Panmaeq 20 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

1,000 Khof

¹ Khoerngae, ngar, mqtav ghaqkhaer tiq ghaq, mq-anr nae zafkale luf-eu gar ya’mawr-euq ma. Aqyawf-euq aqlaf-anr li-eu maqbaw-eu duqkhanq-euq mawqtawfdur hawr-eu shmrcav cavma tiq cav yurluf-eu mae.

² Aqyawf, naef sanqpaq hawr-eu naef Saqdaq pyeuf-eu byavyanq, arhu-euq arlawr khoermawr-anr nyaef-awr 1,000 khof byanni paftawf taq-euq mae.

³ Khoernar-aq, mirkhanq-euq tsawrjeuq tsawrca deuq-anr maqbi myawftawv shuirtawvni, aqyawf-anr 1,000 khof maq byanlar-euq khoerkeuvni, li-eu maqbaw-eu duqkhanq-anr bafanr ghae-awr, piqtaeq taq-euq uqtaf, jmq diqtaq-euq mae. Aryamq khoer dzeur-euq nar-aq, aqyawf-anr tiqkhaeq larkhaeq taef-aer pyaeqdovnaeq taef-a.

Tsawrshawr, Kali Naeq-aer Dzoeq-eu

⁴ Khoernar-aq, ngar, nuirmanq tiqdeuq-anr ya’mawr-euq ma. Nuirmanq-anr nuirluf-eu deuq-anr yarkhaq dar-eu baoq biftaq-euq mae. Khoerngae, ngar, Yeqsur-euq garkawv sarkir kamq-euq hawr-eu Miqyaer-euq Dawq-euq baqda’nae, uqduq tov-eu gar yadaq-euq tsawrhaq deuq-euq saflar-anr khawf ya’mawr-euq ma. Aqyawf maf-aq, jeqzaq yawghae khoermawr hawr-eu aqyawf-euq mawrkawr-anr uqduq maqtanq-aer, aqyawf maf-euq narkhawr hawr-eu aqlaf-anr khawf, jeqzaq yawghae khoermawr-euq jmq maq diqtaq-aq. Aqyawfmaf ghofdaef lar-awr, Kali naeq-aer tiqkawv lof-aer 1,000 khof byanni sanqpaq geuf-awr uvlanr-euq mae.

⁵ Heu-aq, ghofdaeflar baebae-eu pov mae. Shir-euq tsawrhaq nuideuq-aq, 1,000 khof maq byanlar-euq khoer-aq maq ghofdaef lar-a.

⁶ Ghofdaeflar baebae-eu pov-euq lafkhoer keuq-eu tsawrhaq deuq-aq, guiqlanq huiq-awr yawshawr mae. Nyiq pov tiqpov shir-eu jeq aqyawf maf-euq khoertav baoq maqjav-a. Aqyawf maf-aq, Miqyaer hawr-eu Kali-euq pirma pyeuf-awr, aqyawfmaf, Kali naeq-aer tiqkawv lof-aer 1,000 khof byanni sanqpaq geuf-awr ya uvlanr taef-a.

Naef Saqdaq-anr Deuvghaq-euq

⁷ Khoernar-aq, 1,000 khof byanlar ngae, naef Saqdaq kuv-anr nae pyaeqdovnaeq taef-a.

⁸ Aqyawf dov-ir-awr, mirma oeqcoer oeqbawq-anr jawr-eu mirkhanq-euq tsawrjeuq tsawrca, Gorgav hawr-eu Maqgorgav tsawrhaq deuq-anr myawfza shuirza-awr, guirdeuv deuv-eu gharduq bi uiqlar taef-a. Aqyawf maf-aq, iqmalavshav-euq kharshuif lof-aer myaq-eu mae.

⁹ Aqyawfmaf mirtsaq tanqkhawr yawqpaw navluf-anr nae davlar-awr, tsawrshawr deuq-euq naqduq hawr-eu Miqyaer zawr gaq-eu meuq-anr gajawq taq-euq mae. Khoerngae, mq-anr nae miqdzaq gaka lef-awr, aqyawf maf-anr puivdzaq jir-euq mae.

¹⁰ Aqyawf maf-anr myawftawv shuirtawv-euq naef sanqpaq-anr khawf, jeqzaq yawghae khoermawr hawr-eu Miqyaer gharduq ngaeqdan-eu jaqmyawf khoerghaq-anr bafpuf taq-euq, miqdzar dzarshuir dofluf-eu miqdzaq-euq lan-euq lafkhoer bafanr ghae-euq mae. Aqyawf maf-aq, li-eu maqbawni, uqcif nan’ghanr maqaer yabi khaeqsaef taef-a.

Yarkhaq Darsaq Saq-eu Nuirmanq

¹¹ Khoerngae, ngar, pyurdeuqni ghae-eu nuirmanq manqma hawr-eu nuirmanq-anr nuirluf-eu ghaq-anr ya’mawr-euq ma. Mq hawr-eu mir, aqyawf-euq maeqshi nae caevdov ghae-awr, aqyawf maf-euq javduq javzar maqpar povmawr nya-eu mae.

¹² Khoernar-aq, ngar, shir-euq tsawrhaq huiqzaq nyirzaq dawqtawvluf, Miqyaer-euq maeqshi yawfluf-eu gar ya’mawr-euq ma. Khoerngae, sanqbof ghawqmya dmq pantaq-euq mae. Daef-eu jeq bif-eu sanqbof khawf pantaq-euq mae. Shir-euq tsawrhaq deuq nae mr-awr shar-euq deuq, sanqbof khoerdeuq-euq lafkhoer bofanr taq-euq mae. Bofanr taq-euq khoerdeuq-anr hawhaw-aer geuxni aqyawf maf-anr yarkhaq darnaeq-eu mae.

¹³ Khoernar-aq, iqmalavshav, aqyawf-euq lafkhoer shirtaq-euq tsawrhaq deuq bifdov laf-awr, shir-eu jeq hawr-eu shir-eu mirkhanq khawf, aqyawf maf-euq lafkhoer shirtaq-euq tsawrhaq deuq bifdov lef-euq mae. Tsawrhaq yawqghaq navluf yawqha nae mrtaq shartaq-euq gar geuxni, yarkhaq dar-eu gar yadaq-euq mae.

¹⁴ Khoerngae, shir-eu jeq hawr-eu shir-eu mirkhanq khawf, miqdzaq-euq lan-euq lafkhoer bi bafpuf-euq mae. Heu-aq, nyiq pov tiqpov shir-eu jeq pyeuf-eu mae.

¹⁵ Khoernar-aq, Daef-eu jeq bif-eu sanqbof-euq lafkhoer tsawrmyanr maqanr-eu tsawrhaq yawqghaq navluf, miqdzaq-euq lan-anr bi dzaepuf jir-euq mae.