Biblia Todo Logo
Bìoball air-loidhne

- Sanasan -

Panmaeq 14 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq


Yawrzaq Hawr-eu 144,000 Ghaq

1 Hawsher-eq. Ngar hawghaelef ngae, Ziroq gawqjawq-euq khoertav Yawrzaq yawfluf-eu gar ya’mawr-euq ma. Yawrzaq naeq-aer tsawrhaq 144,000 ghaq yawfluf-eu mae. Aqyawf maf-euq narkhawr-anr aqyawf-euq Aqda-euq tsawrmyanr boftaq-euq mae.

2 Khoernar-aq, ngar, ircuf ghawqmya’ni yoer-eu tersar hawr-eu khav duidui-eu mqjeq jeq-eu tersar lof-aer dur-eu tersar, mq-anr nae manrdov lef-eu gar yagaq-euq ma. Khoeruqtaf, ngar deur-mq diq-eu tsawrhaq, aqyawf ha-euq deur-mq cuq diq-eu tersar-anr khawf yagaq-euq ma.

3 Aqyawf maf-aq, nuirmanq-euq maeqshi, yawdaef jeq khoer oeq mawr hawr-eu aqyuif aqtsu khoerdeuq-euq maeqshi, cardawq yawshuif carluf-eu mae. Mirtsaq-euq khoertav nae kakhof taq-euq tsawrhaq khoer 144,000 ghaq maqngeur nar-aq, cardawq khoerbymr maq dzawnya-a.

4 Tsawrhaq heudeuq-aq, zaqmiq aqbur-euq baqda’nae maq lavjawf-euq shawr-eu tsawrhaq mae. Aqyawf maf-aq, Yawrzaq kharir-eu gar cantae-eu, Miqyaer hawr-eu Yawrzaq-anr lawrnaeq-eu awfbae baelar-euq arsiq pyeufni, aqyawf maf-anr tsawrhaqzaq-euq lafkhoer nae kakhofdov taq-euq deuq mae.

5 Miqyaer-euq nuirmanq-euq maeqshi iqbax taqkhar maqza-eu tsawrhaq pyeuf-eu mirnae, aqyawf maf-euq khaqmae-euq lafkhoer jaqmyawf maq povmawr nya-a.


Mqtav Ghaqkhaer Smr Ghaq

6 Khoernar-aq, ngar, mqtav mirkhanq-euq ghanrcae mqtav ghaqkhaer tiq ghaq zawluf-eu gar ya’mawr-euq ma. Aqyawf-aq, mirtsaq-euq khoertav kharjawr-eu tsawrjeuq tsawrca, arjeuq arca, dawqngaeq dawqbav hawr-eu tsawrhaq yawqjeq navluf-anr maeqnaeq-eu gharduq, mqmaq maqbyav yarzir-euq guiqlanqdawq piluf-eu mae.

7 Aqyawf, tersar yawkhav khav-aer aer-eu, “Miqyaer-anr guv-awr, aqyawf-anr ciqhuiq ciqmanr-awq. Aqjeq mirnae aernar-aq, aqyawf yarkhaq dar-eu aryamq keuvle-euq mae. Mq hawr-eu mir, iqmalavshav hawr-eu ircuf irbyoe deuq-anr bae-euq ghaq-anr uqduq tanq-awq.”

8 Khoernar-aq, mqtav ghaqkhaer nyiq ghaq tiqghaq, yawbae ghaq-anr cantaedov lef-awr aer-eu, “Coqdzae shaw. Huiq duidui-eu Baqburloq meuq coqdzae shaw-euq mae. Aqjeq mirnae aernar-aq, aqyawf, mirkhanq yawqkhanq navluf-anr banq-awr muv-eu baqda’nae nuima paer duidui-eu aqgaf dzaruir bidawr-euq mae.”

9 Khoernar-aq, mqtav ghaqkhaer smr ghaq tiqghaq, khoer nyiq ghaq-euq maeqnan cantaedov lef-awr tersar yawkhav-aer heulof-aer aer-eu mae, “Jeqzaq yawghae khoermawr-anr hawr-eu jeqzaq khoermawr-euq mawrkawr-anr uqduq tanq-awr, narkhawr-anr maqngeur nar-aq, aqlaf-anr tsaq bitsov taq-euq aqsur ghaq maqkaq,

10 tiqjeq-iq maqkeuq-aer tav duidui-eu, Miqyaer nuima paer-eu khmqmaq-euq lafkhoer khar shaevdanq taq-euq Miqyaer nuima paer duidui-eu aqgaf dzaruir yadawr taef-a. Khoeruqtaf, aqyawf, shawr-eu mqtav ghaqkhaer hawr-eu Yawrzaq-euq maeqshi, miqdzaq hawr-eu miqdzar dzarshuir nae khaeqnaeq khavnaeq-eu gar yadaq taef-a.

11 Aqyawf maf-anr khaeq-awr khav-eu uqkhoeq, li-eu maqbawni uqkhoeq dudu-aer jav taef-a. Khoerngae, jeqzaq khoermawr-anr hawr-eu jeqzaq yawghae khoermawr-euq mawrkawr-anr, uqduq tanq-eu deuq hawr-eu aqyawf-euq tsawrmyanr nae tsaqtsov taq-euq tsawrhaq deuq-aq, uqcif nan’ghanr maqaer, ghaqnaq maqya naqni yadaq taef-a.”

12 Heulof-aer aer-eu-aq, Yeqsur-anr jan-awr, Miqyaer-euq zanrdawq khofdawq-anr mrcaw-eu tsawrshawr deuq-anr bi daqcoer bi orcoer-eu gharduq ma.

13 Khoerngae, mq-anr nae ngaeqdov lef-awr gaqle-eu tersar, ngaq-anr aernaeq laf-eu, “ ‘Aqkar nar-aq, Sanqpaq Miqyaer-euq lafkhoer shir-euq tsawrhaq deuq-aq, guiqlanq huiq-eu mae’ laer boftaq-awq.” Muiq-eu Saflar aer-eu, “Ngeur mae. Aqyawfmaf gar mr-eu naq-awr, aqyawfmaf nae mrtaq shartaq-euq deuq, aqyawf maf-euq maeqnan cantae taef-a.”


Mirtsaq-euq Khoertav Caer Yaeq-eu

14 Hawsher-eq. Ngar hawghaelef ngae, pyurdeuqni ghae-eu mqdmr-anr ya’mawr-euq ma. Mqdmr khoer-euq khoertav, Tsawrhaq-euq Zaqyo-anr dur-eu tiq ghaq nuirluf-eu mae. Aqyawf-euq uqduq-anr shuir uqkhov khov-awr, aqlaf-anr tav duidui-eu yaeqkhof yurluf-eu mae.

15 Mqtav ghaqkhaer yawqghaqyawq uqduq tanqnymr nymrma-anr nae dovle-awr, tersar yawkhav-aer gur-awr mqdmr-anr nuirluf-eu ghaq-anr aernaeq-eu, “Mirtsaq-euq khoertav caer myanlar-euq ngar-a. Caer yaeqder lar-euq mirnae, nawq-euq yaeqkhof yur-awr yaeqle-awq.”

16 Khoerngae, mqdmr khoertav nuirluf-eu khoerghaq, yaeqkhof nae mirtsaq-euq khoertav diqlanr-awr, mirtsaq-euq khoertav-euq caer yaeqluiv jir-euq mae.


Nuipaer-euq Aqgaf Pyaev-eu

17 Khoernar-aq, mqtav ghaqkhaer yawqghaqyawq mq-euq khoertav-euq uqduq tanqnymr nymrma-anr nae dovle-euq mae. Aqyawf khawf tav duidui-eu yaeqkhof yurluf-eu mae.

18 Khoerngae, miqdzaq-euq khoertav baoq jav-eu mqtav ghaqkhaer tiq ghaq, lawrduq-anr nae dovle-awr, tersar yawkhav-aer gur-awr, tav duidui-eu yaeqkhof yurluf-eu ghaq-anr aernaeq-eu, “Tav duidui-eu yaeqkhof yur-awr, mirtsaq-euq khoertav-euq aqgaf cirni-anr pur-eu aqgaf arpur-anr pyaev-awq. Aqjeq mirnae aernar-aq, aqgaf arsiq awflar jir-euq ngar-a.”

19 Khoerngae, mqtav ghaqkhaer khoerghaq, yaeqkhof nae mirtsaq-euq khoertav diqlanr-awr, mirtsaq-euq khoertav-euq aqgaf arpur dawqtawv luf-anr pyaevuiq-awr, Miqyaer nuima paer duidui-eu aqgaf dzaruir nawqdov duq-anr shaevanr ghae-euq mae.

20 Meuq-euq meuqdzer jav-eu aqgaf dzaruir nawqdov duq-euq lafkhoer anr-eu aqgaf arsiq khoerdeuq nawqpyaev ngae, aqgaf dzaruir nawqdov duq-anr nae shiq yoerdov lef-euq mae. Shiq khoer-aq, manq-euq maeqkaf-anr keuvni naf-awr, 190 lotsov kaq-eu gar keuvni yoerkeuv ghae-euq mae.

2018 ©

Bibles International ®

The Bible Society of Baptist Mid-Missions

Bibles International
Lean sinn:



Sanasan