Panmaeq 2 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Erpersu Kalizaq Armur

¹ “Erpersu Kalizaq armur-euq mqtav ghaqkhaer-anr heulof-aer bofnaeq-awq: ‘Armar laf-anr aqguir shif siq nyaeftaeq taq-awr, shuir nae janr-euq tsirkhmq dofdavduq shif hmq-euq ghanrcae canluf-eu khoerghaq heulof-aer aer-eu mae:

² “Ngar, nawq nae mr-euq jeq, laejae-euq jeq hawr-eu orcoer-euq deuq-anr siqnya-awr, nawr, tsawrdoer deuq-anr maq hageuf coer-a laer khawf siqnya ma. Ghaqkhaer maqngeur-eu gar nae ghaqkhaer ma laer aer-eu deuq-anr nawr tsermr haw-awr, jaqmyawf myawf-eu nga laer yasiq-euq mae.

³ Nawr daqcoer-awr orcoer duidui-eu lafkhoer, ngaq-euq tsawrmyanr-euq gharduq, ghaqdoer maqdoerni laejae duidui-euq mae.

⁴ Aerkhawf, ngar, nawq-anr aer paq-aer ghae-eu jav-eu ma. Nawq nae gaqbae bae-euq gaq-eu jeq-anr nawr byaerdzae-euq nga.

⁵ Khoermirnae, nawr aqgeugar nae gaka lef-euq le laer sharnoeq-awr, noeqpov noeqpar mr-eu uqtaf, nawq nae yawbae mr-euq lof-aer mr-awq. Nawr noeqpov noeqpar maqmr nar-aq, ngar, nawr jawr-eu gar yawkawr-aer oe-awr, nawq-euq tsirkhmq, ciqtaq duq-anr nae ciqdzae ma.

⁶ Aerkhawf, nawr yawmuiq heujeq anrluf nga siq. Nirgawrla tsawrhaq deuq mrluf sharluf-eu jeq-anr ngar byae-eu lof-aer, nawr khawf byae-eu mae.

⁷ “Naqbawr tsof-awr gaqnya-eu tsawrhaq deuq, muiq-eu Saflar nae Kalizaq armur-anr aernaeq-euq dawq-anr yawmuiq-aer narhaq-awq. Ngar, ghaqler-eu tsawrhaq deuq-anr, Miqyaer-euq Baqlaqdirsuv-euq lafkhoer daef-eu jeq bif-eu arbawr-euq arsiq bidzaq ma.” ’

Saqmeuqnav Kalizaq Armur

⁸ “Saqmeuqnav Kalizaq armur-euq mqtav ghaqkhaer-anr heulof-aer bofnaeq-awq: ‘Ardanq bae-eu hawr-eu Arsaq saq-eu ghaq pyeuf-awr, shir-euq khawf ghofdaef lar-euq khoerghaq heulof-aer aer-eu mae:

⁹ “Ngar, nawq nae mr-euq jeq, khaeq-awr khav-eu gar yadaq-euq hawr-eu irshaq shaqluf-eu siqnya ma (aqdir aernar-aq, nawr-aq, smrmuiq smrbaw mae). Yurdav tsawrhaq maqngeur-eu gar, Yurdav tsawrhaq ma laer aer-eu tsawrhaq khoerdeuq, yaeqbawq saerlu-aer ngaeq-eu gar khawf ngar siqnya ma. Aqyawf maf-aq, naef Saqdaq-euq zanrdawq khawqnymr mae.

¹⁰ Nawr yadaq-eu laer ghae-eu shaqzanq deuq-anr taqguv. Naef sanqpaq-aq, nawmaf-anr tsermr haw-eu laer nawmaf tiqpavnav deuq-anr kuv-anr nyaefur-awr, tser nan byanni khaeq-awr khav-eu gar yadaq taef-a. Nawr shir ngae keuvni sarjax zif-awq. Zif nar-aq, ngar, nawq-anr daef-eu jeq-euq shuir uqkhov bif ma.

¹¹ “Naqbawr tsof-awr gaqnya-eu tsawrhaq deuq, muiq-eu Saflar nae Kalizaq armur-anr aernaeq-euq dawq-anr yawmuiq-aer narhaq-awq. Nyiq pov tiqpov shir-eu jeq, ghaqler-eu tsawrhaq-anr maq lavnar nya-ar.” ’

Beqgaqmor Kalizaq Armur

¹² “Beqgaqmor Kalizaq armur-euq mqtav ghaqkhaer-anr heulof-aer bofnaeq-awq: ‘Miseuq nyiq paw baw-awr tav duidui-eu micaer bafluf-eu ghaq heulof-aer aer-eu mae:

¹³ “Ngar, nawq nae mr-eu jeq siqnya-awr, nawq-euq jawrduq-aq, naef Saqdaq-euq nuirmanq mae laer khawf siqnya ma. Nawr, ngaq-euq tsawrmyanr-anr zifdanni nyaeftaeq-awr, Aqdirpav daefluf ngae khawf, nawr, ngaq-anr jan-eu jeq-anr maq byaerdzae-aq. Ngaq-anr sarjax zif-awr shirpeuq-eu Aqdirpav-aq, nawmaf-euq ghanrcae, naef Saqdaq-euq jawrduq-anr bisaef-euq mae.

¹⁴ Aerkhawf, ngar, nawq-anr aer paq-aer ghae-eu heumyav jeq jav-eu ma. Nawr jawr-eu gar, Baqlamq-euq dawqmaeq dawqtsov-anr cantae-eu tsawrhaq bijawr-euq mae. Dawqmaeq dawqtsov khoer-aq, Irsaqleqlav-euq zaqdeuq sanqtif bitif-eu laer, tanqpanq aqma mawrkawr-anr lawrnaeq-euq lawrdzar dzaqni hawr-eu, banq-awr khaqmiq sheuni, Baqlamq nae Baqlaer-anr maeqnaeq-euq mae.

¹⁵ Khoeruqtaf, nawr jawr-eu gar jawr-eu tsawrhaq tiqpavnav deuq-aq, ngar byae-eu Nirgawrla tsawrhaq-euq dawqmaeq dawqtsov maeqnan cantae luf-eu mae.

¹⁶ Khoermirnae, noeqpov noeqpar mr-awq. Maq noeqpov nar-aq, ngar, nawr jawr-eu gar yawkawr-aer oe-awr, ngaq-euq khaqmae-anr nae dovle-eu micaer nae tsawrhaq khoerdeuq-anr guirdeuvdeuv ma.

¹⁷ “Naqbawr tsof-awr gaqnya-eu tsawrhaq, muiq-eu Saflar nae Kalizaq armur-anr aernaeq-euq dawq-anr yawmuiq-aer narhaq-awq. Ngar, ghaqler-eu tsawrhaq-anr, zaftaq-euq maqnav bidzaq-awr, khaqlo lopyur tiq siq bif ma. Khaqlo khoersiq-euq khoertav tsawrmyanr yawshuif boftaq-euq mae. Khaqlo khoersiq za-euq aqyawfghaq maqngeur nar-aq, tsawrmyanr khoermyanr-anr nuighaq tiqghaq-iq maq siqnya-a.” ’

Tiqyaqdiqlar Kalizaq Armur

¹⁸ “Tiqyaqdiqlar Kalizaq armur-euq mqtav ghaqkhaer-anr heulof-aer bofnaeq-awq: ‘Miqyaer-euq Zaqyo-euq myavnuiv-aq, miqdzaq miqlmr lof-aer dur-awr, aqkuir-aq, guirnyiqni guiqshuir lof-aer dur-eu mae. Aqyawf heulof-aer aer-eu mae:

¹⁹ “Ngar, nawq nae mr-euq jeq, gaq-euq, kuirlaf geuf-euq, jan-eu jeq anr-euq hawr-eu orcoer-euq gar, ngar siqnya ma. Khoeruqtaf, nymq-mr nawr mrluf-eu yawmuiq jeq-aq, yawbae myavmaqtser myaq-eu gar khawf ngar siqnya ma.

²⁰ Aerkhawf, ngar, nawq-anr aer paq-aer ghae-eu heumyav jeq jav-eu ma. Yawqhar yawqha, Miqyaer gharduq ngaeqdan-eu tsawrhaq ma laer aer-eu zaqmiq aqbur Yeqsaqbeqlar-anr nawr bi jawrluf-eu nga siq. Aqyawf, ngaq-euq ghaqzaq ghaqkhaer-anr banq-awr, khaqmiq sheuni hawr-eu tanqpanq aqma mawrkawr-anr lawrnaeq-euq lawrdzar dzaqni, maeqnaeq tsovnaeq-awr murluf-eu mae.

²¹ Aqyawf, banq-awr khaqmiq sheu-eu iqbax noeqpovni, ngar aryamq bif-euq khawf aqyawf maq noeqpov-a.

²² Hawtaq-awq. Ngar, aqyawf-anr bi narlar-awr, yufzar-anr biga ma. Aqyawf naeq-aer banq-awr joe-euq tsawrhaq khoerdeuq khawf, aqyawfmaf mrluf-eu jeq-anr maq noeqpov nar-aq, aqyawf maf-euq khoertav khawf shaqdui zanq duidui-eu jeq bi keuvle ma.

²³ Ngar, aqyawf-euq zaqdeuq-anr saef-awr bishir ma. Khoerngaejawr, ngar-aq, nuima hawr-eu nuinoeq nuidur-anr tsermr-eu ghaq ngar-a laer Kalizaq armur yawqmur navluf yasiq taef-a. Ngar, nawmaf yawqghaq navluf-anr yawqha nae mr-euq lof-aer geuxni bifnaeq ma.

²⁴ “Aqcawq, naef Saqdaq-euq dawqtsuif naf duidui-eu jeq laer aer-eu deuq-anr maq siqnya-aer, khoerlof-aer ghae-eu dawqmaeq dawqtsov-euq maeqnan maq cantae ghae-euq nawmaf hawr-eu Tiqyaqdiqlar-anr jawr-eu nuideuq-anr ngar heulof-aer aernaeq nyar: ngar, nawmaf-anr khavbaev yawqjeqyawq maqpar ciqpinaeq ma.

²⁵ Aerkhawf, ngar oe-eu ngae keuvni, nawmaf javluf-eu jeq-anr zifdanni nyaeftaeq taq-awq.

²⁶ Ghaqler-eu tsawrhaq pyeuf-awr, arsaqsaq ngae keuvni, ngaq-euq gar mrluf-eu tsawrhaq-aq, ngar, aqyawf-anr mirkhanq-euq tsawrjeuq-euq khoertav uvlanr-eu aryaq bifnaeq ma.

²⁷ ‘Aqyawf, aqyawf maf-anr shmr gawqyoeq nae uvlanr-awr, mirtsaq oeqlanq daepav-eu lof-aer daepav daeshav taef-a.’ NgaqDa nae ngaq-anr bifnaeq laf-euq lof-aer,

²⁸ ngar khawf aqyawf-anr shawqga shawqmuir bifnaeq ma.

²⁹ “Naqbawr tsof-awr gaqnya-eu tsawrhaq deuq, muiq-eu Saflar nae Kalizaq armur-anr aernaeq-euq dawqdeuq-anr yawmuiq-aer narhaq-awq.” ’