Panmaeq 13 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Iqmalavshav-euq Jeqzaq Yawghae

¹ Khoernar-aq, ngar, iqmalavshav-euq kharshuif-anr nawqtaeq-awr yawfluf ngae, iqmalavshav-anr nae jeqzaq tiq mawr dovlar-eu gar ya’mawr-euq ma. Jeqzaq khoermawr-aq, uqcoer tser coer tsof-awr, uqduq shif siq tsof-eu mae. Uqcoer tser coer luf shuir uqkhov tiq coer-anr tiq siq khov-awr, uqduq shif siq-anr-aq, Miqyaer-anr yaeqbawq saerlu-aer aer-eu armyanr boftaq-euq mae.

² Ngaq nae ya’mawr-euq jeqzaq heumawr-aq, khaqzuiq-anr dur-eu mae. Aqkuir-aq, khaqhmr-euq aqkuir-anr dur-awr, khaqmae-aq, arlaqjaqshir-euq khaqmae-anr dur-eu mae. Byavyanq, aqyawf-euq baoq, nuirmanq hawr-eu huiq-eu aryaq, jeqzaq yawghae heumawr-anr bifnaeq-euq mae.

³ Jeqzaq yawghae heumawr-euq uqduq tiq siq-anr, shirtaw taeqni lavnar taq-euq gar ngar hawmawr-euq ma. Aerkhawf, shir paq-aer diqnar taq-euq markhaeq khoer taqler-euq mae. Mirtsaqzaq dawqtawvluf zanqler jir-awr, jeqzaq yawghae heumawr-euq maeqnan cantae ghae-euq mae.

⁴ Byavyanq nae jeqzaq yawghae heumawr-anr aryaq bifnaeq-euq mirnae, aqyawfmaf, byavyanq heumawr-anr uqduq tanq-awr, jeqzaq yawghae heumawr-anr khawf uqduq tanqtanq-aer aer-eu, “Jeqzaq yawghae heumawr-anr dur-eu aqsur ghaq jawr-eu la? Aqsur ghaq, aqyawf-anr guirdeuv deuvghaq nya-eu la?”

⁵ Jeqzaq yawghae heumawr-anr dawq yawhuiq hawr-eu Miqyaer-anr yaeqbawq saerlu-aer aer-eu dawq ngaeq-eu khaqmae bif-awr, bala 42 siq byanni khoerlof-aer mr-eu gharduq aryaq biftaq-euq mae.

⁶ Jeqzaq yawghae heumawr khaqmae mrnga-awr, Miqyaer-anr yaeqbawq saerlu-aer aer-awr, Miqyaer-euq tsawrmyanr-anr khawf, aqyawf-euq saqpar saeqghawv-anr khawf, mq-euq khoertav jawr-eu deuq-anr khawf, yaeqbawq saerlu-aer aer-eu mae.

⁷ Khoeruqtaf, aqyawf, tsawrshawr deuq naeq-aer guirdeuv deuv-awr, deuvghaqni pyaeqnaeq taq-euq mae. Khoeruqtaf, arjeuq arca, dawqngaeq dawqbav hawr-eu tsawrjeuq tsawrca dawqtawv luf-anr uvlanr-eu aryaq khawf bifnaeq taq-euq mae.

⁸ Mqbae mirbae bae ngae nae, bisaef-euq Yawrzaq-euq Daef-eu jeq bif-eu sanqbof-euq lafkhoer, tsawrmyanr maq bofanr taq-euq mirtsaq-euq khoertav jawr-eu tsawrhaq dawqtawvluf, jeqzaq heumawr-anr uqduqtanq taef-a.

⁹ Naqbawr tsof-awr gaqnya-eu tsawrhaq, yawmuiq-aer narhaq-awq.

¹⁰ Aqcawq-anr nyaefghae-euq tsawrhaq-aq, aqcawq nae yabi nyaefghae-awr, aqcawq-anr micaer nae saef-euq tsawrhaq-aq, micaer nae yabi saef taef-a. Heu-aq, tsawrshawr deuq orcoerni jan-eu jeq pyeuf-eu mae.

Mirtsaq-euq Jeqzaq Yawghae

¹¹ Khoernar-aq, ngar, mirtsaq-anr nae jeqzaq yawghae yawqmawryawq dovlar-eu gar ya’mawr-euq ma. Jeqzaq heumawr-aq, yawrzaq-euq uqcoer-anr dur-eu uqcoer nyiq coer tsof-awr, dawq-aq, byavyanq lof-aer ngaeq-eu mae.

¹² Aqyawf, yawbae dovlar-euq jeqzaq yawghae khoermawr-euq maeqshi jawr-awr nae, yawbae mawr-euq aryaq dawqtawvluf zmq-eu mae. Mirtsaqzaq dawqtawvluf shirtaw taeqni bi lavnar-awr taqler-euq jeqzaq yawghae yawbae mawr-anr uqduq tanqni, jeqzaq yawghae heumawr laejae-eu mae.

¹³ Aqyawf, tsawrhaq-euq maeqshi huiq-eu bisiq bimawr-eu jeq janr-awr, mq-anr nae mirtsaq-euq khoertav miqdzaq bi gale-euq mae.

¹⁴ Aqyawf, jeqzaq yawghae yawbae mawr-euq maeqshi, bisiq bimawr-eu jeq janr-eu baoq zataq-euq mirnae, mirtsaq-euq khoertav jawr-eu tsawrhaq deuq-anr myawfza shuirza-awr, micaer nae bi deuvnar-euq khawf daefluf-eu jeqzaq yawghae khoermawr-euq mawrkawr taev-awq laer mirtsaq-euq zaqdeuq-anr khaer-eu mae.

¹⁵ Aqyawf, jeqzaq yawghae khoermawr-euq mawrkawr dawq ngaeqnya larni saf bawanr-eu hawr-eu, jeqzaq yawghae khoermawr-euq mawrkawr-anr uqduq maqtanq-eu tsawrhaq yawqghaq navluf-anr saef-eu baoq za-euq mae.

¹⁶ Aqyawf, huiqzaq nyirzaq, smrmuiq, irshaq, zaqkhav hawr-eu zaqkhav maqngeur-eu yawqghaq navluf-euq armar laf maqngeur nar-aq, narkhawr-anr tsaqtsov-eu jeq bi za’ni mr taef-a.

¹⁷ Tsaqtsov mrtaq-euq hawr-eu jeqzaq yawghae khoermawr-euq tsawrmyanr maqngeur nar-aq, tsawrmyanr-euq nanqmyaq diqtaq-euq tsawrhaq taef-aer myawq anq-awr zeurnya-eu mae.

¹⁸ Garkawv heu siqnya’ni zaqsiq tsawrganr ya’anr-eu mae. Ghovshaw nya-eu tsawrhaq deuq-aq, jeqzaq yawghae khoermawr-euq nanqmyaq sawxdovnya taef-a. Aqjeq mirnae aernar-aq, nanqmyaq khoer-aq, tsawrhaq tiq ghaq-euq nanqmyaq mae. Nanqmyaq khoer-aq, 666 mae.