Panmaeq 18 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Baqburloq Meuq Coqdzae-euq

¹ Khoernar-aq, ngar, mqtav ghaqkhaer yawqghaqyawq, mq-anr nae zafka le-eu gar ya’mawr-euq ma. Aqyawf huiq duidui-eu aryaq jav-awr, aqyawf-euq yawshaef khanqsaer-euq baqda’nae, mirtsaq-anr yawshaef bya-eu mae.

² Aqyawf tersar yawkhav-aer gurgur-aer heulof-aer aer-eu mae: “Coqdzae shaw. Huiq duidui-eu Baqburloq coqdzae shaw-euq mae. Aqyawf-aq, naefdeuq-euq jawrduq hawr-eu naef yawjawf dawqtawv luf-euq kuv pyeuflar-euq mae. Maqshawr-aer aqcawq byae-eu arjir yawqjeq navluf ur-eu khalor pyeuflar-euq mae.

³ Aqjeq mirnae aernar-aq, mirkhanq yawqkhanq navluf aqyawf-euq banq-awr muv-eu jeq-euq baqda’nae Nuima paer duidui-eu jeq-euq aqgaf dzaruir dawryaef taq-euq mae. Mirtsaq-euq sanqpaq deuq, aqyawf naeq-aer banq-awr muv-euq mae. Aqyawf javmyaq-awr byaeqlaeq shaevdae-aer daef-eu mirnae, mirtsaq-euq khoertav jeqgaf jeqka mr-eu deuq smrmuiq muiqlar-euq mae.”

⁴ Khoernar-aq, ngar, mq-anr nae tersar yawqsaryawq heulof-aer ngaeqdov lef-eu gar yagaq-euq ma: “Ngaq-euq tsawrhaq deuq-or! Aqyawf-euq lafkhoer nae dovlar-awq. Maqngeur nar-aq, nawr, aqyawf naeq-aer iqbax mr-euq lof-aer, aqyawf khaeq-awr khav-eu gar yadaq-eu lof-aer nawr khawf yadaq taef-a.

⁵ Aqjeq mirnae aernar-aq, aqyawf-euq iqbax-aq, mq-euq khoertav keuvler-awr, Aqyawf-euq yawbanq yawlaeq-anr Miqyaer noeqtaq-euq mae.

⁶ Aqyawf nae aqcawq-anr janrnaeq-euq lof-aer, aqyawf-anr khawf janrkhof naeq-awq. Aqyawf nae mrtaq shartaq-euq taf-aer nyiq myav byanni aqyawf-anr mrkhof naeq-awq. Aqyawf nae keuq-euq khmqmaq ciq-awr, aqyawf-euq gharduq nyiq nav byanni yawtav keuqtav naeq-awq.

⁷ Aqyawf yawqhar yawqha taqhuiq taqmanr-awr, byaeqlaeq shaevdae-aer daef-euq lof-aer, Aqyawf-euq khoertav khaeq-awr khav-eu jeq hawr-eu noeqshaq-eu jeq bi keuvle-awq. Aqjeq mirnae aernar-aq, nuima-euq lafkhoer aqyawf aer-eu, ‘Ngar-aq, miqcoeq miqma maqngeur, sanqpaqma geuf-awr nuirluf-eu ma. Noeqshaq-eu jeq, ngaq-anr tiqjawr-iq maq keuvlar-ar.’

⁸ Khoermirnae, shir-eu jeq, tsawrngoer ngoer-eu jeq hawr-eu maef-awr shuf-eu jeq, khaeqnaeq khavnaeq-eu heudeuq, tiq nan-euq lafkhoer taef-aer aqyawf-euq khoertav keuvle taef-a. Aqyawf-anr yarkhaq dar-eu Sanqpaq Miqyaer-aq, ghaq khav-eu mirnae, aqyawf-anr miqdzaq nae keuqdzae taef-a.”

Baqburloq Coqdzae-awr Ngoer-eu

⁹ “Meuq khoermeuq naeq-aer banq-awr muv-euq, tiqkawv lof-aer byaeqlaeq shaevdae-aer daef-euq mirtsaq-euq sanqpaq deuq, meuq khoermeuq-anr puiv-eu uqkhoeq-anr ya’mawr ngae, aqyawf-euq gharduq tsawrngoer yawkhav-aer ngoer taef-a.

¹⁰ Aqyawf lof-aer shaqzanq yadaq-eu gar guv-eu mirnae, garmanr kaq-eu gar yawf-awr aer-eu, ‘Ghawqshar shaq-aer ngar-a. Hui duidui-awr ghaq zawr khav-eu Baqburloq-or! Nawr-aq, ghawqshar shaq-aer ngar-a. Naqliq tiq laf-euq lafkhoer taef-aer nawq-anr yarkhaq dar-eu jeq keuvle-euq ngar-a.’

¹¹ Mirtsaq-euq khoertav jeqgaf jeqka mr-eu deuq khawf aqyawf-euq gharduq tsawrngoer yawkhav-aer ngoer taef-a. Aqjeq mirnae aernar-aq, aqyawf maf-euq myawq zeur-eu tsawrhaq maqpar jawrni pyeuf-ir-euq mae.

¹² Mrmyawq khoerdeuq-aq, pyur, shuir, khaqlo saer, arcar carkhawf-euq saer, zawr muiq-eu saqpar parpyur, boeq-euq saqpar, nerpuir puir-eu hawr-eu nertseuvni ghae-eu saqpar, sawkheufni ghae-eu arbawr yawqjeq navluf, ya’ma-euq juir nae janrtaq-euq yawqjeq navluf, arpoeq khav-eu darkawq nae janrtaq-euq yawqjeq navluf, guiqshuir, shmr hawr-eu khaqlo lopyur,

¹³ cawqkaq cawqpir, tsaqgawq, dzarmuir dzarsawr, laefsaw-eu jeq, lawrbaoq, aqgaf dzaruir, tsir, caermeu, caer, mawrner, yawr, manq, manq lavlawq, zaqkhav hawr-eu tsawrhaq-euq daefzir heudeuq mae.

¹⁴ “Nawq-euq nuima maerjuir juir duidui-eu arsiq arlu deuq, nawq-anr nae ghawq-ir-euq mae. Poeq duidui-eu jeq hawr-eu muiq duidui-eu myawqganq dawqtawvluf byov-ir jir-awr, khoerdeuq-anr tiqjawr-iq maqpar ya’mawr mae.

¹⁵ Myawq khoerdeuq gaf-awr, aqyawf-euq baqda’nae smrmuiq muiqlar-euq jeqgaf jeqka mr-eu deuq, aqyawf lof-aer shaqzanq yadaq-eu gar guv-eu mirnae, garmanr kaq-eu gar yawf-awr, dawqkawq kawqkawq-aer yawkhav-aer ngoer-awr

¹⁶ aer-eu, ‘Ghawqshar shaq-aer ngar-a! Zawr muiq-eu sheqsha saqpar parpyur, nerpuir puir-eu hawr-eu nertseuvni ghae-eu maeqtsoeq dm-awr, shuir, khaqlo saer hawr-eu arcar carkhawf-euq saer geufluf-eu, meuq meuqma-or! Nawr-aq, ghawqshar shaq-aer ngar-a!

¹⁷ Aqjeq mirnae aernar-aq, khoernav nav-aer smrmuiq muiq-eu, naqliq tiq laf-euq lafkhoer taef-aer yawqngaef pyeuf-ir jir-euq beu.’ Lawq-euq aqyuif dawqtawvluf, lawq-anr ur-awr irluf larluf-eu tsawrhaq dawqtawvluf, lawq-euq lafkhoer gar mr-eu tsawrhaq dawqtawvluf hawr-eu iqmalavshav-anr ghoe-awr gafdzaq mrdzaq-eu tsawrhaq dawqtawvluf, garmanr kaq-eu gar yawf-awr,

¹⁸ aqyawf-anr puivluf-eu uqkhoeq-anr ya’mawr-awr gurgur-aer aer-eu, ‘Huiq duidui-eu meuq heumeuq-anr dur-eu meuq, aqgeu meuq jav-eu la?’

¹⁹ “Aqyawfmaf, uqduq-anr khaqlaer tawvdav tawvdav-aer gur-eu lafkhoer, dawqkawq kawqkawq-aer tsawrngoer yawkhav-aer ngoerngoer-aer aer-eu, ‘Ghawqshar shaq-aer ngar-a! Meuq meuqma heumeuq-aq, ghawqshar shaq-aer ngar-a! Aqyawf smrmuiq muiq-awr byaeqlaeq shaevdae-aer daef-euq mirnae, iqmalavshav-euq lafkhoer lawq kharjav-eu yawqghaq navluf smrmuiq muiqlar-euq mae. Aerkhawf, naqliq tiq laf-euq lafkhoer taef-aer aqyawf byovjir-euq mae.’

²⁰ “Mqtav mirkhanq-or! Meuq heumeuq byov-ir-euq mirnae laqkhaq caer-awq. Nawmaf, shawr-eu ghaqkhaer hawr-eu Miqyaer gharduq ngaeqdan-eu deuq khawf laqkhaq caer-awq. Aqjeq mirnae aernar-aq, nawmaf-euq gharduq Miqyaer, aqyawf-anr janrkhof naeq-euq mae!”

Baqburloq Meuq-euq Arsaq Saqduq

²¹ Khoernar-aq, ghaq zawr khav-eu mqtav ghaqkhaer tiq ghaq lolaeq laeqma-anr dur-eu khaqlo tiq siq baf-awr, iqmalavshav-anr dzaepuf ghae-awr nae heulof-aer aer-eu mae: “Baqburloq meuq meuma-anr khawf, khoerlof-aer ghaqkhav shar-awr yabi bafdzae taef-a. Aqkar meuq teumeuq-anr tiqjawr-iq maqpar ya’mawr-ar.

²² Deur-mq cuq diq-eu tersar, dawqcar car-eu tersar, bawqlaw baw-eu tersar hawr-eu darhae baw-eu tersar, nawq-euq lafkhoer tiqjawr-iq maqpar yagaq-ar. Lafmyawq lafmuv kharngeur-eu jeq mr-eu tsawrhaq, nawq-euq lafkhoer maqpar jawr-eu mae. Lolaeq laeq-eu tersar khawf, nawq-euq lafkhoer tiqjawr-iq maqpar yagaq mae.

²³ Tsirkhmq dofbya taq-euq yawshaef, nawq-euq lafkhoer tiqjawr-iq maqpar bya-aer, Miqshuif hawr-eu yoshuif-euq tersar nawq-euq lafkhoer tiqjawr-iq maqpar yagaq mae. Jeqgaf jeqka mr-eu nawq-euq tsawrhaq deuq-aq, mirtsaq-euq khoertav-euq yawhuiq yawmanr deuq mae. Mirkhanq-euq tsawrjeuq dawqtawv luf-anr nawq-euq nyirpaq shavma nae, myawftawv shuirtawv jir-euq mae.

²⁴ Miqyaer gharduq ngaeqdan-eu tsawrhaq deuq-euq shiq, tsawrshawr deuq-euq shiq hawr-eu mirtsaq-euq khoertav kharbi saef-euq tsawrhaq deuq-euq shiq dawqtawvluf, aqyawf-euq lafkhoer jav-eu gar povmawr-euq mae.”