Panmaeq 4 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Miqyaer-euq Nuirmanq-euq Maeqshi

¹ Khoerdeuq dzeur-euq nar-aq, ngar hawghae ngae, mq-euq khoertav larghov pantaq-euq gar ya’mawr-euq ma. Yawbae ngaq-anr dawq ngaeqcawq-eu darhae baw-eu gar dur-eu tersar khoersar, ngaq-anr heulof-aer paraer-eu mae, “Nawr heugar davlar-awq. Aqkar ya pyeuflar-eu garkawv deuq ngar, nawq-anr bimawr nyar.”

² Khoernar-aq, tiqpov taef-aer muiq-eu Saflar-euq lafkhoer jawrluf ngae, mq-euq khoertav nuirmanq tiq manq jav-awr, nuirmanq-anr tiq ghaq nuirluf-eu gar ngar ya’mawr-euq ma.

³ Khoergar nuirluf-eu khoerghaq-aq, yawbyaf byaf-aer ghae-eu khaqlo saer hawr-eu, nertseuvni ghae-eu khaqlo saer-anr dur-eu mae. Nuirmanq-anr-aq, nyoernav nav-eu khaqlo saer-anr dur-eu arderlerkhan nae khanjawq taq-euq mae.

⁴ Nuirmanq khoer-euq tiqjawq, nuirmanq 24 manq jav-awr, nuirmanq khoerdeuq-anr maeqtsoeq yawpyur dm-awr, shuir uqkhov khovluf-eu aqyuif aqtsu 24 ghaq nuirluf-eu mae.

⁵ Nuirmanq-anr nae mqmyawf myawf-awr, mqjeq jeq-eu hawr-eu tersar ghawqmya jeq manrdov lef-eu mae. Nuirmanq-euq maeqshi miqdzaq tsirkhmq doftaq-euq mae. Tsirkhmq dofdavduq khoer shif hmq-aq, Miqyaer-euq Saflar shif lar mae.

⁶ Nuirmanq-euq maeqshi, jeq-oq saer-anr dur-eu pyawqhaw-euq iqmalavshav jav-eu mae. Nuirmanq-euq ghanrcae hawr-eu tiqjawq, maeqshi narkhan-aer myavnuiv tiqbyanni tsof-eu yawdaef jeq oeq mawr jawr-eu mae.

⁷ Yawbae mawr-aq, arlaqjaqshir-anr dur-eu mae. Nyiq mawr tiqmawr-aq, mawrner mawrgaw-anr dur-eu mae. Smq mawr tiqmawr-aq, tsawrhaq-euq myavpyawq tsof-eu mae. Oeq mawr tiqmawr-aq, zawluf-eu khaqdzer dzerma-anr dur-eu mae.

⁸ Yawdaef jeq khoer oeq mawr-aq, yawqmawr navluf aqdanr kof danr tsof-awr, lafkhoer lafnyir-aer myavnuiv tiqbyanni tsof-eu mae. Aqyawfmaf uqcif nan’ghanr maqaer maq naqlerni aer-eu, “Baoq huiq duidui-eu Sanqpaq Miqyaer-aq, Yawshawr mae, yawshawr mae, yawshawr mae. Aqyawf-aq, arhu nae daef-eu, nymq-mr keuvni daefluf-awr aqkar zafka le-eu ghaq mae!”

⁹ Yawdaef jeq khoerdeuq, nuirmanq-anr nuir-awr mqmaq maqbyav yarzir daef-eu ghaq-anr, yawshaef khanqsaer, taqhuiq taqmanr-eu jeq hawr-eu guiqlanq-anr jaceuq-eu jeq dawqtawvluf damqnaeq ngae,

¹⁰ aqyuif aqtsu khoer 24 ghaq khawf, nuirmanq-anr nuirluf-eu mqmaq maqbyav yarzir daef-eu khoerghaq-anr, awbyav-awr uqduq tanq-eu mae. Nuirmanq-euq maeqshi aqyawf maf-euq shuir uqkhov dzaetaq-awr heulof-aer aer-eu mae,

¹¹ “Or, nga’maf-euq Sanqpaq Miqyaer-or! Nawr-aq, yawqjeq navluf-anr bae-awr, Nawr nuima tsaq-eu lof-aer nawq nae bae-euq jeq daefnya javnya-eu mirnae, Yawshaef khanqsaer, taqhuiq taqmanr-eu jeq hawr-eu, baoq dawqtawvluf nawr za-eu geux mae.”