Panmaeq 16 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Khaeq-awr Khav-eu Khmqmaq

¹ Khoernar-aq, ngar, yawshawr lawv-anr nae tersar yawkhav-aer, mqtav ghaqkhaer khoer shif ghaq-anr heulof-aer aernaeq-eu gar yagaq-euq ma, “Nawmaf ir-awr, Miqyaer-euq nuima paer duidui-eu jeq danq-eu khmqmaq shif khmq teudeuq, mirtsaq-euq khoertav shaevdav-ir-awq.”

Khmqmaq Tif: Marnar Narlar-euq

² Khoermirnae, mqtav ghaqkhaer yawbae ghaq ir-awr, aqyawf-euq khmqmaq mirtsaq-euq khoertav shaevdavghae ngae, jeqzaq yawghae khoermawr-euq marbyawf lavbaw taq-euq tsawrhaq hawr-eu jeqzaq khoermawr-euq mawrkawr-anr uqduq tanq-eu tsawrhaq deuq-anr, byurlar paq-aer ghae-eu marnar narlar-euq mae.

Khmqmaq Nyif: Iqmalavshav, Shiq Pyeuf-ir-euq

³ Khoernar-aq, mqtav ghaqkhaer nyiq ghaq tiqghaq, aqyawf-euq khmqmaq, iqmalavshav-anr shaevpufghae ngae, iqmalavshav, tsawrshir-euq shiq lof-aer pyeuflar-awr, iqmalavshav-euq lafkhoer khardaef kharjawr-eu jeq shirjir-euq mae.

Khmqmaq Smr: Ircuf, Shiq Pyeuf-ir-euq

⁴ Khoernar-aq, mqtav ghaqkhaer smr ghaq tiqghaq, aqyawf-euq khmqmaq lawrbaq lawrgawv hawr-eu ircuf irbyoe deuq-anr shaevdavghae ngae, ircuf khoerdeuq shiq pyeuf-ir-euq mae.

⁵ Khoerngae, ngar, ircuf-euq mqtav ghaqkhaer heulof-aer aer-eu gar, yagaq-euq ma, “Arhu nae daef-eu nymq-mr keuvni daefluf-awr, aqkar keuvni daef-eu Sanqpaq Miqyaer-or! Nawr heulof-aer yarkhaq dar-eu-aq, tsaq-awr dawr-eu mae.

⁶ Aqyawfmaf, tsawrshawr hawr-eu Miqyaer gharduq ngaeqdan-eu deuq-euq shiq lavyoer-euq mirnae, Nawr, aqyawf maf-anr shiq bidawr-eu-aq, aqyawf maf-anr of-awr geux-eu mae.”

⁷ Khoeruqtaf, ngar, lawrduq jav-eu gar nae heulof-aer aerdov lef-eu gar yagaq-euq ma. “Baoq huiq duidui-eu Sanqpaq Miqyaer-or! Nawq nae yarkhaq dar-euq-aq, tsaq duidui-awr dawr duidui-eu mae.”

Khmqmaq Oeq: Miqdzaq Lavlanr-euq

⁸ Mqtav ghaqkhaer oeq ghaq tiqghaq, aqyawf-euq khmqmaq nanrma-anr shaevdavghae ngae, lanr duidui-eu nanrma-euq miqdzaq nae tsawrhaqzaq-anr lavlanr-eu baoq biftaq-euq mae.

⁹ Tsawrhaqzaq lanr duidui-eu mirnae, khaeq-awr khav-eu khoerdeuq-euq khoertav baoq jav-eu Miqyaer-euq tsawrmyanr-anr yaeqbawq saerlu-aer aer-eu mae. Aqyawfmaf noeqpov noeqpar maqmr-eu uqtaf, Miqyaer-anr maq ciqhuiq maq ciqmanr-a.

Khmqmaq Ngaq: Yawzanr Hawr-eu Nar Duidui-eu Jeq

¹⁰ Mqtav ghaqkhaer ngaq ghaq tiqghaq, aqyawf-euq khmqmaq, jeqzaq yawghae khoermawr-euq nuirmanq-anr shaevdavghae ngae, jeqzaq yawghae khoermawr uvlanr luf-eu mirkhanq zanrtsuini pyeuf-ir-euq mae. Tsawrhaqzaq nardui gawr duidui-eu mirnae, yawqha-euq maeqlar-anr yawqha kawfluf-eu mae.

¹¹ Aqyawfmaf shaqciq ciq-awr nardui gawr duidui-eu mirnae, mq-euq khoertav jawr-eu Miqyaer-anr yaeqbawq saerlu-aer aer-eu mae. Aqyawfmaf nae mr-awr shar-euq jeq-anr noeqpov noeqpar maqmr-a.

Khmqmaq Kof: Naef-euq Baqmaf Guirdeuv Deuv-eu Laer Laeqhmq-eu

¹² Mqtav ghaqkhaer kof ghaq tiqghaq, aqyawf-euq khmqmaq, Urbaqlar lawrgawv gawvma-anr shaevpufghae ngae, nanrma dovkhaeq paw nae oe-euq sanqpaq deuq-euq gharduq garma danrlarni, lawrgawv khoergawv ircuf gui-ir-euq mae.

¹³ Khoerngae, byavyanq-euq khaqmae-anr nae, jeqzaq yawghae khoermawr-euq khaqmae-anr nae hawr-eu, Miqyaer gharduq ngaeqdan-eu jaqmyawf deuq-euq khaqmae-anr nae, khaqpaq-anr dur-eu naef yawjawf smq mawr dovlar-eu gar, ngar ya’mawr-euq ma.

¹⁴ Naef khoerdeuq-aq, bisiq bimawr-eu jeq mrmawr-eu naefdeuq-euq saflar mae. Baoq huiq duidui-eu Miqyaer-euq arnan nanma ngae nan, guirdeuv deuv-eu gharduq, mirtsaq-euq khoertav doeni jawr-eu sanqpaq deuq bi uiqlar-eu laer naef khoerdeuq dov-ir taq-euq mae.

¹⁵ “Hawde-eq. Ngar, smrkhoeq tanrjoe lof-aer oe ma. Yawbeur beur-aer jawr-awr, maeqtsoeq yawmuiq-aer dmghoeq taq-euq tsawrhaq deuq-aq, guiqlanqhuiq taef-a. Maqngeur nar-aq, aqyawf nermyawvni yacan-awr, aqcawq, aqyawf-euq shafdawr-eu jeq-anr ya’mawr taef-a.”

¹⁶ Khoernar-aq, naef khoerdeuq, sanqpaq deuq-anr Heqbyaer dawq, Aqmaqgeqdoq laer kur-eu jawrduq-anr kuruiq laf-euq mae.

Khmqmaq Shif: Mirluv Luvlar-euq

¹⁷ Mqtav ghaqkhaer shif ghaq tiqghaq, aqyawf-euq khmqmaq, mq-euq ghanrcae shaevdzaeghae ngae, mq-euq khoertav-euq yawshawr lawv-euq nuirmanq-anr nae tersar yawkhav-aer ngaeqdov lef-eu, “Mrluiv jir-euq ma.”

¹⁸ Khoerngae, mqmyawf myawf-awr tersar ghawqmya jeq manr-eu uqtaf, mqjeq jeq-awr, mirluv yawkhav-aer luv duidui-eu mae. Tsawrhaqzaq-anr bae-euq nan-anr nae iqnan keuvni, mirluv heunav nav-aer tiqjawr-iq maq luvlar haw-aq.

¹⁹ Meuq meuqma khoermeuq smq pav pav-ir-euq mae. Mirkhanq yawqkhanq navluf-euq meuqdeuq khawf, coqpyav coqshav jir-euq mae. Miqyaer-aq, Baqburloq meuq meuqma-anr noeqdov lar-awr, aqyawf-euq nuima paer duidui-eu aqgaf dzaruir khmqmaq khoer, aqyawf-anr ciqnaeq-euq mae.

²⁰ Irjawlanr dawqtawvluf byov-ir jir-awr, gawqjawq tiqjawr-iq maqpar ya’mawr mae.

²¹ Uqyaer arsiq ghawqloeni mq-anr nae gale-awr, tsawrhaqzaq-anr gadae le-euq mae. Uqyaer arsiq khoer tiq siq 50 kivlokan aerghaqni kan-eu mae. Uqyaer arsiq bi gale-awr, khaeqnaeq khavnaeq-euq mirnae, aqyawfmaf, Miqyaer-anr yaeqbawq saerlu-aer aer-eu mae. Aqjeq mirnae aernar-aq, khaeq-awr khav-eu khoer-aq, huiqdui kan duidui-eu mae.