Panmaeq 19 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Mqtav Miqyaer-anr Jaceuq-eu

¹ Khoernar-aq, ngar, mq-euq khoertav tsawrhaq armaf mafma-euq tersar yawkhav-aer heulof-aer aer-eu gar yagaq-euq ma: “Haleluya! Kakhof-eu jeq, yawshaef khanqsaer, taqhuiq taqmanr-eu jeq hawr-eu baoq, aqdui-euq Miqyaer-euq pyeuf-eu mae.

² Aqyawf nae yarkhaq dar-euq-aq, tsaq duidui-awr dawr duidui-eu mae. Mawrdo anq-eu zaqmiq aqbur heughaq, aqyawf naeq-aer banq-awr muv-euq mirtsaqzaq-anr bicawv-ir-euq mirnae, Miqyaer, aqyawf-anr yarkhaq darnaeq-euq mae. Khoeruqtaf, aqyawf nae Miqyaer-euq kuirlaf zaqkhav-euq shiq lavdov-euq arpoeq, Miqyaer, aqyawf-anr janrkhof naeq-euq mae.”

³ Aqyawfmaf paraer-eu, “Haleluya! Aqyawf-anr puiv-eu miqdzaq-euq uqkhoeq, li-eu maqbawni du taef-a.”

⁴ Khoerngae, aqyuif aqtsu 24 ghaq hawr-eu yawdaef jeq khoer oeq mawr awbyav ghae-awr, nuirmanq-anr nuirluf-eu Miqyaer-anr uqduq tanqtanq-aer aer-eu, “Aqmeq! Haleluya!”

Yawrzaq Oermr Bar-eu

⁵ Khoernar-aq, nuirmanq-anr nae tiq ghaq-euq tersar aer-eu, “Nawmaf, Miqyaer-euq kuirlaf zaqkhav pyeuf-awr, Miqyaer-anr yawzeu baw-eu, huiqzaq nyirzaq yawqghaq navluf, aqdui-euq Miqyaer-anr jaceuq-awq.”

⁶ Khoeruqtaf, ngar, tsawrhaq armaf mafma-euq tersar lof-aer dur-awr, lawrgawv gawvma-euq tersar hawr-eu mqjeq yawkhav-aer jeq-eu tersar lof-aer khawf dur-eu tersar heulof-aer aer-eu gar yagaq-euq ma, “Haleluya! Baoq huiq duidui-eu Sanqpaq Miqyaer uvlanrluf mae.

⁷ Aqdui laqkhaqcaer duidui-awr, lurgha caergha-eu lafkhoer aqyawf-anr ciqhuiq ciqmanr kar-eur. Aqjeq mirnae aernar-aq, Yawrzaq oermr bar-eu aryamq keuvlar-euq mae. Aqyawf-euq miqshuif, yawqha-euq mawrdo laeqhmqdan taq-euq mae.”

⁸ Khoerngae, miqshuif-anr shawrjaevni ghae-awr yawshaef bya-eu, muiq-eu sheqsha saqpar maeqtsoeq bifnaeq-awr bidm-euq mae. Sheqsha saqpar khoer-aq, tsawrshawr deuq nae tsaq-awr dawr-eu jeq mr-euq gar aermawf-eu mae.

⁹ Khoernar-aq, mqtav ghaqkhaer khoerghaq, ngaq-anr aernaeq laf-eu, “ ‘Yawrzaq oermr bar-eu gar lar-awq laer kurtaq-euq tsawrhaq deuq-aq, guiqlanq huiq-eu mae’ laer nawr boftaq-awq.” Aqyawf, ngaq-anr paraer-eu, “Dawq heudawq-aq, aqdir aqmar Miqyaer nae ngaeq-euq dawq mae.”

¹⁰ Khoerngae, ngar awbyav ghae-awr aqyawf-euq aqkuir-anr uqduq tanq-eu laer ghae-euq ma. Aerkhawf, aqyawf, ngaq-anr aer-eu, “Hawsher-eq! Nawr teulof-aer taqpar janr de-eq. Ngar khawf, nawr hawr-eu Yeqsur-euq garkawv sarkir kamq-eu aqyuif aqnyir deuq lof-aer kuirlaf zaqkhav pyeuf-eu nawq-euq cawq ma. Miqyaer-anr uqduq tanq-awq. Aqjeq mirnae aernar-aq, Yeqsur-euq garkawv sarkir kamq-eu-aq, Miqyaer gharduq ngaeqdan-eu saflar mae.”

Manqpyur Dziqluf-eu Tiq Ghaq

¹¹ Ngar, mq pantaq-euq gar ya’mawr-awr hawghaelef ngae, manq manqpyur tiq mawr jawr-awr, manq-anr dziqluf-eu ghaq-aq, sarjax zif-awr, tsaq duidui-eu ghaq laer kur-eu mae. Aqyawf-aq, tsaq-awr dawr-eu lafkhoer yarkhaq dar-awr, guirdeuv deuv-eu mae.

¹² Aqyawf-euq myavnuiv-aq, miqdzaq miqlmr-anr dur-awr, uqduq-anr shuir uqkhov ghawqmya siq khovluf-eu mae. Aqyawf maqngeur nar-aq, tiqghaq-iq maq siqnya-eu tsawrmyanr tiq myanr boftaq-euq mae.

¹³ Aqyawf-aq, shiq-anr dawvduiv-euq paerkhanq paermanr dmluf-eu mae. Aqyawf-euq tsawrmyanr-aq, Miqyaer-euq Dawq laer kur-eu mae.

¹⁴ Mqtav-euq guirmaf deuq, manq manqpyur dziq-awr, pyurdeuqni ghae-awr shawrjaevni ghae-eu muiq-eu sheqsha saqpar-euq maeqtsoeq dm-awr, aqyawf-euq maeqnan cantae ghae-euq mae.

¹⁵ Aqyawf-euq khaqmae-anr nae zawr tav-eu micaer tiq kanr dovle-euq mae. Micaer khoer-aq, mirkhanq-euq tsawrjeuq deuq-anr deuv-eu gharduq mae. Khoernar-aq, aqyawf, aqyawf maf-anr shmr gawqyoeq nae uvlanr taef-a. Aqyawf, baoq huiq duidui-eu Miqyaer-euq nuima paer duidui-eu aqgaf dzaruir nawqdov duq-anr nawq taef-a.

¹⁶ Aqyawf-euq paerkhanq paermanr hawr-eu shaqpyaq-anr heulof-aer boftaq-euq mae, “Sanqpaq deuq-euq Sanqpaq, Yawsanr deuq-euq Yawsanr.”

Muir-eu Deuq-anr Ghaqler-euq

¹⁷ Khoerngae, ngar, nanrma-euq ghanrcae mqtav ghaqkhaer tiq ghaq yawfluf-eu gar ya’mawr-euq ma. Mq-euq ghanrcae kharzaw luf-eu arjir deuq-anr aqyawf gur-awr, tersar yawkhav-aer heulof-aer aernaeq-euq mae, “Nawmaf tiqkawv lof-aer, Huiq-eu Miqyaer-euq yawbui-anr uiqlar bymrlar-awq.

¹⁸ Sanqpaq deuq-euq shaqjir, guirdzoeq aqda deuq-euq shaqjir, ghaqkhav aqda deuq-euq shaqjir, manq hawr-eu manq-anr dziq-eu deuq-euq shaqjir dzaqlar-awq. Zaqkhav deuq, zaqkhav maqngeur-eu deuq, huiqzaq hawr-eu nyirzaq heudeuq dawqtawv luf-euq shaqjir dzaqlar-awq.”

¹⁹ Khoernar-aq, ngar, jeqzaq yawghae khoermawr hawr-eu mirtsaq-euq sanqpaq deuq, aqyawf maf-euq guirzaq deuq naeq-aer uiqlar taq-awr, manq-anr dziqluf-eu khoerghaq hawr-eu aqyawf-euq guirzaq deuq naeq-aer guirdeuv deuv-eu laer ghae-eu gar ya’mawr-euq mae.

²⁰ Khoerngae, jeqzaq yawghae khoermawr-anr nyaefmi-awr, Miqyaer gharduq ngaeqdan-eu jaqmyawf khoerghaq-anr khawf, jeqzaq yawghae khoermawr naeq-aer tiqkawv lof-aer nyaefmi-euq mae. Miqyaer gharduq ngaeqdan-eu jaqmyawf khoerghaq-aq, jeqzaq yawghae khoermawr-euq jmq diqtaq-awr, khoermawr-euq mawrkawr-anr uqduq tanq-eu tsawrhaq-anr myawfza shuirza nya’ni, jeqzaq yawghae khoermawr-euq maeqshi bisiq bimawr-eu jeq mrluf-eu khoerghaq mae. Aqyawf nyaf-anr yawdaef-aer, miqdzar dzarshuir dofluf-eu miqdzaq-euq lan-euq lafkhoer bafanr ghae-euq mae.

²¹ Nuideuq-anr-aq, manq-anr dziqluf-eu khoerghaq-euq khaqmae-anr nae dovle-euq micaer nae coersaef jir-euq mae. Arjir dawqtawvluf, aqyawf maf-euq shaqjir tiqdaev dzaq-euq mae.