Panmaeq 5 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yovtaq-euq Sanqbof

¹ Khoerngae, ngar, nuirmanq-anr nuirluf-eu ghaq-euq armar laf-anr, yovtaq-euq sanqbof tiq yov anr-eu gar ya’mawr-euq ma. Sanqbof khoeryov-aq, lafkhoer lafnyir-aer nyiq pawluf sanqbof boftaq-awr, jmq shif tsanr diqtaq-euq mae.

² Khoernar-aq, heu-anr ngar ya’mawr-euq ma. Ghaq zawr khav-eu mqtav ghaqkhaer tiq ghaq tersar yawkhav-aer gur-eu, “Aqsur ghaq jmq diqtaq-euq khoer shif tsanr gheudzae-awr, sanqbof heuyov-anr pan-eu geux-eu la?”

³ Mq-euq khoertav khawf, mirtsaq-euq khoertav khawf, mirtsaq dawqdan khawf, sanqbof khoeryov pan-awr hawnya-eu tiqghaq-iq maqjawr-a.

⁴ Ngar, sanqbof khoeryov-anr pan-awr guini geux-eu tsawrhaq tiqghaq-iq maqjawr-eu mirnae, ngoer duidui-euq ma.

⁵ Khoerngae, aqyuif aqtsu khoerdeuq-euq lafkhoer-euq tiq ghaq, ngaq-anr aernaeq laf-eu, “Taqngoer. Hawsher-eq. Yurdav arjeuq-euq Arlaqjaqshir pyeuf-eu, Daqbir-euq Duqcir ghaqler-euq mae. Aqyawf, jmq diqtaq-euq khoer shif hmqluf gheudzae-awr, sanqbof khoeryov-anr aqyawf pannya-eu mae.”

⁶ Khoerngae, ngar, aqyuif aqtsu deuq-euq ghanrcae, nuirmanq hawr-eu yawdaef jeq khoer oeq mawr-euq yawkaq-anr Yawrzaq yawfluf-eu gar ya’mawr-euq ma. Yawrzaq-aq, saef-euq gar yadaq-euq lof-aer dur-eu mae. Aqyawf-aq, uqcoer shif coer tsof-awr, myavnuiv shif nuiv tsof-eu mae. Myavnuiv khoer shif nuiv-aq, mirtsaq-euq khoertav doeni Miqyaer nae bi irbyan taq-euq Miqyaer-euq Saflar shif lar mae.

⁷ Khoerngae, Yawrzaq le-awr, nuirmanq-anr nuirluf-eu ghaq-euq armar laf-anr anr-eu, yovtaq-euq sanqbof khoeryov yur-euq mae.

Yawrzaq-aq Geux-eu Mae

⁸ Aqyawf sanqbof khoeryov yur-euq naeq-aer yawdaef jeq oeq mawr hawr-eu aqyuif aqtsu khoer 24 ghaq Yawrzaq-euq maeqshi awbyav ghae-euq mae. Aqyawfmaf yawqghaq navluf deur-mq cuq baf-awr, dofdamq-eu yawsaw jeq tiqbyanni anr-eu shuir khmqmaq ciqluf-eu mae. Yawsaw jeq khoer-aq, tsawrshawr deuq-euq guiqlanq shardawq mae.

⁹ Aqyawfmaf cardawq yawshuif heulof-aer car-eu mae: “Nawr-aq, yovtaq-euq sanqbof teuyov yur-awr, Jmq diqtaq-euq gheudzae-eu geux-eu mae. Aqjeq mirnae aernar-aq, nawr saef-euq gar yadaq-awr, Nawq-euq shiq nae yawqjeq navluf-euq arjeuq arca, dawqngaeq dawqbav, tsawrhaq hawr-eu tsawrjeuq tsawrca-anr, kakhof-awr Miqyaer-anr bi gawflar naeqlaf-euq mae.

¹⁰ Nawr, nga’maf-anr Miqyaer-euq maeqshi, Sanqpaq hawr-eu pirma pyeuflarni, janrnaeq laf-euq mae. Khoermirnae, nga’maf, mirtsaq-euq khoertav ya uvlanr taef-a.”

¹¹ Ngar par hawghaelef ngae, nuirmanq, yawdaef jeq hawr-eu aqyuif aqtsu-euq tiqjawq, ghawqmya’ni ghae-eu mqtav ghaqkhaer-euq tersar-anr yagaq-euq ma. Mqtav ghaqkhaer khoerdeuq-aq, maq guijir coerni ardui arduighaq byan-eu mae.

¹² Aqyawfmaf tersar yawkhav khav-aer aer-eu, “Saef-euq gar yadaq-euq Yawrzaq-aq, Baoq hawr-eu pyurshuir myawqganq, zaqsiq tsawrganr hawr-eu ghaq, Taqhuiq taqmanr-eu jeq, yawshaef khanqsaer hawr-eu jaceuq-eu jeq, Heudeuq dawqtawvluf za-eu geux-eu mae!”

¹³ Khoernar-aq, ngar, mq-euq khoertav hawr-eu mirtsaq-euq khoertav, mirtsaq-euq dawqdan hawr-eu iqmalavshav-euq lafkhoer, khardaef kharjawr-eu jeq, heulof-aer aer-eu gar yagaq-euq ma, “Jaceuq-eu jeq hawr-eu taqhuiq taqmanr-eu jeq, Yawshaef khanqsaer hawr-eu baoq dawqtawvluf, Li-eu maqbawni, nuirmanq-anr nuirluf-eu ghaq-anr hawr-eu Yawrzaq-anr of luf-ur.”

¹⁴ Khoerngae, yawdaef jeq khoer oeq mawr, “Aqmeq!” laer aer-awr, aqyuif aqtsu khoer 24 ghaq khawf, awbyav-awr li-eu maqbawni daef-eu ghaq-anr uqduq tanq-euq mae.