euq ghaqzaq ghaqkhaer deuq hawr-eu aqyuif aqnyir deuq, tsaqtsov taq-euq lof-aer nawmaf-anr durni saef-eu gar yadaq-eu tsawrhaq, nanqmyaq maq byanlar-euq khoerkeuvni, nawmaf tiqkhaeq naq-awr dawqtawq siq.”

Jmq Kof: Mqnyi Mirnyi Nyilar-euq

¹² Ngar hawghaelef ngae, Yawrzaq, jmq diqtaq-euq kof tsanr tiqtsanr-anr pan-euq naeq-aer, hawsher-eq, mirluv yawkhav-aer luvlar-awr, nanrma-aq, uqduq tsaerkanr nae janr-euq guqdar paerzeur lof-aer navcawfni pyeuf-ir-euq uqtaf, bala-aq, shiq lof-aer pyeuf-ir-euq mae.

¹³ Jaqlaer laerma bawlar-awr, siqguq marsheur-euq arbawr-anr bawnyaeler ngae, arsiq yawtsan gale-eu lof-aer, mq-euq khoertav-euq aqguir deuq mirtsaq-euq khoertav gale-euq mae.

¹⁴ Seuqghaq artaf laeqyov-eu lof-aer mq byov-ir-euq mae. Gawqjawq hawr-eu irjawlanr dawqtawvluf yawqha-euq jawrduq-anr nae jivdov ghae-euq mae.

¹⁵ Khoerngae, mirtsaq-euq sanqpaq deuq, yawhuiq yawmanr deuq, smrmuiq smrbaw deuq, guirmaf aqyuif deuq, baoq jav-eu deuq, zaqkhav deuq hawr-eu zaqkhav maqngeur-eu tsawrhaq dawqtawvluf, lokhanq lobyoe-euq lafkhoer hawr-eu gawqjawq-anr jav-eu khaqlo deuq-euq lafkhoer caevzaf taq-euq mae.

¹⁶ Aqyawfmaf gawqjawq hawr-eu khaqlo deuq-anr aernaeq-eu, “Nga’maf, nuirmanq-anr nuirluf-eu ghaq-euq myavpyawq-anr maqya mawr-aer, Yawrzaq nuima paer-eu gar maqya daqni, nga’maf-anr byavtaeq le-awr lavzaf naeqlaf-awq.

¹⁷ Aqjeq mirnae aernar-aq, aqyawf nuima paer duidui-eu arnan nanma keuvle-euq gar, aqsur ghaq yawfdaqcoer nmr-mq?”