Panmaeq 15 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Khaeq-awr Khav-eu Mqtav Ghaqkhaer

¹ Khoernar-aq, ngar, mq-anr huiq duidui-eu zanqler paq-aer ghae-eu bisiq bimawr-eu jeq ya’mawr-euq ma. Khoer-aq, mqtav ghaqkhaer shif ghaq, arsaq saq-eu khaeq-awr khav-eu jeq shif jeq yurluf-eu mae. Miqyaer nuima paer duidui-eu jeq, khoer-euq lafkhoer anrjir-eu mae.

² Khoernar-aq, ngar, jeq-oq naeq-aer miqdzaq keuqtaq-euq gar dur-eu pyawqhaw-euq iqmalavshav-anr ya’mawr-euq ma. Jeqzaq yawghae khoermawr hawr-eu aqyawf-euq mawrkawr-anr ghaqler-awr, aqyawf-euq tsaqtsov-eu jeq hawr-eu aqyawf-euq tsawrmyanr-euq nanqmyaq-anr ghaqler-euq tsawrhaq khoerdeuq, Miqyaer-euq deur-mq cuq baf-awr, jeq-oq iqmalavshav-euq khoertav yawfluf-eu mae.

³ Aqyawfmaf, Miqyaer-euq ghaqzaq ghaqkhaer pyeuf-eu Morseq-euq cardawq hawr-eu Yawrzaq-euq cardawq heulof-aer car-eu mae: “Baoq huiq duidui-eu Sanqpaq Miqyaer-or! Nawq nae mr-awr shar-euq deuq-aq, huiq duidui-awr, zanqler paq-aer ghae-eu mae. Tsawrshawr deuq-euq Sanqpaq-or! Nawq-euq garma-aq, dawr-awr tsaq-eu hawr-eu tsaq-awr dawr-eu mae.

⁴ Sanqpaq Miqyaer-or! Nawq-anr maqguv-aer, Nawq-euq tsawrmyanr-anr maq ciqhuiq-eu aqsur ghaq jawr-eu la? Aqjeq mirnae aernar-aq, nawr, tiq ghaq taef-aer yawshawr mae. Mirkhanq-euq tsawrjeuq dawqtawvluf, Nawq-euq maeqshi lar-awr uqduq tanqlar taef-a. Aqjeq mirnae aernar-aq, nawq nae dar-euq lof-aer byacaevni dovlar-euq mae.”

⁵ Khoernar-aq, ngar hawghaelef ngae, mqtav mirkhanq-euq sarkir pyeuf-eu saqpar saeqghawv-euq yawshawr lawv pantaq-euq gar ya’mawr-euq ma.

⁶ Khaeq-awr khav-eu shif jeq yurluf-eu mqtav ghaqkhaer khoer shif ghaq, yawshaef bya-awr shawrjaevni ghae-eu sheqsha saqpar maeqtsoeq dm-awr, khanq-anr shuir jofpaf paftaq-awr nae, yawshawr lawv-anr nae dovle-euq mae.

⁷ Yawdaef jeq khoer oeq mawr-euq lafkhoer tiq mawr-aq, mqtav ghaqkhaer khoer shif ghaq-anr, mqmaq maqbyav yarzir daef-eu Miqyaer-euq nuima paer duidui-eu jeq tiqbyanni danq-eu shuir khmqmaq shif khmq ciqnaeq-euq mae.

⁸ Khoerngae, Miqyaer-euq yawshaef khanqsaer hawr-eu baoq-euq baqda’nae, yawshawr lawv tiqbyanni uqkhoeq du-eu mae. Mqtav ghaqkhaer khoer shif ghaq-euq, khaeq-awr khav-eu jeq khoer shif jeq maqjir-euq khoer-aq, yawshawr lawv-euq lafkhoer tiqghaq-iq maq urler nya-a.