Panmaeq 21 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Mqshuif Hawr-eu Mirshuif

¹ Khoerngae, ngar, mq yawshuif hawr-eu mir yawshuif-anr ya’mawr-euq ma. Aqjeq mirnae aernar-aq, yawbae-euq mq hawr-eu yawbae-euq mirtsaq-aq byovjir-awr, iqmalavshav khawf maqpar jav-eu mae.

² Khoernar-aq, ngar, Miqyaer-anr nae shawr-eu meuq pyeuf-eu Yeqlursaqlaeq yawshuif, mq-euq khoertav nae oeka luf-eu gar ya’mawr-euq ma. Meuq heumeuq-aq, myawqgur geuf-awr laeqhmqdan taq-euq, yoshuif oekeuv-eu gar dawqluf-eu miqshuif-anr dur-eu mae.

³ Khoerngae, ngar, mq-anr nae tersar yawkhav-aer heulof-aer ngaeqdov lef-eu gar yagaq-euq ma: “Hawsher-eq. Miqyaer-euq jawrduq, tsawrhaq jawr-eu gar javle-euq mae. Aqyawf, aqyawfmaf naeq-aer jawr-awr, aqyawfmaf, Miqyaer-euq zaq pyeuflar taef-a. Miqyaer, aqyawfghaq, aqyawfmaf naeq-aer jawr-awr, aqyawf maf-euq Miqyaer pyeuf taef-a.

⁴ Miqyaer, aqyawf maf-euq myavbir dawqtawv luf-anr sivdzaenaeq taef-a. Shir-eu jeq maqpar jav-aer, noeqshaq-eu jeq hawr-eu ngoer-eu jeq maqpar jav-eu uqtaf, nar-awr gawr-eu jeq khawf maqpar jav-eu mae. Aqjeq mirnae aernar-aq, yawbae jav-euq jeq dawqtawvluf byovjir-euq mae.”

⁵ Khoernar-aq, nuirmanq-anr nuirluf-eu ghaq aer-eu, “Hawsher-eq! Ngar yawqjeq navluf, yawshuif janrpar jir-euq ma.” Aqyawf, ngaq-anr aernaeq laf-eu, “Nawr boftaq-awq. Aqjeq mirnae aernar-aq, dawq heudeuq-aq, tsaq duidui-awr sarjax zif-eu dawq mae.”

⁶ Khoerngae, aqyawf, ngaq-anr heulof-aer aernaeq laf-euq mae, “Mrluiv jir-euq ma! Ngar-aq, Ardanq bae-awr Arsaq saq-eu ghaq, Aqlaqpar hawr-eu Ormeqgar ma. Ngar, ircuf kharmaef-eu tsawrhaq-anr, daef-eu jeq bif-eu ircuf irbyoe-anr nae yoerdov lef-eu ircuf yawqngaef-aer bidawr ma.

⁷ Ghaqler-euq tsawrhaq-aq, jeqbir dawqtawvluf za taef-a. Ngar, aqyawf-euq Miqyaer pyeuf-awr, aqyawf, ngaq-euq zaq pyeuf taef-a.

⁸ Aerkhawf, guvcoer-eu, maqjan-eu, nuidav davlar paq-aer ghae-eu jeq mr-eu, tsawrhaq saef-eu, banq-awr khaqmiq sheu-eu, nyirpaq shavma geuf-eu, tanqpanq aqma mawrkawr-anr uqduq tanq-eu hawr-eu jaqmyawf myawf-eu tsawrhaq dawqtawvluf, tsawrhaq heudeuq-anr of-eu jawrduq-aq, miqdzar dzarshuir dofluf-eu miqdzaq-euq lan mae. Heu-aq, nyiq pov tiqpov shir-eu jeq pyeuf-eu mae.”

Yeqlursaqlaeq Yawshuif

⁹ Khoerngae, arsaq saq-eu khaeq-awr khav-eu shif jeq danq-eu shuir khmqmaq shif khmq ciq-euq, mqtav ghaqkhaer shif ghaq-anr nae tiq ghaq, ngar jawr-eu gar oe-awr aer-eu, “Lar-awq. Ngar, nawq-anr Yawrzaq-euq miqzaq pyeuf-eu miqshuif-anr bihaw nyar.”

¹⁰ Khoernar-aq, aqyawf, ngaq-anr muiq-eu Saflar-euq lafkhoer, zawr huiq-awr gor-eu gawqjawq tiqjawq-anr ciqdav lef-awr, Miqyaer jawr-eu gar nae, shawr-eu Yeqlursaqlaeq meuq meuqma, mq-euq khoertav nae oeka-eu gar bimawr naeqlaf-euq mae.

¹¹ Meuq heumeuq-euq lafkhoer, Miqyaer-euq yawshaef khanqsaer jav-awr, yawshaef khoer-aq, jeq-oq-anr dur-eu yawbyaf byaf-aer ghae-eu, arpoeq zawr khav-eu khaqlo saer lof-aer dur-eu mae.

¹² Meuq heumeuq-aq, zawr huiq-awr gor-eu lanr jav-awr, lanr-euq lanrkhaeq 12 khaeq danr-awr, mqtav ghaqkhaer 12 ghaq jawr-eu mae. Lanrkhaeq khoerdeuq-euq khoertav, Irsaqleqlav tsawrjeuq 12 jeuq-euq tsawrmyanr boftaq-euq mae.

¹³ Nanrma dovkhaeq paw lanrkhaeq smr khaeq danr-awr, laftav paw smr khaeq, lafov paw smr khaeq hawr-eu, nanrma gakhaeq paw smr khaeq laer danr-eu mae.

¹⁴ Meuq-euq lanr khoerlanr-aq, zeurdanr khaqlo 12 siq-euq khoertav ciqtaq-euq mae. Zeurdanr khaqlo-euq khoertav, Yawrzaq-euq ghaqkhaer 12 ghaq-euq tsawrmyanr boftaq-euq mae.

¹⁵ Ngaq-anr dawq ngaeqcawq le-euq mqtav ghaqkhaer khoerghaq, shuir dardza yur-awr, meuq khoermeuq-anr khawf, lanrkhaeq deuq hawr-eu lanr-anr khawf, dardza daeq-eu laer ghae-eu mae.

¹⁶ Meuq heumeuq-aq, oeqcoer oeqbawq-aer ghae-awr, yawjer paw hawr-eu yawmanr paw tiqkawv navni manr-eu mae. Mqtav ghaqkhaer khoerghaq, dardza nae meuq heumeuq-anr dzahaw ngae 1,500 lotsov byan-eu mae. Yawmanr paw, yawjer paw hawr-eu yawgor paw khawf tiqkawv navni manr-eu mae.

¹⁷ Khoernar-aq, aqyawf, meuq-euq lanr-anr dzahaw ngae, tsawrhaq-euq lafcav-anr sawx nar-aq, 144 cav gor-eu mae. Tsawrhaq zmq-eu lafcav hawr-eu mqtav ghaqkhaer zmq-eu lafcav-aq, tiqkawv navni manr-eu mae.

¹⁸ Meuq heumeuq-euq lanr-aq, yawbyaf byaf-aer ghae-eu khaqlo saer nae ciqtaq-euq mae. Meuq-aq, zawr shawr-eu shuir nae tsovtaq-awr, jeq-oq lof-aer shawrjaevni ghae-eu mae.

¹⁹ Meuq-euq lanr-euq zeurdanr-aq, arpoeq zawr khav-eu khaqlo saer kharngeur-eu jeq nae ciqtaq-euq mae. Yawbae siq-aq, yawbyaf byaf-aer ghae-eu khaqlo saer mae. Nyiq siq tiqsiq-aq, yawpuir puir-aer ghae-eu khaqlo saer mae. Smr siq tiqsiq-aq, nyoerba ba-eu khaqlo saer mae. Oeq siq tiqsiq-aq, nyoernav nav-eu khaqlo saer mae.

²⁰ Ngaq siq tiqsiq-aq, nerbyaf byaf-eu khaqlo saer mae. Kof siq tiqsiq-aq, nertseuvni ghae-eu khaqlo saer mae. Shif siq tiqsiq-aq, shuirnyoer nyoer-eu khaqlo saer mae. Yaef siq tiqsiq-aq, nyoershuir shuir-eu khaqlo saer mae. Ghoeq siq tiqsiq-aq, shuirnyaevni ghae-eu khaqlo saer mae. Tser siq tiqsiq-aq, nyoerleuq leuq-eu khaqlo saer mae. Tsertif siq tiqsiq-aq, nerleuq leuq-eu khaqlo saer mae. Tsernyif siq tiqsiq-aq, puirleuq leuq-eu khaqlo saer mae.

²¹ Lanrkhaeq 12 khaeq-aq, arcar carkhawf-euq saer 12 siq mae. Lanrkhaeq aqyawf khaeq yawf-aer, arcar carkhawf-euq saer tiq siq nae taef-aer janrtaq-euq mae. Meuq-euq ghanrcae danr-eu garma-aq, shawrjaevni ghae-eu shuir pyeuf-awr, jeq-oq lof-aer shawr-eu mae.

Yeqlursaqlaeq Yawshuif-euq Yawshaef

²² Aerkhawf, ngar, meuq heumeuq-euq lafkhoer yawshawr lawv jav-eu maqmawr-aq. Aqjeq mirnae aernar-aq, baoq huiq duidui-eu Sanqpaq Miqyaer hawr-eu Yawrzaq-aq, meuq heumeuq-euq yawshawr lawv pyeuf-eu mae.

²³ Meuq heumeuq-euq lafkhoer, nanrma hawr-eu bala-euq yawshaef maqpar mawf-a. Aqjeq mirnae aernar-aq, Miqyaer-euq yawshaef khanqsaer meuq heumeuq-anr tsaeqbya-awr, Yawrzaq-aq, meuq heumeuq-euq tsirkhmq pyeuf-eu mae.

²⁴ Kakhof-eu jeq za-euq tsawrjeuq tsawrca deuq, meuq heumeuq-euq yawshaef-anr ghoe-awr can taef-a. Mirtsaq-euq sanqpaq deuq khawf, yawqha-euq khanqsaer hawr-eu taqhuiq taqmanr-eu jeq, meuq heumeuq-anr yurlaf taef-a.

²⁵ Meuq-euq lanrkhaeq deuq-aq, maq piqtaeq-aer nan’ga-i pantaq taef-a. Heugar-aq, uqcif cif-ir-eu maqbaw-a.

²⁶ Mirkhanq yawqkhanq navluf-euq yawshaef khanqsaer hawr-eu taqhuiq taqmanr-eu jeq, aqyawfmaf, meuq heumeuq-anr yurlaf taef-a.

²⁷ Aerkhawf, maqshawr-eu aqgeu jeq maqkaq, meuq heumeuq-anr maqya urler-a. Nuidav davlar paq-aer ghae-eu hawr-eu jaqmyawf myawf-eu tsawrhaq-aq, meuq heumeuq-anr maqya urler-a. Yawrzaq-euq Daef-eu jeq bif-eu sanqbof-euq lafkhoer, tsawrmyanr bofanr taq-euq tsawrhaq taef-aer ya urler-eu mae.