Panmaeq 17 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Mawrdo Anq-eu Zaqmiq Aqbur

¹ Khoerngae, khmqmaq shif khmq ciqluf-eu mqtav ghaqkhaer khoer shif ghaq-anr nae tiq ghaq oe-awr ngaq-anr heulof-aer aernaeq laf-eu mae, “Lar-awq. Ircuf ghawqmya ni-euq khoertav nuirluf-eu mawrdo anq-eu zaqmiq aqbur khoerghaq-anr yarkhaq darnaeq-eu gar, ngar, nawq-anr bihaw nyar.

² Mirtsaq-euq khoertav jawr-eu sanqpaq deuq, aqyawf naeq-aer banq-awr muv-euq mae. Mirtsaq-euq khoertav jawr-eu tsawrhaq deuq khawf, aqyawf-euq banq-awr muv-eu aqgaf dzaruir dawryaef taq-euq mae.”

³ Khoernar-aq, muiq-eu Saflar-euq lafkhoer, ngaq-anr bawrtsanq bawrdanr-anr ciqghae naeqlaf-euq mae. Khoerngae, ngar, zaqmiq aqbur tiq ghaq, nertseuvni ghae-eu jeqzaq yawghae tiq mawr-anr dziqluf-eu gar ya’mawr-euq ma. Jeqzaq yawghae heumawr-aq, uqduq shif siq, uqcoer tser coer tsof-awr, mawrdo dolan-aer Miqyaer-anr yaeqbawq saerlu-aer aer-eu armyanr deuq boftaq-euq mae.

⁴ Zaqmiq aqbur heughaq, nerpuir puir-eu hawr-eu nertseuvni ghae-eu maeqtsoeq dm-awr, shuir, khaqlo saer hawr-eu arcar carkhawf-euq saer myawqgur geufluf-eu mae. Aqlaf-euq lafkhoer, aqcawq naeq-aer banq-awr muv-eu jeq-anr taf-eu jawflafni ghae-eu jeq hawr-eu nuidav davlar paq-aer ghae-eu jeq tiqbyanni danq-eu shuir khmqmaq ciqluf-eu mae.

⁵ Aqyawf-euq narkhawr-anr dawqtsuif zaftaq-euq tsawrmyanr heulof-aer boftaq-euq mae: BAQBURLOQ MEUQ MEUQMA. MAWRDO ANQ-EU ZAQMIQ AQBUR DEUQ HAWR-EU, MIRTSAQ-EUQ KHOERTAV NUIDAV DAVLAR PAQ-AER GHAE-EU JEQ-EUQ AQMA.

⁶ Ngar, zaqmiq aqbur heughaq, tsawrshawr deuq-euq shiq hawr-eu Yeqsur-euq baqda’nae bisaef-euq tsawrhaq deuq-euq shiq dawryaef taq-euq gar ya’mawr-euq ma. Ngar ya’mawr ngae, ngaq-anr zanq duidui ler-euq mir-a.

Heudeuq Dawqtawv Luf-euq Dawqtsuif

⁷ Khoerngae, mqtav ghaqkhaer khoerghaq, ngaq-anr heulof-aer aernaeq laf-eu mae, “Nawr aqjeq mirnae zanqler-eu nya? Zaqmiq aqbur teughaq-euq garkawv hawr-eu aqyawf-anr tawqluf-eu uqduq shif siq, uqcoer tser coer tsof-eu jeqzaq yawghae teumawr-euq garkawv zaftaq-euq dawqtsuif, ngar, nawq-anr ja’maeqnaeq nyar.

⁸ Nawq nae mawr-euq jeqzaq yawghae khoermawr-aq, arhu jawr-euq khawf, nymq-mr maqpar jawr-aer, aqkar li-eu maqbaw-eu duqkhanq-anr nae dovlar-awr, cawv-ir-eu jeq-euq lafkhoer ya’ur-ir-eu mae. Mq hawr-eu mir bae ngae nae, Daef-eu jeq bif-eu sanqbof-euq lafkhoer, tsawrmyanr maq bofanr taq-euq mirtsaq-euq khoertav daef-eu tsawrhaq deuq-aq, jeqzaq yawghae heumawr-anr ya’mawr ngae zanq duidui ler taef-a. Aqjeq mirnae aernar-aq, jeqzaq yawghae heumawr-aq, arhu jawr-euq khawf, nymq-mr maqjawr-aer, aqkar par jawrlar-eu mae.

⁹ “Garkawv heu siqnya’ni zaqsiq tsawrganr anr-awr nuinoeq yazmq-eu mae. Uqduq khoer shif siq-aq, zaqmiq aqbur heughaq nuirluf-eu gawqjawq shif jawq mae.

¹⁰ Sanqpaq shif ghaq-anr khawf aermawf-eu mae. Ngaq ghaq-aq, shir-awr tiq ghaq-aq, nymq-mr uvlanr luf-eu mae. Tiqghaq-aq, maq dovlar-aq siq. Aqyawf dovlar ngae, tiqkhaeq larkhaeq yajawr-eu taef mae.

¹¹ Arhu jawr-euq khawf, nymq-mr maqjawr-eu jeqzaq yawghae khoermawr-aq, yaef ghaq tiqghaq mae. Aqyawf khawf khoer shif ghaq-anr gawfluf-awr, cawv-ir-eu jeq-anr ya’ur-ir-eu mae.

¹² “Nawq nae ya’mawr-euq uqcoer tser coer khoer-aq, sanqpaq tser ghaq-anr aermawf-eu mae. Aqyawfmaf, mirkhanq-anr maqya uvlanr-aq siq. Aerkhawf, aqyawfmaf, jeqzaq yawghae khoermawr naeq-aer tiqkawv lof-aer naqliq tiq laf byanni sanqpaq geuf-eu aryaq za taef-a.

¹³ Sanqpaq heudeuq nuima tiqsiq taef-aer taq-awr, yawqha-euq baoq hawr-eu aryaq, jeqzaq yawghae khoermawr-anr taef-aer bifnaeq taef-a.

¹⁴ Aqyawfmaf, Yawrzaq-anr guirdeuvdeuv taef-a. Guirdeuvdeuv ngae, Yawrzaq, aqyawf maf-anr deuvghaq taef-a. Aqjeq mirnae aernar-aq, Yawrzaq-aq, yawsanr deuq-euq Yawsanr hawr-eu sanqpaq deuq-euq Sanqpaq pyeuf-eu mae. Yawrzaq naeq-aer jawr-eu tsawrhaq deuq-aq, kurdov taq-euq tsawrhaq, tserdov taq-euq tsawrhaq hawr-eu sarjax zif-eu tsawrhaq deuq mae.”

¹⁵ Mqtav ghaqkhaer khoerghaq, ngaq-anr heulof-aer par aernaeq laf-euq mae: “Nawq nae ya’mawr-euq mawrdo anq-eu zaqmiq aqbur khoerghaq nuirluf-eu ircuf khoerdeuq-aq, ghawqmya jeq-euq tsawrhaq, tsawrhaq baqmaf, tsawrjeuq tsawrca hawr-eu dawqngaeq dawqbav deuq mae.

¹⁶ Nawq nae ya’mawr-euq jeqzaq yawghae khoermawr hawr-eu aqyawf-euq uqcoer tsercoer khoerdeuq, mawrdo anq-eu zaqmiq aqbur khoerghaq-anr byae taef-a. Aqyawfmaf, aqyawf kharjav-eu jeq yurgeufjir naeq-awr, nermyawvni bijawr taef-a. Khoeruqtaf, aqyawf-euq shaqjir dzaq-awr aqyawf-anr miqdzaq nae dzanpuivdzae taef-a.

¹⁷ Aqjeq mirnae aernar-aq, Miqyaer-euq dawq byanlar ngae keuvni, sanqpaq khoerdeuq nuima tiqsiq taef-aer taq-awr, jeqzaq yawghae khoermawr-anr yawqha uvlanr-eu dzoeqdzaq bifnaeqni, Miqyaer nae noeqtaq-euq jeq bi byanlar-eu laer, aqyawf maf-euq nuima-anr bi noeqdov ler-euq mae.

¹⁸ Nawq nae ya’mawr-euq zaqmiq aqbur khoerghaq-aq, mirtsaq-euq khoertav-euq sanqpaq deuq-anr uvlanr-eu meuq meuqma mae.”