Panmaeq 22 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Daef-eu Jeq Bif-eu Lawrgawv

¹ Khoerngae, mqtav ghaqkhaer khoerghaq, ngaq-anr daef-eu jeq bif-eu shawrjaevni ghae-eu ircuf lawrgawv bimawr naeqlaf-euq mae. Lawrgawv heugawv-aq, jeq-oq lof-aer shawr-awr, Miqyaer hawr-eu Yawrzaq-euq nuirmanq-anr nae yoerdov lef-eu mae.

² Lawrgawv heugawv-aq, meuq-euq lafkhoer danr-eu garjawq-euq ghanrcae yoer-awr, lawrgawv nyiq paw baq-anr luf, daef-eu jeq bif-eu arbawr daef-eu mae. Arsiq arbawr heudeuq-aq, arsiq 12 jeq siqle-awr, bala yawqsiq navluf siqle-eu mae. Arpaf deuq-aq, mirkhanq-euq tsawrjeuq tsawrca deuq-anr lavsav-eu mae.

³ Aqkar nar-aq, yaqkhaer yaq-eu jeq maqpar jav-eu mae. Miqyaer hawr-eu Yawrzaq-euq nuirmanq, meuq heumeuq-euq lafkhoer jav-awr, aqyawf-euq kuirlaf zaqkhav deuq, aqyawf-anr uqduqtanq taef-a.

⁴ Aqyawfmaf, aqyawf-euq myavpyawq-anr ya’mawr-awr, aqyawf-euq tsawrmyanr aqyawf maf-euq narkhawr-anr boftaq taef-a.

⁵ Heugar-aq, uqcif cif-ir-eu maqpar baw-aer, aqyawfmaf, tsirkhmq hawr-eu nanrma-euq yawshaef maqpar mawf-eu mae. Aqjeq mirnae aernar-aq, Sanqpaq Miqyaer, aqyawf maf-anr yawshaef tsaeqbya’naeq taef-a. Aqyawfmaf, li-eu maqbawni ya uvlanr taef-a.

Sanqpaq Yeqsur Zafka Le-eu

⁶ Khoerngae, mqtav ghaqkhaer khoerghaq, ngaq-anr aernaeq laf-eu, “Dawq heudeuq-aq, tsaq duidui-awr sarjax zif-eu dawq mae.” Shawr-eu Miqyaer gharduq ngaeqdan-eu tsawrhaq deuq-euq Sanqpaq Miqyaer, ghawqmyanr maqghae-aer ya pyeuflar-eu garkawv deuq, aqyawf-euq ghaqzaq ghaqkhaer deuq-anr bimawr-eu laer aqyawf-euq mqtav ghaqkhaer tiq ghaq-anr khaerghae lef-euq mae.

⁷ “Hawde-eq. Ngar yawkawr-aer oe ma! Sanqbof heudmq-euq lafkhoer boftaq-euq, Miqyaer gharduq ngaeqdan-eu dawqdeuq-anr mrcaw-eu tsawrhaq-aq, guiqlanqhuiq taef-a.”

⁸ Ngar-aq, Yorhaq ma. Ngar garkawv heudeuq-anr yagaq-awr ya’mawr-euq ma. Ngar garkawv heudeuq-anr yagaq-awr ya mawrghaq ngae, ngaq-anr bi hawmawr naeqlaf-euq mqtav ghaqkhaer khoerghaq-anr uqduq tanq-eu laer, aqyawf-euq aqkuir-euq dawqpae awbyav-euq ma.

⁹ Khoerngae, aqyawf, ngaq-anr aernaeq laf-eu, “Hawsher-eq! Nawr teulof-aer taqjanr. Ngar khawf nawq-euq aqyuif aqnyir pyeuf-eu Miqyaer gharduq ngaeqdan-eu tsawrhaq hawr-eu, sanqbof heudmq-euq lafkhoer boftaq-euq dawqdeuq-anr mrcaw luf-eu tsawrhaq deuq lof-aer kuirlaf zaqkhav geufluf-eu, nawq-euq cawq ma. Miqyaer-anr uqduq tanq-awq.”

¹⁰ Khoernar-aq, aqyawf, ngaq-anr aernaeq laf-eu, “Sanqbof heudmq-euq lafkhoer boftaq-euq, Miqyaer gharduq ngaeqdan-eu dawq heudeuq-anr jmq taqdiq. Aqjeq mirnae aernar-aq, aryamq paelar-euq mae.

¹¹ Maqtsaq maqdawr-eu deuq-aq, maqtsaq maqdawr-eu jeq mrmr-aer bijawr-awr, jawflafni ghae-eu deuq-aq, jawflafni ghae-eu jeq mrmr-aer bijawr-awq. Tsaq-awr dawr-eu deuq-aq, tsaq-awr dawr-eu jeq mrmr-aer bidaef-awr, yawshawr deuq-aq, yawshawr jeq mrmr-aer bidaef-awq.”

Yeqsur, Kalizaq Armur-anr Aernaeq-eu

¹² “Hawde-eq. Ngar yawkawr-aer oe ma. Tsawrhaq yawqghaq navluf, yawqha nae kharmr kharshar-euq lof-aer geuxni mrpoeq lafsawq bifnaeq-eu laer ngar oe ma.

¹³ Ngar-aq, Aqlaqpar hawr-eu Ormeqgar pyeuf-awr, Ardanq bae-awr Arsaq saq-eu ghaq pyeuf-eu uqtaf, Maeqhuq huq-eu hawr-eu Maeqnanq nanq-eu ghaq khawf ngeur ma.”

¹⁴ Aqyawf nae biftaq-euq dawqdeuq-anr mrcaw-eu tsawrhaq deuq-aq, guiqlanqhuiq taef-a. Aqyawfmaf daef-eu jeq bif-eu arbawr za’nya-awr, meuq-euq lanrkhaeq-anr nae meuq-anr ya urle taef-a.

¹⁵ Aerkhawf, meuq-euq lafnyir-aq, aqkuiq lof-aer ghae-eu tsawrhaq, nyirpaq shavma deuq, banq-awr khaqmiq sheu-eu tsawrhaq, tsawrhaq-anr saef-eu tsawrhaq, tanqpanq aqma mawrkawr-anr uqduq tanq-eu tsawrhaq, jaqmyawf myawf-eu gar gaq-eu tsawrhaq hawr-eu jaqmyawf myawfluf-eu tsawrhaq, heulof-aer ghae-eu tsawrhaq jawr-eu mae.

¹⁶ “Ngar-aq, Yeqsur ma. Kalizaq armur deuq-euq gharduq garkawv heudeuq nawmaf-anr bi dzawrmaeq-eu laer, ngaq-euq mqtav ghaqkhaer-anr khaerghae lef-euq ma. Ngar-aq, Daqbir-euq duqcir hawr-eu zaq pyeuf-awr, yawshaef zawr bya-eu Shawqmuir khawf ngeur-eu ma.”

¹⁷ Khoerngae, muiq-eu Saflar hawr-eu miqshuif aer-eu, “Lar-awq.” Yagaq-euq tsawrhaq deuq khawf, “Lar-awq” laer kur-awq. Ircuf maef-eu tsawrhaq deuq khawf lar-awq. Khar dawrmawf-eu tsawrhaq yawqghaq navluf daef-eu jeq bif-eu ircuf yawqngaef-aer dawrlar-awq.

Yanrni Aernoeq-eu Dawq

¹⁸ Sanqbof heudmq-euq lafkhoer boftaq-euq, Miqyaer gharduq ngaeqdan-eu dawq heudeuq-anr yagaq-euq tsawrhaq yawqghaq navluf yanrnya larni, ngar heulof-aer aernaeq nyar: tsawrhaq tiqghaqnav sanqbof heudmq-euq lafkhoer boftaq-euq taf-aer dawvlanq nar-aq, Miqyaer, aqyawf-anr sanqbof heudmq-euq lafkhoer boftaq-euq taf-aer khaeqlanq khavlanqnaeq taef-a.

¹⁹ Tsawrhaq tiqghaqnav, sanqbof heudmq-euq lafkhoer boftaq-euq Miqyaer gharduq ngaeqdan-eu dawq tiqdawq nav-anr yurdzae nar-aq, Miqyaer, Daef-eu jeq bif-eu sanqbof heudmq-euq lafkhoer boftaq-euq jeq hawr-eu shawr-eu meuq-euq lafkhoer jav-eu aqyawf-anr of-eu jeq yurdzaenaeq taef-a.

²⁰ Garkawv heudeuq sarkir kamq-eu ghaq aer-eu, “Ngar aqdir yawkawr-aer oe ma.” Aqmeq. Sanqpaq Yeqsur-or! Nawr aer-eu lof-aer oe-awq.

²¹ Sanqpaq Yeqsur Kali-euq guiqlanq yawdzanr, nawmaf yawqghaq navluf-euq khoertav jav luf-ur. Aqmeq.